ក្រុមអាវក្រហមព្រមានថា នឹងមានសង្រ្គាមស៊ីវិលបើសិនរដ្ឋាភិបាលបច្ចុប្បន្នត្រូវផ្តួលរំលំ
ដូចការសន្យា ក្រុមអាវក្រហម ក្រុមគាំទ្ររដ្ឋាភិបាលថៃបច្ចុប្បន្នបានចុះថ្នល់ធ្វើបាតុកម្ម នៅទីក្រុងបាងកក កាលពីថ្ងៃសៅរ៍ ទី ១០ឧសភា។ មេដឹកនាំអាវក្រហម បានព្រមានដល់ក្រុមប្រឆាំងថា ព្រះរាជាណាចក្រថៃ នឹងអាចធ្លាក់ចុះ ទៅក្នុងសង្រ្គាមស៊ីវិល ប្រសិនបើរដ្ឋាភិបាលចាំផ្ទះរបស់បក្សភឿថៃត្រូវដួលរំលំទៀតនោះ។
ចុះផ្សាយនៅថ្ងៃ៖
ស្តាប់ - ០២:២១
បន្ទាប់ពីលោកស្រីយីងឡាក់ ស៊ីណាវ៉ាត និងរដ្ឋមន្រ្តី៩រូបត្រូវបានតុលាការធម្មនុញ្ញដកចេញពីតំណែង កាលពីថ្ងៃពុធ ក្រុមអាវក្រហមបានចុះថ្នល់ធ្វើបាតុកម្ម ដើម្បីការពាររដ្ឋាភិបាលដែលរងរបួសរបស់ខ្លួន នៅក្រោមការការពារសន្តិសុខពីប៉ូលិសជាង៣ពាន់នាក់។
សម្រាប់ក្រុមអាវក្រហម គេមិនអាចទទួលយកបានទេ រាល់ការបង្កើតរដ្ឋាភិបាល និងការតែងតាំងនាយករដ្ឋមន្រ្តីដែលផ្ទុយពីរដ្ឋធម្មនុញ្ញ និងលទ្ធិប្រជាធិបតេយ្យ។ មេដឹកនាំក្រុមអាវក្រហម លោកចាទុផន ព្រំផាន បានលើកឡើងដូច្នេះ បន្ទាប់ពីក្រុមប្រឆាំងរដ្ឋាភិបាល គឺក្រុមអាវលឿងបានប្រកាស ប៉ុនប៉ងបង្កើតរដ្ឋាភិបាលថ្មីដាច់ដោយឡែកមួយរបស់ខ្លួន។ កន្លងមក ក្រុមបាតុករអាវលឿងធ្លាប់បានប្រកាសឲ្យដឹងពីបំណងរបស់ខ្លួនក្នុង ការបង្កើតក្រុមប្រឹក្សាប្រជាជន មួយដោយគ្មានការបោះឆ្នោតសម្រាប់ ដឹកនំាប្រទេសថៃ។
ក្រុមអាវលឿងនៅតែប្រឆាំងមិនចង់ឲ្យមានការបោះឆ្នោត ដែលពួកគេវាយតម្លៃថា ត្រូវបានក្រុមបក្សពួករបស់លោកថាក់ស៊ីនធ្វើឲ្យពុករលួយ លែងដំណើរការប្រកបដោយយុត្តិធម៌ ដើម្បីជ្រើសរើសថ្នាក់ដឹកនាំរដ្ឋាភិបាលទៀតហើយ។ ទោះបីជាពួកគេបានសម្រេចក្នុងទាមទារឲ្យទម្លាក់លោកស្រីយីងឡាក់ ចេញពីតំណែងនាយករដ្ឋមន្រ្តី ក្រុមប្រឆាំងនៅតែបន្តធ្វើបាតុកម្ម ក្នុងបំណងពន្យារពេល មិនឲ្យមានការបោះឆ្នោត ដែលរដ្ឋាភិបាលបានកំណត់យកថ្ងៃទី ២០កក្កដាខាងមុខ។
តាមអ្នកវិភាគ ក្រុមអាវលឿង មិនចង់ឲ្យមានការបោះឆ្នោត ព្រោះពួកគេដឹងថា ពួកគេនឹងចាញ់ជាប្រាកដ នៅក្នុងការបោះឆ្នោត។ បក្សភឿថៃរបស់លោកថាក់ស៊ីននៅតែទទួលបានការគំាទ្រច្រើនពីប្រជាជននៅជនបទ។ ក្រុមអាវលឿងមានការគាំទ្រច្រើនពីក្រុមបញ្ញាវន្ត ទាហាន និងមន្រ្តីតុលាការ ជាពិសេស គ្រួសាររាជវង្ស ដែលពេលនេះកំពុងបារម្ភពីការបាត់បង់អំណាច ទល់នឹងការពង្រីកឥទ្ធិពល និងអំណាចរបស់គ្រួសារថាក់ស៊ីន និងបក្សពួកនយោបាយ។
ដោយគាំទ្រក្រុមបាតុករអាវលឿងឲ្យធ្វើព្យុះ ធ្វើភ្លៀង ប្រឆាំងរដ្ឋាភិបាល រាជវង្សថៃចង់ឆ្លៀតយកឱកាសអស្ថិរភាពនយោបាយលើកនេះ ដើម្បីកាត់បន្ថយឥទ្ធិពល និងលុបបំបាត់បក្សពួក ថាក់ស៊ីននិយមចេញពីឆាកនយោបាយថៃទាំងស្រុង។ ប៉ុន្តែ និន្នាការនេះត្រូវបានសហរដ្ឋអាមេរិក ដែលជាសម្ព័ន្ធមិត្តមួយរបស់ថៃ រិះគន់។ នៅសប្តាហ៍នេះ ទីក្រុងវ៉ាស៊ីនតោនដែលមានការព្រួយបារម្ភ ដោយសារវិបត្តិនយោបាយនៅថៃ បានជំរុញជាថ្មីទៀត ឲ្យប្រទេសថៃ ដែលមានអំណាចព្រះមហាក្សត្រអាស្រ័យរដ្ឋធម្មនុញ្ញ រៀបចំជាដាច់ខាតការបោះឆ្នោតជ្រើសរើសសមាជិកសភា។
គួររំលឹកថា ចាប់តាំងពីវិបត្តិនយោបាយដ៏រ៉ាំរ៉ៃអស់ជាច្រើនខែ រដ្ឋាភិបាលថៃ ដើរអូសជើង របស់ក្រុមលោកថាក់ស៊ីន បានដំណើរការដោយគ្មានសភា ដែលត្រូវលោកស្រីយីងឡាក់ ប្រកាសរំលាយចោល ដើម្បីសម្រាលវិបត្តិនយោបាយកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ