តួកគីបញ្ជូនរថក្រោះចូលទៅបើកសមរភូមិថ្មីមួយទៀតនៅក្នុងទឹកដីស៊ីរី
តួកគីបានបញ្ជូនរថក្រោះបន្ថែមទៀតចូលទៅក្នុងទឹកដីស៊ីរី ដើម្បីបើកប្រតិបត្តិការទ័ពជើងគោក ក្នុងសមរភូមិថ្មីមួយទៀត ប្រឆាំងនឹងក្រុមជីហាតរដ្ឋអ៊ីស្លាម។ ការបើកសមរភូមិថ្មីនេះ គឺជាការបញ្ជាក់ឲ្យឃើញកាន់តែច្បាស់ ពីការលូកដៃចូលកាន់តែជ្រៅរបស់តួកគី នៅក្នុងយុទ្ធនាការប្រយុទ្ធប្រឆាំងនឹងក្រុមជីហាតនៅក្នុងប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
យោងតាមការផ្សាយរបស់ទីភ្នាក់ងារព័ត៌មានតួកគី រថក្រោះយ៉ាងតិច ២០គ្រឿង ព្រមទាំងរថពាសដែក និងរថយន្តដឹកជញ្ជូនយោធាជាច្រើនគ្រឿងផ្សេងទៀត ត្រូវបានតួកគីបញ្ជូនចូលទៅក្នុងទឹកដីស៊ីរី កាលពីថ្ងៃសៅរ៍ សំដៅទៅបើកការវាយប្រហារទៅលើទីតាំងថ្មីមួយទៀតរបស់ក្រុមជីហាតរដ្ឋអ៊ីស្លាម។ នេះជាសមរភូមិថ្មីមួយទៀត ដែលតួកគីបើកធ្វើ នៅក្នុងទឹកដីស៊ីរី ក្រោយពីបានវាយដណ្តើមកាន់កាប់ទីតាំងក្រុមជីហាតរដ្ឋអ៊ីស្លាមមួយកន្លែង កាលពីថ្ងៃទី២៤សីហាកន្លងទៅ។
ប្រតិបត្តិការទ័ពជើងគោកដែលតួកគីបើកធ្វើជាបន្តបន្ទាប់នៅពេលនេះ គឺជាអន្តរាគមន៍យោធាដ៏ធំបំផុត ដែលតួកគីបើកធ្វើនៅក្នុងប្រទេសស៊ីរី ចាប់តាំងពីផ្ទុះសង្រ្គាមស៊ីវិលស៊ីរី កាលពីឆ្នាំ២០១១មក។ អន្តរាគមន៍យោធានេះត្រូវបានធ្វើឡើង ក្រោយពីតួកគីទទួលរងនូវការរិះគន់យ៉ាងខ្លាំងៗពីសំណាក់សហរដ្ឋអាមេរិកជាសម្ព័ន្ធមិត្ត ទាក់ទងនឹងតួនាទីរបស់តួកគី នៅក្នុងវិបត្តិស៊ីរី។ អាមេរិកបានបង្ហាញនូវការមិនសប្បាយចិត្ត ដោយសារតែយល់ឃើញថា តួកគីមិនត្រឹមតែមិនជួយកម្ចាត់ក្រុមជីហាតរដ្ឋអ៊ីស្លាម តែថែមទាំងរំខានដល់យុទ្ធនាការនេះទៅទៀត តាមរយៈការវាយប្រហារទៅលើក្រុមឧទ្ទាមគួឌីស្ថាន ដែលកំពុងតែជួយអាមេរិក ក្នុងការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាមនៅស៊ីរី។
ការបើកធ្វើប្រតិបត្តិការវាយលុកទៅលើទីតាំងក្រុមជីហាតរដ្ឋអ៊ីស្លាមនៅក្នុងទឹកដីស៊ីរីនៅពេលនេះ ក៏ទំនងជាមិនមែនជារឿងចៃដន្យនោះដែរ គឺបើកធ្វើ នៅមុនពេលដែលលោកប្រធានាធិបតីតួកគីជួបជាមួយនឹងលោកអូបាម៉ា នៅក្នុងអំឡុងជំនួបកំពូល G20 នៅក្នុងប្រទេសចិន នៅថ្ងៃអាទិត្យនេះ។
គួរបញ្ជាក់ថា ទំនាក់ទំនង រវាងតួកគី និងអាមេរិក ដែលជាសម្ព័ន្ធមិត្តដ៏សំខាន់ នៅក្នុងបក្សសម្ព័ន្ធអូតង់ជាមួយគ្នា ត្រូវជួបនឹងភាពតានតឹងយ៉ាងខ្លាំង ចាប់តាំងពីមានការប៉ុនប៉ងធ្វើរដ្ឋប្រហារទម្លាក់លោកប្រធានាធិបតីអ៊ែរដូហ្កាន់ កាលពីខែកក្កដាកន្លងទៅ ដោយរដ្ឋាភិបាលតួកគីចោទប្រកាន់ថាអ្នកនៅពីក្រោយការប៉ុនប៉ងធ្វើរដ្ឋប្រហារនេះ គឺមេដឹកនាំប្រឆាំងដ៏ធំមួយរូប ដែលកំពុងរស់នៅនិរទេសខ្លួនក្នុងទឹកដីអាមេរិក។ តួកគីបង្ហាញនូវការមិនសប្បាយចិត្តក្រោយពីអាមេរិកបដិសេធមិនធ្វើបត្យាប័នមេដឹកនាំប្រឆាំងរូបនេះ ចំណែកឯអាមេរិកវិញ រិះគន់តួកគីថា យកលេសរដ្ឋប្រហារនេះ ទៅធ្វើការបង្ក្រាបដោយខុសច្បាប់លើអ្នកដែលមាននិន្នានការប្រឆាំងនឹងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ