ករណីមេរោគអេបូឡាលេចឡើងជាថ្មីនៅអឺរ៉ុប
មេរោគអេបូឡាបានលេចឡើងជាថ្មីនៅអឺរ៉ុបកាលពីថ្ងៃចន្ទម្សិលមិញគឺនៅប្រទេសអង់គ្លេស។ គិលានុប្បដ្ឋាយិកាម្នាក់ដែលទើបវិលត្រឡប់មកពីប្រទេសអាហ្រ្វិកសេរ៉ាឡេអូនបានឆ្លងមេរោគអេបូឡាបន្ទាប់ពីគ្រូពេទ្យពិនិត្យអការៈរោគរួច។ អ្នកជម្ងឺត្រូវបានគេបញ្ជូនទៅកាន់មន្ទីរពេទ្យមួយនៅតំបន់ Glasgow ដើម្បីទទួលការព្យាបាលនៅដាច់ឆ្ងាយពីគេ។
ចុះផ្សាយនៅថ្ងៃ៖
ស្តាប់ - ០១:៥៩
គិលានុប្បដ្ឋាយិកាអង់គ្លេសម្នាក់ដែលទើបវិលត្រឡប់មកពីប្រទេសសេរ៉ាឡេអូន បានធ្វើដំណើរមកដល់តំបន់អេកូសហើយកាលពីយប់ថ្ងៃអាទិត្យមុន ។ ជាបន្ទាន់ភ្លាមនេះ គាត់ត្រូវបានគេដឹកចូលទៅកាន់មន្ទីរពេទ្យភ្លាមដែរកាលពីម្សិលមិញ ដោយសារគាត់មានអាការៈឈឺ។ អ្នកជម្ងឺនេះ ត្រូវបានគេដាក់នៅដាច់ឆ្ងាយពីគេដែរ។
យោងតាមអ្នកទទួលខុសត្រូវម្នាក់នៃប្រព័ន្ធសុខាភិបាលសាធារណៈនៅតំបន់ Glasgow -អ្នកជម្ងឺពុំទាន់មានអការៈរោគគួរឲ្យព្រួយបារម្មណ៍ទេនៅពេលនេះ។ មិនតែប៉ុណ្ណោះអាជ្ញាធរតំបន់ បានអះអាងប្រាប់ដែរថា ចាប់តាំងពីវិលត្រឡប់មកដល់ Glasgowវិញ អ្នកជម្ងឺ មានទំនាក់ទំនងជាមួយមនុស្សតែម្នាក់គត់។ ប៉ុន្តែដើម្បីបង្កាការពារទុកជាមុន អាជ្ញាធរGlasgow ខិតខំតាមស្វែងរក ការទាក់ទង ជាមួយបណ្តាអ្នកដំណើរទាំងអស់ដែលបានជិះយន្តហោះរួមជាមួយអ្នកជម្ងឺ។
រដ្ឋាភិបាលតំបន់អេកូសបានថ្លែងបញ្ជាក់ទៀតថា” គិលានុប្បដ្ឋាយិកាឆ្លងមេរោគអេបូឡា នឹងត្រូវដឹកបញ្ជូនទៅកាន់មន្ទីរពេទ្យេឯកទេសក៍មួយនៅឯទីក្រុងឡុងដ្រ៍ គឺនៅ Royal Free Hospital ឲ្យបានយ៉ាងឆាប់រហ័សបើសិនជាគេអាចធ្វើទៅបាន។
នៅ Royal Free Hospitalនេះហើយដែលគិលានុប្បដ្ឋាកស្ម័គ្រចិត្តមា្នក់សញ្ជាតិអង់គ្លេសធ្លាប់បានចូលព្យាបាលខ្លួនកាលពីប៉ុន្មានខែមុនបន្ទាប់ពីបានឆ្លងមេរោគអេបូឡានៅសេរ៉ាឡេអូន។
សូមបញ្ជាក់ថា អង់គ្លេសគឺជាប្រទេសមួយមានឆន្ទៈដ៏ស្រួចស្រាវ នៅក្នុងការប្រយុទ្ធប្រឆាំងទល់នឹងមេរោគអេបូឡានិងបានផ្តោតការយកចិត្តទុកដាក់ខ្លាំងទៅលើប្រទេសសេរ៉ាឡេអូន ដែលជាអតីតអាណានិគមរបស់អង់គ្លេស។
កាលពីខែតុលាមុន អង់គ្លេសបានបញ្ជូនកងទ័ពខ្លួនចំនួន ៧៥០នាក់ នាវាដឹកសម្ភារះពេទ្យសំរាប់ការព្យាបាលមួយគ្រឿង និងឧបត្ថម្ភភាគចក្រ៣គ្រឿងទៅកាន់សេរ៉ាឡេអូន ដែលនៅទីនោះ អង់គ្លេសបានសង់ មន្ទីរព្យាបាលរោគជាច្រើនកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ