នៅទីបំផុត ម៉ូស្គូនិងវ៉ាស៊ីនតោនបានព្រមព្រៀងគ្នាលើផែនការបទឈប់បាញ់នៅស៊ីរី
ចុះផ្សាយនៅថ្ងៃ៖
ស្តាប់ - ០៤:៥២
ក្រោយពីចរចាគ្នាអស់ជាង១២ម៉ោង ថ្ងៃសុក្រ៩កញ្ញាម្សិលមិញ ប្រមុខការទូតរុស្ស៊ី លោក ស៊ែរហ្គៃ ឡាវ៉្រូវ និងសមភាគីអាមេរិកាំង លោក ចន ឃែរី តំណាងឲ្យមហាអំណាច ដែលគាំទ្រជំរំសត្រូវនឹងគ្នាក្នុងសង្គ្រាមនៅស៊ីរី បានឯកភាពគ្នាលើផែនការដែលតម្រង់ទៅអនុវត្តបទឈប់បាញ់ក្នុងប្រទេសនោះឯង ហែកហួរដោយសង្គ្រាមអស់៥ឆ្នាំមកហើយ ផែនការនេះ អាចនាំទៅកាន់ការសហការគ្នារវាងរុស្ស៊ី និងស.រ.អា.ផ្នែកយោធាតែម្តង ដើម្បីវាយកំទេចពួកជីហាដភេរវនិយមនៅទីនោះ។
ខ្លឹមសារមួយនៃផែនការនេះ គឺញែកក្រុមប្រឆាំងមិនជ្រុលស៊ីរីទល់នឹងរបបលោកអាសាដ ឲ្យនៅដាច់ពីអង្គការ”រដ្ឋអ៊ីស្លាម” និងអង្គការ“រណសិរ្ស អាល់ ណូស្រា “ ដែលត្រូវ ក្រុមប្រឹក្សាសន្តិសុខអ.ស.ប. ចាត់ទុកជាអង្គការភេរវនិយមសុទ្ធសាធ។
ពួកប្រឆាំងមិនជ្រុលនិយមថ្លែងទៅហើយថា ខ្លួននឹងគាំទ្រដល់ផែនការ “ឡាវ៉្រូវ-ឃែរី “ គឺ លុះណាតែកងទ័ពរដ្ឋាភិបាលលោកអាសាដសុខចិត្តបំពេញតាមផែនការនេះ។
ម៉ូស្គូនិងវ៉ាស៊ីនតោនសាទរចំពោះផែនការនេះដែលនឹងបន្ទាបកម្រិតអំពើហិង្សានៅស៊ីរី ហើយអាចដាក់ឲ្យដំណើរការនីតិវិធីខាងរៀបរយឲ្យមានសន្តិភាពនៅស៊ីរី។ ស្របនឹងផែនការនេះ បទឈប់បាញ់នឹងចូលជាធរមាន ចាប់ពីព្រឹកថ្ងៃចន្ទ ១២កញ្ញាទៅដែលជាថ្ងៃបុណ្យពិសិដ្ឋមួយរបស់អ្នកកាន់សាសនាអ៊ីស្លាម។
រុស្ស៊ីនិងអាមេរិកក៏ព្រមព្រៀងគ្នាលើផ្លូវផងទាំងឡាយដែលត្រូវប្រើសម្រាប់ដឹកជញ្ជូនជំនួយ មនុស្សធម៌ទៅផ្គត់ផ្គង់ឧបត្ថម្ភដល់បណ្តាជននៃក្រុងណាដែលជាប់ក្នុងការឡោមព័ទ្ធ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ