គណបក្សភឿថៃបើកយុទ្ធនាការឃោសនាបោះឆ្នោត ឯក្រុមប្រឆាំងប្រកាសធ្វើបាតុកម្មបិទក្រុងបាងកក
គណបក្សភឿថៃរបស់លោកស្រីយីងឡាក់ចាប់ផ្តើមបើកយុទ្ធនាការឃោសនាបោះឆ្នោត នៅថ្ងៃសៅរ៍នេះ ក្នុងពេលដែលក្រុមប្រឆាំងប្រកាសត្រៀមធ្វើបាតុកម្មទ្រង់ទ្រាយធំ ដើម្បីបិទក្រុងបាងកកទាំងមូល ចាប់ពីថ្ងៃទី១៣មករាខាងមុខនេះតទៅ។ យុទ្ធនាការឃោសនាបោះឆ្នោតចាប់ផ្តើមដោយគ្មានគណបក្សប្រឆាំង ដែលប្រកាសធ្វើពហិការមិនចូលរួមក្នុងការបោះឆ្នោត ដែលគ្រោងធ្វើនៅថ្ងៃទី២ កុម្ភៈខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
គណបក្សភឿថៃរបស់លោកស្រីយីងឡាក់ ចាប់ផ្តើមយុទ្ធនាការឃោសនាបោះឆ្នោត ដោយរៀបចំមិទ្ទិញធំៗ នៅតាមតំបន់ជាយក្រុងបាងកក និងនៅបណ្តាខេត្តនៅប៉ែកខាងជើងប្រទេស ដែលជាមូលដ្ឋាននៃអ្នកគាំទ្រលោកអតីតនាយករដ្ឋមន្រ្តី ថាក់ស៊ីន ស៊ីណាវ៉ាត់។
ចំណែកគណបក្សប្រជាធិបតេយ្យ ដែលជាបក្សប្រឆាំង ហើយមិនដែលឈ្នះឆ្នោតម្តងសោះ នៅក្នុងរយៈពេលពីរទសវត្សរ៍កន្លងទៅនេះ បានប្រកាសធ្វើពហិការមិនចូលរួមក្នុងការបោះឆ្នោត ហើយបានចូលរួមគាំទ្របាតុកម្ម ដឹកនាំដោយអតីតឧបនាយករដ្ឋមន្រ្តី និងតំណាងរាស្រ្តប្រឆាំង គឺលោកស៊ូថេប ធឿកស៊ូបាន។
ក្រុមប្រឆាំងថៃគ្រោងនឹងធ្វើបាតុកម្ម និងការដង្ហែក្បួនមួយចំនួន ចាប់ពីថ្ងៃអាទិត្យស្អែកនេះទៅ ដើម្បីឈានទៅការធ្វើបាតុកម្មទ្រង់ទ្រាយធំ ក្នុងគោលដៅកាន់កាប់ក្រុងបាងកក និងបិទដំណើរការរបស់រដ្ឋាភិបាល ចាប់ពីថ្ងៃទី១៣ ខែមករា ខាងមុខនេះទៅ។ ក្រុមបាតុករប្រឆាំងថៃក៏បានព្រមានផងដែរថា ពួកគេនឹងអុកឡុករំខាន ដល់ដំណើរការបោះឆ្នោត ដែលគ្រោងធ្វើ នៅថ្ងៃទី២ កុម្ភៈខាងមុខនេះ។ ក៏ប៉ុន្តែ គណៈកម្មការបោះឆ្នោតថៃបានប្រកាស កាលពីថ្ងៃសុក្រម្សិលមិញថា ការបោះឆ្នោតនឹងត្រូវរៀបចំធ្វើទៅតាមការគ្រោងទុក។
នៅពេលនេះ គេឃើញថា ទីផ្សាមូលបត្រថៃ ព្រមទាំងលុយបាតរបស់ថៃបានធ្លាក់ថ្លៃយ៉ាងគំហុក ដោយសារតែអ្នកវិនិយោគកំពុងតែមានការបារម្ភខ្លាចវិបត្តិនយោបាយបច្ចុប្បន្នមានសភាពកាន់តែធ្ងន់ធ្ងរ បណ្តាលឲ្យប៉ះពាល់ទៅដល់វិស័យទេសចរណ៍ និងការវិនិយោគបរទេស។
គេនៅចាំបានថា កាលពីឆ្នាំ២០០៨ ព្រលានយន្តហោះអន្តរជាតិថៃទាំងពីរ នៅក្រុងបាងកក ត្រូវក្រុមអាវលឿងកាន់កាប់ នៅក្នុងបាតុកម្មប្រឆាំងនឹងរដ្ឋាភិបាលស្និទ្ធនឹងលោកថាក់ស៊ីន។
រហូតមកទល់នឹងថ្ងៃសៅរ៍នេះ គេឃើញមានរដ្ឋាភិបាលនៃបណ្តាប្រទេសមួយចំនួន បានចេញសេចក្តីជូនដំណឹងឲ្យប្រជាពលរដ្ឋរបស់ខ្លួនចៀសវាងកុំឲ្យទៅជិតទីកន្លែងដែលមានបាតុកម្ម ដោយបារម្ភខ្លាចមានអំពើហិង្សាផ្ទុះឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ