ចលនានិស្សិតជួបចរចាជាលើកទីមួយជាមួយមន្រ្តីក្រុងហុងកុង
ចុះផ្សាយនៅថ្ងៃ៖
ស្តាប់ - ០៥:៤០
តំណាងក្រុមបាតុករហុងកុង និងមន្រ្តីជាន់ខ្ពស់របស់រដ្ឋាភិបាលហុងកុងត្រូវជួបចរចាគ្នា នៅល្ងាចថ្ងៃអង្គារនេះ។ ចាប់តាំងពីមានបាតុកម្មរបស់និស្សិតហុងកុង ដើម្បីទាមទារឲ្យចៅហ្វាយក្រុងចុះចេញពីតំណែង និងការបោះឆ្នោតសេរី ដោយគ្មានការលូកដៃពីទីក្រុងប៉េកាំង នេះជាលើកទីមួយ ដែលភាគីជម្លោះ ទាំងពីរជួបពិភាក្សា គ្នា បន្ទាប់ពីបានលុបចោលពីរដង ដោយសារអន្តរាគមន៍ហិង្សារបស់អាជ្ញាធរទៅលើក្រុមបាតុករ។ យ៉ាងណាក៏ដោយ ទាំងចលនានិស្សិត និងអ្នកវិភាគជាច្រើន បាននិយាយទាយទុកមុនហើយថា គេនឹងមិនអាចសង្ឃឹមថា ការចរចានឹងផ្តល់លទ្ធផលវិជ្ជមាន ទៅតាមការតវ៉ារបស់ក្រុមបាតុករតវ៉ាឡើយ។
ក្រុមនិស្សិតមិនសូវមានសុទិដ្ឋិនិយមប៉ុន្មានទៅលើការចរចានៅល្ងាចថ្ងៃនេះ គឺបន្ទាប់ពីបានស្តាប់លឺជំហរបញ្ជាក់ជាថ្មីរបស់ចៅហ្វាយក្រុងហុងកុង លោក លឿង ឈុនយីង។ នៅប៉ុន្មានម៉ោងប៉ុណ្ណោះ មុនបើកការចរចាជាមួយចលនានិស្សិត មេដឹកនាំរដ្ឋាភិបាលហុងកុងបច្ចុប្បន្ន បាននិយាយប្រាប់កាសែតបរទេសរួចជាស្រេចថា លោកនឹងមិនចុះចេញពីតំណែង ហើយ ការបោះឆ្នោតដោយសេរី ក៏នឹងមិនអាចធ្វើទៅបានទេ នៅហុងកុង។ ប៉ុន្តែ លោកបញ្ជាក់ដែរថា គេអាចបើកផ្លូវឲ្យគណៈកម្មការរៀបចំការបោះឆ្នោតមានលក្ខណៈប្រជាធិបតេយ្យជាងមុន។
ចៅហ្វាយក្រុងហុងកុងបានពន្លយពាក្យប្រាប់ទៅអ្នកកាសែតអាមេរិកថា បើសិនគេរៀបចំការបោះឆ្នោតដោយសេរី ទៅតាមការទាមទាររបស់ចលនានិស្សិត នោះ គឺមិនខុសអី ពីអនុញ្ញាតឲ្យពាក់កណ្តាលនៃប្រជាជនហុងកុងដែលមានជីវភាពមិនសូវធូរធា គឺរកលុយបានតិចជាង ១៨០០ដុល្លារ ឲ្យចូលរួមនៅក្នុងឆាកនយោបាយហុងកុង យ៉ាងដូច្នេះដែរ។
ចៅហ្វាយក្រុងហុងកុងទំនងចង់និយាយដល់ភាពអនាធិបតេយ្យ ឬអ្នកក្រីក្រដែលចូលកាន់អំណាចនៅទីក្រុងពាណិជ្ជកម្មដ៏ធំរបស់អាស៊ី បើសិនគេអនុញ្ញាតឲ្យប្រជាជនហុងកុងបោះឆ្នោតដោយសេរី ដើម្បីជ្រើសរើសថ្នាក់ដឹកនាំក្រុង។ អភិបាលហុងកុងបច្ចុប្បន្ននិយាយមិនលាក់លៀមថា គាត់ពេញចិត្តចង់ឲ្យមានប្រព័ន្ធជ្រើសរើសមេដឹកនាំហុងកុង តាមរយៈកាបោះឆ្នោតរបស់សមាជិកជាង១ពាន់ ២រយនាក់របស់គណៈមជ្ឈិមបក្សកុម្មុយនិស្តចិន ជាជាងការបោះឆ្នោតដោយសេរី នៅហុងកុង។
ចៅហ្វាយក្រុងហុងកុងនិយាយដូច្នេះ គឺដូចជាបិទផ្លូវ កុំឲ្យក្រុមនិស្សិតសង្ឃឹមថា ពួកគេនឹងទទួលបានតាមការទាមទាររបស់ពួកគេនោះ។ ក្រុមនិស្សិតចុះថ្នល់ធ្វើបាតុកម្ម អស់បីសប្តាហ៍មកហើយ នៅ ហុងកុង ក៏ដើម្បីទាមទារឲ្យចៅហ្វាយក្រុងចុះចេញពីតំណែង និងទាមទារការបោះឆ្នោតដោយសេរី ពោលគឺគ្មានការលូកដៃពីទីក្រុងប៉េកាំង។ សម្រាប់ក្រុមនិស្សិត ចៅហ្វាយក្រុងហុងកុង ជាកូនអុករបស់ទីក្រុងប៉េកាំង គឺមិនមែនជាអ្នកតំណាងផលប្រយោជន៍ពិតប្រាកដឲ្យប្រជាជនហុងកុងទេ។
ម្យ៉ាងទៀត សំដីរបស់ចៅហ្វាយក្រុង អាចនឹងដុតកំហឹងរបស់ក្រុមបាតុករ ដែលតាមពិតចុះថ្នល់ តវ៉ា ដោយសារតែពួកគេមិនពេញចិត្តនឹងគម្លាត កាន់តែធំរវាងអ្នកមាន និងអ្នកក្រ នៅទីក្រុងហុងកុង។ នៅហុងកុង រាល់មុខតំណែងសំខាន់ៗ ទាំងនៅក្នុងស្ថាប័នរដ្ឋ និងឯកជនសុទ្ធតែកាន់កាប់ដោយក្រុមអ្នកមាន នៅក្នុងខណៈដែល ២០ភាគរយ នៃប្រជាជនសរុប ៧លាននាក់ រស់នៅក្រោមបន្ទាត់នៃភាពក្រីក្រ។ ប្រជាជនដើមរបស់ហុងកុងយល់ថា គឺប្រជាជនចិនដីគោកដែលភាគច្រើនជាអ្នកមានបានចូលមករស់នៅក្រុងហុងកុង និងបានបង្កើតឲ្យមានគម្លាតកាន់តែធំ រវាងអ្នកមាន និងអ្នកក្រ។
នីតិរដ្ឋ បែបចិន
នីតិរដ្ឋដែលទីក្រុងប៉េកាំងចង់លើកនិយាយ ជានីតិរដ្ឋរដ្ឋបែបចិន គឺមិនមែនជានីតិរដ្ឋដែលគេអនុវត្តនៅប្រទេសលោកខាងលិចទេ។ នៅពេលដែលថ្នាក់ដឹកនាំ និយាយពីនីតិរដ្ឋ ឬការពង្រឹងអំណាចនៃច្បាប់ គឺគេចង់សំដៅទៅលើការពង្រឹងអំណាចរបស់បក្សកុម្មុយនិស្ត ទៅលើថ្នាក់ដឹកនាំជាន់ក្រោម ដូចជារដ្ឋបាលក្រុងហុងកុងជាដើម។
ចាប់តំាងពីចូលកាន់តំណែងរបស់ខ្លួន លោកប្រធានាធិបតីចិន ស៊ី ជីនពីង បានបង្ហាញថា លោកបានពង្រឹងអំណាចនៃច្បាប់ ធ្វើឲ្យចិនក្លាយជានីតិរដ្ឋ ដោយបានធ្វើយុទ្ធនាការបោសសម្អាតក្រុមមន្រ្តីពុករលួយ។ មន្រ្តីធំៗជាច្រើនរបស់បក្សកុម្មុយនិស្តត្រូវបានចោទ និងបណ្តេញពីបក្ស ក្នុងបទចោទប្រកាន់ប្រព្រឹត្តអំពើពុករលួយ។ ប៉ុន្តែ សម្រាប់អ្នកជំនាញខ្លះ នីតិរដ្ឋបែបចិន គឺមានន័យស្មើការពង្រឹងអំណាចផ្តាច់ការរបស់បក្សកុម្មុយនិស្ត ឬរបស់មេដឹកនាំចិន ទៅលើរាល់ថ្នាក់ដឹកនាំជាន់ក្រោមយ៉ាងដូច្នេះដែរ។
នៅក្នុងទ្រឹស្តី នីតិរដ្ឋមានន័យថា គេត្រូវធ្វើអ្វីៗ ទៅតាមការចែងរបស់ច្បាប់ គឺគ្មានអ្វីធំជាងច្បាប់ទេ។ ប៉ុន្តែ នៅក្នុងការអនុវត្តជាក់ស្តែង ចិនដូចជាប្រទេសជាច្រើន បានប្រើច្បាប់ជាឧបករណ៍នយោបាយរបស់ខ្លួន ដើម្បីបោសសម្អាតក្រុមប្រឆាំងនឹងខ្លួន។ ជាក់ស្តែង តាមរយៈយុទ្ធនាការបោសសម្អាតក្រុមមន្រ្តី ពុករលួយ លោកប្រធានាធិបតីចិន តាមពិតកំពុងកាត់បន្ថយអំណាចរបស់ក្រុមមន្រ្តីថ្នាក់តំបន់ និងក្រុង ដែលមាននិន្នាការប្រឆាំងនឹងអំណាចរបស់លោក មានដូចជាករណីរបស់ចៅហ្វាយក្រុងចុងឈីង លោកប៉ូ ស៊ីវឡៃ ជាឧទាហរណ៍ស្រាប់។
នៅក្នុងករណីក្រុងហុងកុងវិញ ទីក្រុងប៉េកាំងធ្លាប់បានសន្យាផ្តល់សិទ្ធិដល់ប្រជាជនហុងកុងឲ្យជ្រើសរើសមេដឹកនាំរបស់ខ្លួនតាមរយៈការបោះឆ្នោត។ ប៉ុន្តែ ប៉េកាំងបានបញ្ជាក់យ៉ាងច្បាស់ថា រាល់បេក្ខជនសម្រាប់តំណែងចៅហ្វាយក្រុងហុងកុង ត្រូវតែជ្រើសរើសដោយបក្សកុម្មុយនិស្តចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ