កុមារាម្នាក់ទៀត ឆ្លងជំងឺផ្តាសាយបក្សីស្ថិតក្នុងសភាពធ្ងន់ធ្ងរនៅឡើយ
កុមារាម្នាក់ អាយុ ៥ ឆ្នាំរស់នៅខេត្តកំពត ជាជនទី១០ បានឆ្លងជំងឺផ្តាសាយបក្សី។ មកដល់ថ្ងៃសុក្រនេះ កុមារារងគ្រោះ កំពុងសម្រាកព្យាបាលនៅមន្ទីរពេទ្យ គន្ធបុប្ផា ក្នុងទីក្រុងភ្នំពេញ បន្ទាប់ពីធ្លាក់ខ្លួនឈឺ អស់ពេល ២ សប្តាហ៍កន្លងមក។ លោកវេជ្ជបណ្ឌិត សុខ ទូច ប្រធាននាយកដ្ឋានប្រយុទ្ធនឹងជំងឺឆ្លង របស់ក្រសួងសុខាភិបាល បានឲ្យដឹងថា មកដល់រសៀលថ្ងៃសុក្រនេះ កុមារានោះ ស្ថិតក្នុងសភាពធ្ងន់ធ្ងរនៅឡើយ តែគ្រូពេទ្យ រកមិនទាន់ឃើញថា កុមារារងគ្រោះ ឆ្លងមេរោគផ្តាសាយបក្សី ប្រភេទថ្មី H7N9 ដែលកើតនៅប្រទេសចិននោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
កុមារា អាយុ ៥ ឆ្នាំ ម្នាក់ទៀត មកពីខេត្តកំពត គឺជាជនកម្ពុជាទី១០ ដែលឆ្លងជំងឺផ្តាសាយបក្សី H5N1 គិតចាប់ពីដើមឆ្នាំ២០១៣។ ជំងឺផ្តាសាយបក្សី បានសម្លាប់ពលរដ្ឋកម្ពុជា ៨ នាក់ ក្នុងរយៈពេល ៣ ខែ ដើមឆ្នាំនេះ។ ប៉ុន្តែគិតចាប់តាំងពីឆ្នាំ២០០៤ ជំងឺផ្តាសាយបក្សី បានសម្លាប់ពលរដ្ឋកម្ពុជា ២៧ នាក់ហើយ។
កុមាររងគ្រោះចុងក្រោយ មកពីខេត្តកំពត បានចូលសម្រាកព្យាបាលនៅមន្ទីរពេទ្យគន្ធបុប្ផា ក្នុងទីក្រុងភ្នំពេញ កាលពីថ្ងៃទី១មេសា ឆ្នាំ២០១៣ បន្ទាប់ពីធ្លាក់ខ្លួនឈឺ ជំងឺរលាកសួតធ្ងន់ធ្ងរ កាលពី ២ សប្តាហ៍មុន។
មកដល់រសៀលថ្ងៃសុក្រនេះ លោកវេជ្ជបណ្ឌិត សុខ ទូច ប្រធាននាយកដ្ឋានប្រយុទ្ធនឹងជំងឺឆ្លង របស់ក្រសួងសុខាភិបាល បានប្រាប់វិទ្យុបារាំងអន្តរជាតិថា កុមារារងគ្រោះ នៅមានសុខភាពធ្ងន់ធ្ងរ ស្ថិតក្រោមការតាមដានយ៉ាងយកចិត្តទុកដាក់ពីក្រុមគ្រូពេទ្យ។
យ៉ាងណាក៏ដោយ លោកវេជ្ជបណ្ឌិត សុខ ទូច បានបញ្ជាក់ថា ប្រភេទជំងឺផ្តាសាយបក្សីថ្មី H7N9 ដែលបានកើតឡើង នៅប្រទេសចិននោះ គឺមិនទាន់រកឃើញ នៅក្នុងប្រទេសកម្ពុជា នៅឡើយទេ។
ជំងឺផ្តាសាយបក្សីប្រភេទថ្មី H7N9 បានសម្លាប់ពលរដ្ឋចិន ៦ នាក់ គិតមកដល់ថ្ងៃសុក្រនេះ ក្នុងចំណោមអ្នកឆ្លង ចំនួន ១៤ នាក់។
យ៉ាងណាក៏ដោយ លោកវេជ្ជបណ្ឌិត សុខ ទូច បានបង្ហាញក្តីបារម្ភលើការឆ្លងរាលដាលជំងឺផ្តាសាយបក្សី ពីមនុស្សទៅមនុស្ស ហើយកម្ពុជា ស្ថិតក្នុងការប្រុងប្រៀបជានិច្ច ដើម្បីប្រឆាំងនឹងជំងឺ ដែលឆ្លងពីសត្វបក្សី ពិសេសមាន់ទា មកសម្លាប់មនុស្សនេះ។
លោកវេជ្ជបណ្ឌិត ក៏បានអំពាវនាវទៅកាន់ប្រជាពលរដ្ឋថា បើសិនជាមានជំងឺផ្លូវដង្ហើម ពិបាកដកដង្ហើម រលាកសួត ត្រូវប្រញាប់ នាំទៅកាន់មន្ទីរពេទ្យជាបន្ទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ