ក្រុមប្រឹក្សាសន្តិសុខបើកកិច្ចប្រជុំបន្ទាន់ បន្ទាប់ពីអ៊ីស្រាអែលប្រកាសសង់លំនៅឋាននៅជេរូសាឡឹមខាងកើត
ចុះផ្សាយនៅថ្ងៃ៖
ស្តាប់ - ០៦:២៤
ក្រុមប្រឹក្សាសន្តិសុខរបស់អង្គការសហប្រជាជាតិត្រូវបើកកិច្ចប្រជុំបន្ទាន់មួយ នៅថ្ងៃពុធទី ២៩ តុលា នៅទីក្រុងញូវយ៉ក ដើម្បីនិយាយពីគម្រោងសាងសង់លំនៅឋាន ថ្មី នៅក្នុងអាណានិគមកិច្ចរបស់អ៊ីស្រាអែលនៅជេរូសាឡឹម ខាងកើត ទៅតាមបណ្តឹងរបស់អាជ្ញាធរប៉ាឡេស្ទីន។ កាលពីថ្ងៃចន្ទ រដ្ឋាភិបាលអ៊ីស្រាអែល បានប្រកាសបង្កើនសកម្មភាពសាងសង់លំនៅឋានថ្មីនៅជេរូសាឡឹមខាងកើត ដែលប៉ាឡេស្ទីនបានទាមទារជាទឹកដីរបស់ខ្លួន។ ការប្រកាសវិធានការថ្មីរបស់អ៊ីស្រាអែល កើតឡើង នៅចំពេលដែល អំពើហិង្សា ការប្រឈមមុខដាក់គ្នារវាងទាហានអ៊ីស្រាអែល និងយុវជនប៉ាឡេស្ទីន កំពុងផ្ទុះកើតមាន នៅជេរូសាឡឹម ខាងកើត។
ប្រទេសហ្សកដានីដែលជាសមាជិកមិនអចិន្ត្រៃយ៍ របស់ក្រុមប្រឹក្សាសន្តិសុខ បានគំាទ្របុព្វហេតុរបស់អាជ្ញាធរប៉ាឡេស្ទីន និងបាននាំបណ្តឹងរបស់ប៉ាឡេស្ទីនទៅ ក្រុមប្រឹក្សាសន្តិសុខ។
នៅក្នុងបណ្តឹងរបស់ខ្លួន អាជ្ញាធរប៉ាឡេស្ទីន បានទាមទារឲ្យអ៊ីស្រាអែល បញ្ឈប់ជាបន្ទាន់ គម្រោងសាងសង់លំនៅឋានថ្មីរបស់ខ្លួន នៅក្នុងទីក្រុងជេរូសាឡឹមខាងកើត និងសុំឲ្យអ៊ីស្រាអែលត្រលប់មកតុចរចាដែលអ៊ីស្រាអែលបានបោះបង់ចោល កាលពីខែមេសា។
កាលពីថ្ងៃចន្ទ អ៊ីស្រាអែលបានប្រកាសបង្កើនល្បឿនសាងសង់លំនៅឋានថ្មី ជាង១ពាន់ខ្នង នៅសង្កាត់ពីរ ក្នុងទីក្រុងជេរូសាឡឹមខាងកើត។ តាមប្រមុខដឹកនាំប៉ាឡេស្ទីន លោកម៉ាមូដ អាបាស តាមរយៈនយោបាយសាងសង់លំនៅឋានថ្មី នៅក្នុងទឹកដីកំពុងមានជម្លោះ អ៊ីស្រាអែលកំពុងញុះញង់ឲ្យមានអំពើហិង្សាផ្ទុះឡើង នៅជេរូសាឡឹមខាងកើត។
ជេរូសាឡឹមខាងកើតដែលអ៊ីស្រាអែលចូលកាន់កាប់ តាំងពីក្រោយសម័យសង្រ្គាម៦ថ្ងៃនៅឆ្នាំ ១៩៦៧ ត្រូវប៉ាឡេស្ទីនទាមទារយកទៅបង្កើតជារដ្ឋធានីរបស់ខ្លួន។ នៅមួយរយៈចុងក្រោយនេះ អាជ្ញាធរប៉ាឡេស្ទីនបានដើរនយោបាយការទូតយ៉ាងច្រើន នៅអង្គការសហប្រជាជាតិ ធ្វើយ៉ាងណា ជំរុញឲ្យក្រុមប្រឹក្សាសន្តិសុខចេញសេចក្តីសម្រេចមួយ ដើម្បី បិទបញ្ចប់ ឲ្យបាន រាល់អាណានិគមកិច្ចរបស់អ៊ីស្រាអែលនៅលើទឹកដីប៉ាឡេស្ទីន នៅឆ្នាំ ២០១៦។
តាមមន្រ្តីទូតម្នាក់នៅអង្គការសហប្រជាជាតិ គេមិនសូវជឿទុកចិត្តថា កិច្ចប្រជុំនៅក្រុមប្រឹក្សាសន្តិសុខនៅថ្ងៃពុធ នឹងអាចចេញជាសេចក្តីសម្រេចថ្កោលទោសទៅលើអ៊ីស្រាអែលទេ។ ប៉ុន្តែ ភាគីប៉ាឡេស្ទីនសង្ឃឹមថា យ៉ាងហោច សកម្មភាពរំលោភច្បាប់របស់អ៊ីស្រាអែលនឹងត្រូវគេលើកឡើងនៅក្រុមប្រឹក្សាសន្តិសុខ ដើម្បីយ៉ាងហោច ដាក់គំនាបលើអ៊ីស្រាអែល។
សហភាពអឺរ៉ុប និងអាមេរិកធ្លាប់បានប្រកាស រិះគន់ខ្លាំងៗ ផែនការសាងសង់លំនៅឋានរបស់អ៊ីស្រាអែល នៅជេរូសាឡឹមខាងកើត ដែលអ៊ីស្រាអែលបានប្រកាសតាំងពីដើមខែតុលាម្ល៉េះ។ ទាំងសហភាពអឺរ៉ុប និងអាមេរិកដែលជាសម្ព័ន្ធមិត្តរបស់អ៊ីស្រាអែល បានថ្កោលទោស និងចាត់ទុកការសាងសង់លំនៅឋានរបស់អ៊ីស្រាអែលថា ជាសកម្មភាពខុសច្បាប់ អន្តរជាតិមួយយ៉ាងធ្ងន់ធ្ងរ ព្រោះវាធ្វើឡើង នៅលើដែនដីប៉ាឡេស្ទីន ដែលអ៊ីស្រាអែលបានរំលោភឈ្លានពានកាន់កាប់ដោយខុសច្បាប់។
អ៊ីស្រាអែលវិញ តាមរយៈនាយករដ្ឋមន្រ្តី បិនចាមីន នេតានីញ៉ាហ៊ូ បាននិយាយការពារគម្រោងសាងសង់លំនៅឋានថ្មី និងសន្យាធ្វើឲ្យបានសម្រេចការសាងសង់លំនៅឋានថ្មី នៅជេរូសាឡឹមខាងកើត។ ក្រោមហេតុផលថា អ៊ីស្រាអែលមានសិទ្ធិដូចជាប្រជាជនដទៃ ដើម្បីសាងសង់លំនៅឋានក្នុងទឹកដីរបស់ខ្លួន នាយករដ្ឋមន្រ្តីអ៊ីស្រាអែល បាននិយាយយោងដល់ប្រជាជនបារំាងដែលមានសិទ្ធិសាងសង់លំនៅឋាន នៅទីក្រុងប៉ារីស ប្រជាជនអង់គ្លេសអាចសាងសង់ផ្ទះរបស់ខ្លួននៅ ទីក្រុងឡុងដ៍។ ជេរូសាឡឹមខាងកើត ជាទឹកដីដែលអ៊ីស្រាអែលកាន់កាប់ ដូច្នេះ វាគ្មានរឿងអ្វីចម្លែក ដែលប្រជាជនអ៊ីស្រាអែលត្រូវសាងសង់លំនៅឋាននៅជេរូសាឡឹមខាងកើតនោះទេ។
អ៊ីស្រាអែលត្រូវបានថ្កោលទោសរាប់មិនអស់ ពីសហគមន៍អន្តរជាតិ ដោយសារតែនយោបាយពង្រីកដែនអាណានិគមកិច្ចរបស់ខ្លួន នៅលើទឹកដីប៉ាឡេស្ទីន។ ជាការពិតដែលសេចក្តីសម្រេចរាប់មិនអស់របស់ក្រុមប្រឹក្សាសន្តិសុខ ត្រូវបានបោះឆ្នោតអនុម័ត ដើម្បីដាក់គំនាបទៅលើអ៊ីស្រាអែល ឲ្យឈប់ឈ្លានពានទៅលើប៉ាឡេស្ទីន ប៉ុន្តែ សេចក្តីសម្រេចទាំងនោះ មិនបានធ្វើឲ្យអ៊ីស្រាអែលញញើត និងឈប់ធ្វើនយោបាយរំលោភបំពានទៅលើប្រជាជនប៉ាឡេស្ទីនទេ។ នោះដោយសារតែអ៊ីស្រាអែលធ្លាប់បានទទួលការគំាទ្រ ទាំងនយោបាយការទូត និងថវិកាពីទីក្រុងវ៉ាស៊ីនតោន ដែលជាសមាជិកអចិន្ត្រៃយ៍មួយរបស់ក្រុមប្រឹក្សាសន្តិសុខ។
ប៉ុន្តែនយោបាយផ្គើន កាន់តែច្រើន របស់អ៊ីស្រាអែល និងការរិះគន់នយោបាយរបស់សេតវិមាន ពីសំណាក់អ៊ីស្រាអែល បានធ្វើឲ្យអាមេរិកមិនពេញចិត្ត និងដកការទុកចិត្តពីអ៊ីស្រាអែល ក្នុងរយៈពេលប៉ុន្មានឆ្នាំចុងក្រោយនេះ។ ប្រទេសនៅអឺរ៉ុបខ្លះដែលជាដៃគូសេដ្ឋកិច្ចជាមួយអ៊ីស្រាអែលចាប់ផ្តើមដកខ្លួន លែងទិញផលិតផលរបស់ក្រុមហ៊ុនអ៊ីស្រាអែល ដែលបោះទីតាំងនៅលើទឹកដីជេរូសាឡឹម ខាងកើត ដែលអឺរ៉ុបចាត់ទុកជាទឹកដីបានមកពីការឈ្លានពានទៅលើប្រជាជនប៉ាឡេស្ទីន។
អាមេរិកផ្ទាល់ដែលជាសម្ព័ន្ធមិត្តធំជាងគេរបស់អ៊ីស្រាអែល ក៏មិនរារែកនឹងរិះគន់នយោបាយឯកតោភាគីរបស់អ៊ីស្រាអែលដែរ។ តាមទីក្រុងវ៉ាស៊ីនតោន ជាមួយនឹងនយោបាយផ្គើនសាងសង់លំនៅឋានថ្មី នៅក្នុងតំបន់អាណានិគមកិច្ចរបស់ខ្លួន អ៊ីស្រាអែលកំពុងធ្វើឲ្យការប៉ុនប៉ងរកសន្តិភាពនៅដើមបូព៌ា ពោល គឺនយោបាយទទួលស្គាល់រដ្ឋពីរ អ៊ីស្រាអែល និងប៉ាឡេស្ទីន នឹងត្រូវធ្លាក់ទឹក។ នៅក្នុងដំណើរការស្វែងរកសន្តិភាព នៅតំបន់ដើមបូព៌ា អាមេរិកដែលដើរតួជាអាជ្ញាកណ្តាល បាក់មុខមិនតិចទេ ព្រោះរហូតមកដល់ពេលនេះ ដោយសារតែនយោបាយចចេសរឹងរូស និងបែបញុះញង់របស់អ៊ីស្រាអែល ការចរចាស្វែងរកសន្តិភាព ដឹកនាំដោយអាមេរិកបានបរាជ័យ ធ្លាក់ទឹក កាលពីខែមេសាកន្លង។ អាមេរិកពេលនេះ កំពុងតាមមើលសកម្មភាពរបស់សហភាពអឺរ៉ុប ដែលពេលនេះ កំពុងធ្វើនយោបាយដាក់អ៊ីស្រាអែលឲ្យឯកោ។ គេអាចវាយតម្លៃថា ការប្រកាសចង់ទទួលស្គាល់រដ្ឋប៉ាឡេស្ទីន ពីសំណាក់សភា អង់គ្លេស និងរដ្ឋាភិបាលស៊ុយអែត កាលពីពេលថ្មីៗនេះ អាចនឹងធ្វើឲ្យអ៊ីស្រាអែល នៅឯកោ នៅលើឆាកអន្តរជាតិ។
តាមអ្នកនាំពាក្យរបស់សេតវិមាន បើទោះបីជាអាមេរិកត្រូវបន្តជួយ អ៊ីស្រាអែលដែលជាសម្ព័ន្ធ ដៃគូយុទ្ធសាស្រ្ត នៅដើមបូព៌ា ក៏ ប៉ុន្តែ អាមេរិកក៏នឹងត្រូវថ្លឹងថ្លែង មើលដែរ ថាអាមេរិកនឹងអាចជួយអ៊ីស្រាអែលបានដល់ពេលណា ដល់កម្រិតណា ជាពិសេស នៅពេលដែលអ៊ីស្រាអែល នៅតែផ្គើន ធ្វើមិនដឹង មិនលឺ នឹងការអំពាវនាវរបស់អាមេរិកសោះនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ