ថៃ៖ រដ្ឋាភិបាលថ្មីលោកស្រីយីងឡាក់ក្នុងស្ថានភាព«ទឹកលើស្លឹកឈូក»
ចុះផ្សាយនៅថ្ងៃ៖
ស្តាប់ - ០៤:២២
សភាថ្មីថៃ ដែលបានកើតចេញជារូបរាង កាលពីថ្ងៃអង្គារម្សិលមិញ បានបើកផ្លូវឲ្យរដ្ឋាភិបាលថ្មីរបស់លោកស្រីយីងឡាក់ ស៊ីណាវ៉ាត្រា ចាប់កំណើតផងដែរ ក្នុងពេលប៉ុន្មានថ្ងៃខាងមុខ។មានន័យថា សម័យកាលអ្នកនយោបាយត្រកូលស៊ីណាវ៉ាត្រាបានចាប់កំណើតឡើងវិញ បន្ទាប់ពីត្រូវបានគេផ្តួលរំលំអស់រយៈពេល៥ឆ្នាំមក។ ប៉ុន្តែ ក្រុមអ្នកវិភាគមើលឃើញថា រដ្ឋាភិបាលថ្មីរបស់លោកស្រីយីងឡាក់ស្ថិតក្នុងស្ថានភាពផុយស្រួយក្រោមក្រសែភ្នែកដ៏មានអំណាចរបស់ក្រុមយោធា។
គណបក្សភឿថៃបានបោះជំហានដ៏សំខាន់មួយទៀតនៅក្នុងសប្តាហ៍នេះ។ រចនាសម្ព័ន្ធរដ្ឋសភាថ្មីក្រោយការបោះឆ្នោតបានលេចចេញជារូបរាងហើយ។ ប្រធានសភាមួយរូប និងអនុប្រធានពីររូបត្រូវបានសភាពេញអង្គបោះឆ្នោតគាំទ្រកាលពីថ្ងៃអង្គារ។ ការចាប់កំណើតនៃរដ្ឋសភាថ្មីនេះជាការបើកផ្លូវឆ្ពោះទៅការបង្កើតរដ្ឋាភិបាលថ្មីក្នុងពេលដ៏ខ្លីខាងមុខ។
ក្រោយការតែងតាំងជាផ្លូវការពីព្រះមហាក្សត្រ រដ្ឋសភាត្រូវគេរំពឹងថានឹងតែងតាំងនាយករដ្ឋមន្ត្រី និងគណៈរដ្ឋមន្ត្រីថ្មី នៅចុងសប្តាហ៍នេះ។ លោកស្រី យីងឡាក់ ស៊ីណាវ៉ាត្រា កំពុងត្រៀមខ្លួនជាស្រេចដោយគ្មានការសង្ស័យ ដើម្បីឡើងទៅកាន់តំណែងនាយករដ្ឋមន្ត្រីស្ត្រីជាលើកដំបូងក្នុងប្រវត្តិសាស្ត្រប្រទេសថៃ។ ក៏ប៉ុន្តែ «រាត្រីទឹកឃ្មុំ» របស់លោកស្រីយីងឡាក់ប្រហែលជាមានរយៈពេលមិនវែងឡើយ។ នេះបើតាមការព្យាកររបស់ក្រុមអ្នកវិភាគព្រឹត្តិការណ៍អាស៊ី។ បញ្ហាធំៗជាច្រើនកំពុងរង់ចាំលោកស្រីនៅពេលខាងមុខ។
មកដល់ចំណុចនេះ គេគួរក្រឡេកថយក្រោយបន្តិចទៅមើលអ្វីដែលជាបុព្វហេតុនាំឲ្យគណបក្សភឿថៃឈ្នះឆ្នោត។ បេក្ខភាពនាយករដ្ឋមន្ត្រីស្ត្រីរូបនេះបានសន្យាជាច្រើនជាមួយប្រជាពលរដ្ឋថៃ។ ការសន្យាដំឡើងប្រាក់ខែ ការដំឡើងថ្លៃកសិផលជូនកសិករ (ជាពិសេសគឺតម្លៃស្រូវ) ការសន្យាផ្តល់ម៉ាស៊ីនកុំព្យូទ័រជូនដល់និស្សិត ការសន្យាទប់មិនឲ្យតម្លៃម្ហូបអាហារ និងតម្លៃមធ្យោបាយធ្វើដំណើរឡើងថ្លៃជាដើម។ តើលោកស្រីយីងឡាក់អាចបំពេញតាមការសន្យាទាំងនេះបានដែរឬទេ? ធនាគារថៃមួយបានព្រមានទុកជាមុនថា ការដំឡើងប្រាក់ខែ ឬប្រាក់កម្រៃអប្បបរមាអាចធ្វើឲ្យមានអតិផរណា។
លើសពីនេះ តើលោកស្រីយីងឡាក់នឹងត្រូវដោះស្រាយយ៉ាងណា ដើម្បីបើកផ្លូវឲ្យបងប្រុសរបស់លោកស្រី គឺអតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា អាចវិលត្រឡប់ចូលស្រុកវិញ?នេះជាចំណុចរសើបបំផុតមួយ សម្រាប់ជីវិតនយោបាយរបស់លោកស្រី ពីព្រោះចូរកុំភ្លេចថា ក្រុមយោធាជាសត្រូវដល់ឆ្អឹងរបស់លោកថាក់ស៊ីន។ ដូច្នេះ ស្រួលមិនស្រួល បញ្ហានេះអាចក្លាយជាលេសមួយក្នុងការធ្វើរដ្ឋប្រហារទម្លាក់រដ្ឋាភិបាលលោកស្រីយីងឡាក់ ដូចអ្វីដែលបានកើតឡើងកាលពី៥ឆ្នាំមុន ចំពោះលោកថាក់ស៊ីនទៀតក៏មិនដឹង។
ចំណុចសំខាន់មួយទៀតដែលជាបន្ទុកធ្ងន់ធ្ងររបស់អ្នកនយោបាយត្រកូលស៊ីណាវ៉ាត្រា គឺសម្ពាធពីក្រុមអាវក្រហម ដែលគ្មានថ្ងៃបំភ្លេចឡើយនូវការទាមទាររកយុត្តិធម៌ចំពោះអំពើហិង្សា ដែលប្រព្រឹត្តដោយរដ្ឋាភិបាលលោកអាភីស៊ីត និងក្រុមយោធាទៅលើពួកបាតុករអាវក្រហម ដែលធ្វើឲ្យមនុស្សជិត១០០នាក់បានស្លាប់កាលពីឆ្នាំមុន។ នេះក៏ជាចំណុចរសើបមួយទៀត ដែលអាចបើកផ្លូវឲ្យមានរដ្ឋប្រហារយោធាដែរ ប្រសិនបើមេដឹកនាំយោធាណាម្នាក់ទទួលរងការចោទប្រកាន់នោះ។ ទាំងនេះនៅមិនទាន់រាប់បញ្ចូលដំណោះស្រាយបញ្ហាព្រំដែនព្រះវិហារជាមួយកម្ពុជាផងទេ។
រដ្ឋាភិបាលលោកអាភីស៊ីតបានទម្លាក់បញ្ហានេះឲ្យរដ្ឋាភិបាលភឿថៃជាអ្នកដោះស្រាយ នៅពេលដែលតុលាការអន្តរជាតិក្រុងឡាអេបញ្ជាឲ្យដកទ័ពចេញពីតំបន់ព្រះវិហារ។ មកដល់ចំណុចនេះ គេក៏មិនត្រូវភ្លេចទេថា លោកអាភីស៊ីតទំនងជានៅបន្តដឹកនាំគណបក្សប្រជាធិបតេយ្យបន្តទៀតក្នុងឋានៈជាបក្សប្រឆាំង។ ដូច្នេះ ការសម្របសម្រួលណាមួយ អំពីបញ្ហាព្រះវិហារប្រាកដជាត្រូវគណបក្សប្រជាធិបតេយ្យរុកកួនជាមិនខាន។ ម្យ៉ាងទៀត ក្រុមយោធាក៏មិនប្រាកដថាគោរពតាមរដ្ឋាភិបាលថ្មីដែរ អំពីរឿងព្រំដែន។ បញ្ហាចាក់ស្រេះទាំងនេះបានធ្វើឲ្យអនាគតរដ្ឋាភិបាលលោកស្រីយីងឡាក់មិនខុសអ្វីពីស្ថានភាពទឹកលើស្លឹកឈូកឡើយ។
សរុបមកវិញ មិនថាតែរដ្ឋាភិបាលលោកស្រីយីងឡាក់ទេ ប៉ុន្តែ នយោបាយប្រទេសថៃទាំងមូលពិតជាពិបាកនឹងកែប្រែណាស់ដរាបណាពួកយោធានៅតែមានអំណាចខ្លាំង ហើយដែលរដ្ឋាភិបាលមិនអាចគ្រប់គ្រងបាននោះ។ ទោះបីជាលោកស្រីយីងឡាក់ខិតខំបង្កើនភាពរឹងមាំនៃរដ្ឋាភិបាលរបស់ខ្លួនតាមរយៈការធ្វើរដ្ឋាភិបាលចម្រុះជាមួយគណបក្សចំនួន៥ក៏ដោយ ក៏អំណាចពិតប្រាកដនៃប្រទេសថៃ គឺស្ថិតក្នុងកណ្តាប់ដៃក្រុមយោធាតែដដែល។ ស្ថានភាពនេះ បូកផ្សំជាមួយនឹងបញ្ហាចាក់ស្រេះដូចបានរៀបរាប់ខាងលើ វាប្រាកដណាស់ថា រដ្ឋាភិបាលលោកស្រីយីងឡាក់ងាយណាស់នឹងទទួលរងគ្រោះជាថ្មីពីអំណាចយោធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ