លោកអូបាម៉ា បន្ធូរការរឹតត្បិតមួយចំនួនថ្មីទៀតចំពោះប្រទេសគុយបា
តាំងពីឆ្នាំ១៩៦២ សេដ្ឋកិច្ចគុយបា ស្ថិតនៅក្រោមទណ្ឌកម្មសេដ្ឋកិច្ចរបស់សហរដ្ឋអាមេរិក។តែកាលពីថ្ងៃសុក្រមុននេះ លោកប្រធានាធិបតីអាមេរិក Barack Obama បានសំរេចចិត្ត បន្ធូរការរឹតត្បិតមួយចំនួនថ្មីទៀតដែលមានទៅលើ ទិដ្ឋាការ ការផ្ញើលុយនិងការធ្វើដំណើរទៅកាន់ប្រទេសគុយបា។ នៅក្នុងសេចក្តីជូនដំណឹងមួយរបស់សេតវិមាន ប្រធានាធិបតីអាមេរិក បានពន្យល់ថា វិធានការថ្មីនេះនឹងជួយដល់ប្រជាជនគុយបា ឲ្យចេញផុតពីនឹមរបស់អាជ្ញាធរកុម្មុយនិស្តគុយបា។
ចុះផ្សាយនៅថ្ងៃ៖
សេចក្តីរាយការណ៍របស់ នុយ ប៊ែរណាដែត
ដោយសារ វិធានការថ្មីមួយចំនួននេះ ប្រជាជនអាមេរិកាំង ដែលមានបំណងចង់ធ្វើដំណើរទៅកាន់ ប្រទេសគុយបា ដើម្បី ចូលរូមក្នុងព្រឹត្តិការណ៍សាសនា ការរួមប្រជុំ -ព្រឹត្តិការណ៍វប្បធម៌ ឬក៏កីឡានោះ ពួកគេអាចនឹងសម្រេចបានដោយងាយស្រួល។ ប៉ុន្តែ ពួកគេក៏នៅតែពុំមានលទ្ធភាពក្នុងការធ្វើដំណើរជាទេសចរទៅកាន់ប្រទេសគុយបា។
នៅក្នុងការផ្ញើប្រាក់ទៅកាន់គុយបា ប្រជាជនអាមេរិកាំងណាមួយ ក៏អាចនឹងផ្ញើប្រាក់បាន យ៉ាងតិចក៏ចំនួន៥០០ដុល្លារដែរក្នុងមួយត្រីមាស ដើម្បីជួយគាំទ្រដល់សហគ្រាសឯកជនតូចតាច។
ក៏ប៉ុន្តែ អ្នកដែលទទួលកម្រៃ គឺ ពុំមែនជាមន្ត្រីជាន់ខ្ពស់ ឬ ក៏ពុំមែនជាសមាជិកនៃគណបក្សកុម្មុយនិស្តគុយបា ដែលជាបក្សតែមួយគត់នៅក្នុងប្រទេស។ មកទល់ពេលនេះ គឺមានតែប្រជាជនគុយបាតែមួយគត់ ដែលមានលទ្ធភាពក្នុងការផ្ញើប្រាក់ទៅកាន់ប្រទេសគុយបា។
នៅទីបញ្ចប់ យន្តហោះ អាមេរិកទាំងអស់ អាចនឹងធ្វើការហោះហើរទៅកាន់ប្រទេសគុយបា លុះត្រាតែក្រុមហ៊ុនអាកាសចរណ៍នោះ មានការអនុញ្ញាតពីសំណាក់រដ្ឋាភិបាលអាមេរិកាំងជាមុនសិន។ រហូតមកទល់ពេលនេះ មានតែការហោះហើរចេញពី ទីក្រុង Miami, New Yorkនិង Los Angeles ប៉ុណ្ណោះ ឆ្ពោះទៅគុយបា។ វិធានការថ្មីមួយចំនួននេះ ជាវិធានការដែលមានកំរិតដូចគ្នា នៅពេលជិតផុតអាណត្តិរបស់លោកប្រធានាធិបតី Bill clintonនៅឆ្នាំ ២០០១។
គួរបញ្ជាក់ថា ការធ្វើដំណើរនិងការផ្ញើប្រាក់ ទៅកាន់គុយបាត្រូវបានគេរឹតត្បិតខ្លាំងណាស់នៅជំនាន់លោកប្រធានាធិបតី Georges W BUSH (2001-2009) ។
ក៏ប៉ុន្តែ នៅខែ មេសាឆ្នាំ ២០០៩ លោកប្រធានាធិបតី បារ៉ាកអូបាម៉ា បានសម្រេចចិត្ត ជាលើកទីមួយបន្ធូរបន្ថយការរឹតត្បិតស្របទៅតាមកាលៈទេសៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ