តុលាការកំពូលរបស់សាលាក្តីខ្មែរក្រហមសម្រេចដាក់លោកស្រី អៀង ធីរិទ្ធ ឲ្យស្ថិតក្រោមការត្រួតពិនិត្យតាមផ្លូវតុលាការ
អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា ឬតុលាការខ្មែរក្រហម បានចេញសេចក្តីសំរេចដាក់ជនជាប់ចោទ លោកស្រី អៀង ធីរិទ្ធ ឲ្យស្ថិតក្រោមការត្រួតពិនិត្យ តាមផ្លូវតុលាការ។ នេះបើតាមសេចក្តីប្រកាសព័ត៌មាន។
ចុះផ្សាយនៅថ្ងៃ៖
សេចក្តីប្រកាសព័ត៌មាន ចុះថ្ងៃទី១៧ ខែធ្នូ ឆ្នាំ២០១២ របស់តុលាការខ្មែរក្រហមបង្ហាញថា អង្គជំនុំជម្រះតុលាការកំពូលក៏បានបង្គាប់នូវរបបនៃការត្រួតពិនិត្យតាមផ្លូវតុលាការ លើជនជាប់ចោទ លោកស្រី អៀង ធីរិទ្ធ ដោយរួមបញ្ចូលទាំងការត្រួតពិនិត្យផ្នែកវេជ្ជសាស្ត្រជារៀងរាល់ប្រាំមួយខែម្តង និងការត្រួតពិនិត្យប្រចាំខែ ដោយនគរបាលយុត្តិធម៌ ដោយស្របទៅតាមសេចក្តីសម្រេចរបស់ខ្លួន ដែលបានចេញ នៅថ្ងៃទី១៤ ធ្នូកន្លងមក។
លោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចក្នុងរបបកម្ពុជាប្រជាធិបតេយ្យ ខ្មែរក្រហម ត្រូវបានរងនូវការចោទប្រកាន់ កាលពីខែកញ្ញា ឆ្នាំ២០១០ ពីបទឧក្រិដ្ឋកម្មប្រឆាំងមនុស្សជាតិ បទរំលោភដ៏ធ្ងន់ធ្ងរលើអនុសញ្ញាទីក្រុងហ្សឺណែវ ឆ្នាំ១៩៤៩ និងបទប្រល័យពូជសាសន៍។ ក៏ប៉ុន្តែដោយជនជាប់ចោទ លោកស្រី អៀង ធីរិទ្ធ ត្រូវបានរកឃើញថា ពុំមានសម្បទាគ្រប់គ្រាន់ក្នុងការចូលរួមសវនាការ ដោយសារមានជំងឺវង្វេងវង្វាន់ កាលពីខែវិច្ឆិកាឆ្នាំ២០១១ គឺលោកស្រី មិនត្រូវបានគេនាំមកកាន់ទោស ក្នុងសំណុំរឿង០០២ ដែលមានលោក អៀង សារី លោក ខៀវ សំផន និងលោក នួន ជា ឡើយ។
រហូតដល់ខែកញ្ញា ឆ្នាំ២០១២ នេះ លោកស្រី អៀង ធីរិទ្ធ ត្រូវបានគេដោះលែង ចេញពីមន្ទីរឃុំឃាំងរបស់តុលាការខ្មែរក្រហម តែដាក់ឲ្យលោកស្រី ស្ថិតក្រោមការត្រួតពិនិត្យរបស់តុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ