គម្រោងកំណែទម្រង់ថ្មីរបស់រដ្ឋាភិបាលថៃមិនអាចបញ្ចុះបញ្ចូលក្រុមប្រឆាំងបាន
លោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់ បានបង្ហាញផែនការថ្មី នៅថ្ងៃពុធនេះ បង្កើតក្រុមប្រឹក្សាឯករាជ្យមួយ ទទួលបន្ទុកត្រួតពិនិត្យកំណែទម្រង់។ ថ្វីបើមានទម្រង់ប្រហាក់ប្រហែលនឹង “ក្រុមប្រឹក្សាប្រជាជន” ទាមទារដោយក្រុមប្រឆឆាំងក៏ដោយ ក៏ក្រុមនេះមិនព្រមទទួលយកសំណើរបស់រដ្ឋាភិបាលឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ក្រុមប្រឹក្សានេះ មិនមែនជាស្រមោល និងមិនស្ថិតក្រោមឥទ្ធិពល របស់រដ្ឋាភិបាលឡើយ ! នេះជាការអះអាងរបស់លោកស្រីយីងឡាក់ ស៊ីណាវ៉ាត់ តាមកញ្ចក់ទូរទស្សន៍ ដើម្បីបង្ហាញពីគម្រោងបង្កើត ក្រុមប្រឹក្សាឯករាជ្យមួយ ទទួលបន្ទុកត្រួតពិនិត្យសិក្សាកំណែទម្រង់ប្រព័ន្ធនយោបាយជាតិ។ មានសមាជិក៤៩៩នាក់ ជ្រើសរើសចេញពីចំណោមបណ្តាជនថៃ២ពាន់នាក់ ពីគ្រប់ស្រទាប់វណ្ណៈ គម្រោងនេះនឹងចេញជារូបរាងមានដំណើរការ ក្រោយការបោះឆ្នោត ហើយរដ្ឋាភិបាលគ្មានតួនាទីចូលលូកលំទេ។
ទម្រង់នៃក្រុមប្រឹក្សានេះ មានលក្ខណៈដូចគ្នានឹង “ក្រុមប្រឹក្សាប្រជាជន” ទាមទារដោយប្រមុខបក្សប្រឆាំង ដើម្បីមកជំនួសរដ្ឋាភិបាល ប៉ុន្តែបើពិនិត្យឱ្យល្អិតល្អន់ ទើបឃើញមានភាពខុសគ្នា គឺក្នុងគម្រោងរបស់លោកស្រីយីងឡាក់ ក្រុមប្រឹក្សាឯករាជ្យនេះ ត្រូវមានដំណើរការទន្ទឹមនឹងរដ្ឋាភិបាល។
ការប្រកាសបង្កើតក្រុមប្រឹក្សា ក្រោយពីមានចលនាបាតុកម្មប្រឆាំងរដ្ឋាភិបាលអស់ជាច្រើនសប្តាហ៍នេះ មិនត្រូវបាន ក្រុមប្រឆាំងទទួលយកទេ ដោយសំអាងថា លោកថាក់ស៊ីន អាចនឹងបុកបញ្ចូលកម្លាំងរបស់ខ្លួនចូលមកធ្វើជាសមាជិក ហើយក្រុមប្រឹក្សាឯករាជ្យនេះ នឹងបំរើប្រយោជន៍ត្រកូលថាក់ស៊ីន មិនមែនប្រយោជន៍ប្រជាជនថៃទូទៅ។
លោកថាក់ស៊ីន ជាបងប្រុសនាយករដ្ឋមន្ត្រីបច្ចុប្បន្ន កំពុងរស់នៅនិរទេសខ្លួន ក្នុងក្រុងឌូបៃ ត្រូវបានបក្សប្រឆាំងចោទប្រកាន់ជាអ្នកនៅពីក្រោយខ្នងលោកស្រីយីងឡាក់ ចាំញាក់ការដឹកនាំប្រទេស។ ក្រុមប្រឆាំងនេះបានសុខចិត្តស្ថិតក្រោមការដឹកនាំរបស់ លោកស្រីយីងឡាក់បានពីរឆ្នាំ មុននឹងងើបប្រឆាំងឡើយវិញ នៅពេលឃើញរដ្ឋាភិបាលចង់អនុម័តច្បាប់លើកលែងទោស។
មុននឹងឈានដល់ការប្រកាសបង្កើតក្រុមប្រឹក្សាឯករាជ្យ លោកស្រីយីងឡាក់ បានសម្រេចរៀបចំការបោះឆ្នោតសភាមុនអាណត្តិ ដើម្បីពន្លត់កំហឹងតាមផ្លូវ ប៉ុន្តែចលនាបាតុកម្មប្រឆាំងនៅអូសបន្លាយ និងគ្រោងធ្វើពហិការមិនចូលរួមបោះឆ្នោត នៅថ្ងៃទី២កុម្ភៈ២០១៤ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ