ប្រធានាធិបតីRaul Castroប្រកាសធ្វើកំណែទម្រង់នយោបាយ និងសេដ្ឋកិច្ចស៊ីជម្រៅ
នៅក្នុងថ្ងៃសៅរ៍ ទី ១៦ មេសា ២០១១ នៅថ្ងៃ បើកមហាសន្និបាតគណបក្សកុម្មុយនិស្តគុយបា ប្រធានាធិបតីRaul Castro ប្អូនប្រុសរបស់លោកFidel Castro បានស្នើឲ្យមានកំណែទម្រង់នយោបាយ ដែលមិនធ្លាប់មានក្នុងប្រវត្តិសាស្រ្តគុយបា ក្នុងរយៈពេល ជាង៥ទសវត្សរ៍នេះ។ លោក Raul Castroដែលបានទទួលតំណែងប្រធានាធិបតីបន្តពីលោកFidel Castro ជាបងប្រុស បានលើកឡើងពីការកំណត់អាណត្តិមេដឹកនាំ ត្រឹមពីរអាណត្តិ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ឈាង បុប្ផា
ថ្លែងទៅកាន់គណៈប្រតិភូចូលរួមក្នុងមហាសន្និបាត គណបក្សកុម្មុយនិស្តគុយបា ជាង ១០០០នាក់ នៅថ្ងៃម្សិលមិញ លោក Raul Castroបានទាញចំណាប់អារម្មណ៍ថា វាដល់ពេលហើយដែលថ្នាក់ដឹកនាំ គុយបាមានសិទ្ធិកាន់អំណាចត្រឹមពីរអាណត្តិ ហើយ មួយអាណត្តិៗ មានរយៈពេល តែ៥ឆ្នាំ ប៉ុណ្ណោះ។ បើតាមលោក Raul Castro វិធានការថ្មីនេះ ដែលគណបក្សនឹងបោះឆ្នោត សម្រេចនៅដើមខែមករា ឆ្នាំក្រោយ នឹងត្រូវអនុវត្តផងដែរ ទៅលើអំណាចប្រធានាធិបតីរបស់លោក។ Raul Castro បានឡើងកាន់តំណែងប្រធានាធិបតី នៅឆ្នាំ ២០០៦ ជំនួសបងប្រុសរបស់គាត់ គឺលោក Fidel Castro ដែលបានធ្លាក់ខ្លួនឈឺខ្លាំង។ ទាំងពីរនាក់បងប្អូននេះ បានដឹកនាំរបបសង្គមនិយមគុយបា អស់រយៈពេលសរុបជិត ៥២ ឆ្នាំ ដែលក្នុងនោះ លោក Fidel Castroកាច់ចង្កូតគុយបាតែម្នាក់ឯង រយៈពេល ៤៧ឆ្នាំ។
នៅក្នុងការថ្លែងសុន្ទរកថា ជាង ពីរម៉ោងកន្លះ លោក Raul Castro បញ្ជាក់ថា កំណែទម្រង់នយោបាយលើកនេះ ធ្វើឡើងដើម្បីធ្វើឲ្យជួរថ្នាក់ដឹកនាំគុយបាសំបូរទៅដោយមនុស្សជំនាន់ថ្មី ជាពិសេសគឺក្មេងៗគុយបាជំនាន់ក្រោយ ព្រោះថា រហូតមកដល់ពេលនេះ គុយបានៅតែដឹកនាំដោយមនុស្សចាស់ភាគច្រើន។ លោក Raul Castro ខ្លួនឯងមានអាយុ ៧៩ឆ្នាំ ជិតឈានចូលដល់៨០ឆ្នាំ នៅខែឧសភាខាងមុខនេះ។
បងប្រុសរបស់គាត់ គឺលោក Fidel Castroកាន់អំណាចរហូតដល់អាយុ ៨០ឆ្នាំ។ នេះបើគាត់មិនធ្លាក់ខ្លួនឈឺទេ គាត់នៅតែមានសិទ្ធិដឹកនាំគុយបាបន្តទៅទៀត។ អាយុរបស់មន្រ្តីរបស់រដ្ឋាភិបាល និងសមាជិកមជ្ឈិមបក្សមានអាយុយ៉ាងតិច ៧០ឆ្នាំ។ ពួកគេទាំងនោះសុទ្ធតែ ជាអ្នកដែលបានចូលរួមតស៊ូបដិវត្តគុយបាជាមួយលោក Fidel Castro និងបានបង្កើតរបប Castroនៅគុយបានៅឆ្នាំ ១៩៥៩។
លោក Raul Castro ឆ្លៀតឱកាសយកមហាសន្និបាតលើកនេះដើម្បីនិយាយពីនយោបាយលើកទឹកចិត្តដល់ក្មេងជំនាន់ក្រោយឲ្យចូលកាន់នាទីសំខាន់ៗ ក្នុងស្ថាប័នរដ្ឋ។ ហើយលោកនៅបានបន្ថែមថា លទ្ធិសង្គមនិយម ដែលគុយបាយកមកអនុវត្ត ក្នុងរយៈពេល ៥ទសវត្សរ៍កន្លងមក គឺជាកំហុសឆ្គងមួយយ៉ាងធំ ហើយ ដែល សមាជិកបក្ស ត្រូវចូលរួមកែប្រែក្នុងមហាសន្និបាតលើកនេះ។ ប៉ុន្តែ លោក Raul Castro និយាយបែបសោកស្តាយថា បើទោះបីជារដ្ឋាភិបាលរបស់លោកបានខិតខំជម្រុញឲ្យមានយុវជនក្នុងជួរថ្នាក់ដឹកនាំ ប៉ុន្តែ រហូតមកដល់ពេលនេះ គេនៅតែមិនអាចរកយុវជនដែលមានសមត្ថភាពគ្រប់គ្រាន់ដើម្បីបន្តតំណែងពីមនុស្សចាស់បច្ចុប្បន្ន។
យុវជនដែលលោក Raul Castroបាននិយាយខាងលើ គឺត្រូវបានជ្រើសរើសចេញពីបក្ស។ និយាយជារួម លោក Raul Castro បាននិយាយត្រឹមតែពីកំណែទម្រង់ក្នុងរដ្ឋាភិបាល ប៉ុន្តែ មិនបាននិយាយដល់ការអនុញ្ញាតឲ្យមានគណបក្សប្រឆាំង ឬការរៀបចំការបោះឆ្នោតសេរីដើម្បីជ្រើសរើសថ្នាក់ដឹកនាំ គុយបានោះទេ។ មានមតិមួយចំនួនដែលថា រដ្ឋាភិបាលលោក Raul Castro លើកឡើងពីកំណែទម្រង់នយោបាយមិនធ្លាប់មាន លើកនេះ ដោយបានមើលឃើញបដិវត្តន៍នៅប្រទេសអារ៉ាប់។ ដូច្នេះ ការប្រកាសកំណត់ឲ្យប្រធានាធិបតីកាន់អំណាចតែ ២ ដង តែមិនរហូតមួយជីវិត អាចធ្វើឲ្យប្រជាជនមើលឃើញថា យ៉ាងហោចរដ្ឋាភិបាលកំពុងធ្វើការដើម្បីឈានទៅដល់ការផ្លាស់ប្តូរប្រព័ន្ធនយោបាយបច្ចុប្បន្ន។
លុបចោលរបបជំនួយរដ្ឋ Libreta
គុយបាក្រោមការដឹកនាំរបស់លោក Raul Castro បានចាប់ផ្តើមកំណែទម្រង់សេដ្ឋកិច្ចចាប់តាំងពីពាក់កណ្តាលឆ្នាំមុនម្ល៉េះ។ លោក Raul Castro ចង់បើកចំហទីផ្សារ ដោយប្តូរពីសេដ្ឋកិច្ចផែនការ ទៅជា សេដ្ឋកិច្ចទីផ្សារ។ គំរូសេដ្ឋកិច្ចថ្មី នឹងធ្វើឲ្យរដ្ឋលែងគ្រប់គ្រងសេដ្ឋកិច្ចជាតិតែឯង។ លោក Raul Castro បានផ្តល់ឥណទាន និងលើកទឹកចិត្តឲ្យប្រជាជនបង្កើតសហគ្រាសឯកជន និងកុំឲ្យសង្ឃឹមលើជំនួយរដ្ឋតទៅទៀត។ លោក Fidel Castro ផ្ទាល់ ក៏ធ្លាប់បានទទួលស្គាល់ថា របបសេដ្ឋកិច្ចគុយបាដើរតាមរបបសង្គមនិយមសូវៀត លែងដំណើរការទៀតហើយ។
នយោបាយថ្មីនេះអាចធ្វើឲ្យប្រជាជនគុយបាដែលជាអ្នកជំនួញ សប្បាយចិត្ត ព្រោះយ៉ាងហោចពួកគេអាចធ្វើការរកស៊ីប្រកួតប្រជែងដោយសេរី។ ប៉ុន្តែ ទោះយ៉ាងណា ការដកថយការទួលខុសត្រូវរបស់រដ្ឋក្នុងវិស័យសេដ្ឋកិច្ចប៉ះពាល់ជាពិសេសដល់ប្រជាជន ផ្សេងទៀត ជាពិសេសបុគ្គលិករដ្ឋ។ រដ្ឋាភិបាលគុយបាបានប្រកាសកាត់បន្ថយបុគ្គលិករដ្ឋជាង ៥សែននាក់។ បើទោះបីជារដ្ឋាភិបាលជម្រុញឲ្យបុគ្គលិករដ្ឋស្វែងរកការងារនៅតាមក្រុមហ៊ុនឯកជន។ ប៉ុន្តែ ក្រុមហ៊ុនថ្មី ក៏នៅមិនទាន់មានច្រើន សម្រាប់ស្រូបយកមនុស្សដែលកំពុងបាត់បង់ការងារដោយសាររដ្ឋាភិបាលដែរ។
ក្រៅតែពីការងារ ប្រជាជនគុយបា កំពុងបារម្ភ ពីគម្រោងបំបាត់ នយោបាយជំនួយសង្គម។ រដ្ឋាភិបាលមានបំណងលុបចោល Libreta ដែលប្រជាជនទាំងនេះ រស់អាស្រ័យជាង៥ទសវត្សរ៍មកហើយ។ Libretaនេះ គឺជាកូនសៀវភៅរាយមុខទំនិញ ដែលប្រជាជនមានសិទ្ធិទិញក្នុងតម្លៃថោក ពីសហករណ៍រដ្ឋ។ រដ្ឋបានផ្គត់ផ្គង់ទំនិញជាមូលដ្ឋានដល់ប្រជាជន ដោយសារតែប្រជាជនគុយបាទទួលប្រាក់ខែប្រមាណតែ ១៨ដុល្លារប៉ុណ្ណោះក្នុងមួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ