រដ្ឋាភិបាលលុបចោលភាពអាសន្ននៅបាងកកក្រោយពីបាតុកម្មប្រឆាំងមានការថមថយ
រដ្ឋាភិបាលថៃបានប្រកាសឲ្យដឹង នៅថ្ងៃអង្គារនេះថា ខ្លួននឹងលុបចេញវិញភាពអាសន្ន ដែលត្រូវបានដាក់នៅក្នុងទីក្រុងបាងកក និងតំបន់ជុំវិញបាងកក ចាប់ពីថ្ងៃពុធស្អែកនេះទៅ។ ច្បាប់ប្រកាសអាសន្ន ដែលត្រូវបានដាក់តាំងពីជិតពីរខែមុន ដើម្បីទប់ទល់នឹងចលនាបាតុកម្មប្រឆាំងរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០១:៤២
ស្ថានភាពអាសន្ន នៅក្នុង និងជុំវិញទីក្រុងបាងកក នឹងត្រូវជំនួសមកវិញ ដោយច្បាប់ពិសេសមួយ ដែលមានឈ្មោះថា “ច្បាប់សន្តិសុខផ្ទៃក្នុង” ដែលត្រូវអនុវត្តចាប់ពីថ្ងៃពុធ រហូតដល់ថ្ងៃទី៣០ ខែមេសា។ នេះបើយោងតាមសេចក្តីប្រកាសរបស់ការិយាល័យលោកស្រីនាយករដ្ឋមន្រ្តីយីងឡាក់ នៅថ្ងៃអង្គារនេះ។
លោកស្រីយីងឡាក់ផ្ទាល់បានប្រាប់អ្នកសារព័ត៌មានថា ការដកច្បាប់ប្រកាសអាសន្ននេះ គឺធ្វើឡើង ដើម្បីស្តាទំនុកចិត្តក្នុងវិស័យសេដ្ឋកិច្ច និងជាពិសេស វិស័យទេសចរណ៍។
គួររំឭកឡើងវិញថា ច្បាប់ប្រកាសអាសន្នត្រូវបានរដ្ឋាភិបាលរបស់លោកស្រីយីងឡាក់ប្រកាសដាក់ នៅក្នុងទីក្រុងបាងកក និងតំបន់ជាយក្រុងបាងកក កាលពីថ្ងៃទី២២ មករា ក្រោយពីក្រុមប្រឆាំងបាននាំគ្នាចេញធ្វើបាតុកម្ម ក្នុងគោលដៅរំខានដល់ការបោះឆ្នោតជាតិ កាលពីថ្ងៃទី២ កុម្ភៈ។
ក៏ប៉ុន្តែ បើទោះជាមានច្បាប់ប្រកាសអាសន្ននេះក៏ដោយ ក៏ក្រុមបាតុករប្រឆាំង នៅតែអាចរំខានដល់ដំណើរការបោះឆ្នោត រហូតធ្វើឲ្យការិយាល័យបោះឆ្នោតជាច្រើនមិនអាចបើកទ្វារដំណើរការបាន។ ផ្ទុយទៅវិញ ច្បាប់ប្រកាសអាសន្ននេះបានបង្កឲ្យមានផលប៉ះពាល់យ៉ាងខ្លាំងដល់វិស័យទេសចរណ៍របស់ថៃ ព្រមទាំងបង្កឲ្យមានក្តីព្រួយបារម្ភ អំពីការធ្លាក់ចុះនៃវិនិយោគបរទេស ក្នុងប្រទេសថៃ។
ដោយហេតុនេះហើយទើបរដ្ឋាភិបាលសម្រេចដកច្បាប់នេះចេញវិញ នៅពេលនេះ។ ម្យ៉ាងទៀត គេសង្កេតឃើញថា ចំនួនបាតុករប្រឆាំងក៏បានធ្លាក់ចុះយ៉ាងខ្លាំងដែរ នៅក្នុងរយៈពេលប៉ុន្មានសប្តាហ៍ចុងក្រោយនេះ ដោយនាំគ្នាប្រមូលផ្តុំច្រើននៅតែមួយកន្លែងប៉ុណ្ណោះ គឺនៅក្នុងសួនមួយ នៅកណ្តាលក្រុងបាងកក។
កាលពីសប្តាហ៍មុន ធនាគារកណ្តាលថៃបានសម្រេចកាត់បន្ថយអត្រាការប្រាក់របស់ខ្លួនមកនៅត្រឹមតែ ២% ប៉ុណ្ណោះ ដែលជាអត្រាមួយទាបបំផុតមិនធ្លាប់មាន ក្នុងរយៈពេល ៣ឆ្នាំកន្លងទៅនេះ។ នេះគឺដោយសារតែធនាគារកណ្តាលថៃមានការបារម្ភថា វិបត្តិនយោបាយបច្ចុប្បន្ននេះអាចនឹងបង្កផលប៉ះពាល់ទៅដល់កំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ