បារាំងអញ្ជើញលោកដូណាល់ត្រាំជាភ្ញៀវកិត្តិយសក្នុងពិធីបុណ្យជាតិ១៤កក្កដា
លោកដូណាល់ត្រាំនឹងធ្វើដំណើរទៅបារាំង ដើម្បីចូលរួមជាភ្ញៀវកិត្តិយសក្នុងពិធីបុណ្យជាតិបារាំង១៤កក្កដា។ នេះបើតាមការប្រកាសឲ្យដឹងដោយរដ្ឋាភិបាលបារាំង និងអាមេរិក នៅក្នុងសេចក្តីប្រកាសព័ត៌មានពីរផ្សេងគ្នា កាលពីថ្ងៃពុធម្សិលមិញ។ ដំណើរទស្សនកិច្ចរបស់លោកដូណាល់ត្រាំ គឺធ្វើឡើងទៅតាមការអញ្ជើញរបស់លោកអេម៉ានុយអែលម៉ាក្រុង ក៏ប៉ុន្តែ មានអ្នកនយោបាយបារាំងមួយចំនួនបានបង្ហាញការមិនសប្បាយចិត្ត ដោយមិនចង់ទទួលស្វាគមន៍លោកដូណាល់ត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
សហរដ្ឋអាមេរិកត្រូវបានបារាំងអញ្ជើញឲ្យចូលរួមជាភ្ញៀវកិត្តិយស ក្នុងពិធីព្យុហយាត្រាថ្ងៃបុណ្យជាតិ ១៤កក្កដាឆ្នាំនេះ ដោយសារតែវាត្រូវនឹងខួប ១០០ឆ្នាំ នៃការចូលរួមរបស់កងទ័ពអាមេរិក នៅក្នុងសង្រ្គាមលោកលើកទី១។
ការអញ្ជើញត្រូវបានធ្វើឡើង ដោយលោកអេម៉ានុយអែលម៉ាក្រុង នៅក្នុងអំឡុងជំនួបក្រៅកិច្ចប្រជុំអូតង់នៅទីក្រុងព្រុចស៊ែល កាលពីចុងខែឧសភាកន្លងទៅ ហើយលោកដូណាល់ត្រាំបានទទួលតាមការអញ្ជើញនេះ កាលពីថ្ងៃពុធ ក្រោយពីមានកិច្ចសន្ទនាតាមទូរស័ព្ទ ជាមួយលោកម៉ាក្រុង កាលពីថ្ងៃអង្គារ។
នៅក្នុងសេចក្តីប្រកាសព័ត៌មានកាលពីថ្ងៃពុធ ការិយាល័យប្រធានាធិបតីបារាំងបានឲ្យដឹងថា នៅក្នុងថ្ងៃបុណ្យជាតិ១៤កក្កដានេះ ក្រៅពីវត្តមានរបស់លោកដូណាល់ត្រាំនៅលើវេទិកាកិត្តិយស កងទ័ពអាមេរិកក៏នឹងចូលរួមផងដែរ នៅក្នុងការដើរព្យុហយាត្រាជាមួយកងទ័ពបារាំង។ ចំណែកសេតវិមានវិញបានឲ្យដឹងថា លោកដូណាល់ត្រាំមានក្តីរីករាយ និងទន្ទឹងរង់ចាំឱកាសចូលរួមក្នុងពិធីបុណ្យជាតិ១៤កក្កដានេះ ដើម្បីបញ្ជាក់ពីចំណងមិត្តភាពដ៏រឹងមាំ រវាងបារាំង និងសហរដ្ឋអាមេរិក។
ក៏ប៉ុន្តែ វត្តមានរបស់លោកដូណាល់ត្រាំនៅក្នុងពិធីបុណ្យជាតិបារាំងនេះធ្វើឲ្យអ្នកនយោបាយមួយចំនួនរបស់បារាំងមិនសប្បាយចិត្ត ជាពិសេស អ្នកនយោបាយមកពីគណបក្សឆ្វេងនិយម ដែលបានចាត់ទុកលោកដូណាល់ត្រាំថាជាអ្នកមានឥរិយាបថ “ហិង្សា” មិនស័ក្តិសមជាភ្ញៀវកិត្តិយសក្នុងពិធីបុណ្យជាតិ១៤កក្កដា ដែលជាបុណ្យអបអរសិទ្ធិសេរីភាពរបស់ប្រជាជានបារាំងនោះទេ។
គួររំឭកឡើងវិញថា គម្រោងទស្សនកិច្ចផ្លូវរដ្ឋរបស់លោកដូណាល់ត្រាំនៅអង់គ្លេស ក៏ធ្លាប់ទទួលរងនូវការប្រឆាំងផងដែរ ពីសំណាក់ប្រជាជនអង់គ្លេស កាលពីពេលកន្លងមក។ ចលនាប្រឆាំងដែលមានសន្ទុះយ៉ាងខ្លាំង រហូតធ្វើឲ្យអង់គ្លេស និងអាមេរិក គ្រោងនឹងលុបចោលដំណើរទស្សនកិច្ចនេះវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ