ចិនជួបគ្រុនផ្តាសាយបក្សី៤ករណីថ្មីទៀត
អាជ្ញាធរចិនបានប្រកាសនៅថ្ងៃអង្គារម្សិលមិញថា បានរកឃើញជំងឺគ្រុនផ្តាសាយបក្សី៤ករណីថ្មីទៀត ដែលបង្កដោយវីរុសH៧N៩ កើតទៅលើស្ត្រី៣នាក់ និងបុរសម្នាក់ នៅខេត្ត Jiangsu ស្ថិតនៅភាគខាងកើតប្រទេស។ នេះជាករណីគ្រុនផ្តាសាយបក្សីទី៧ហើយ ដែលចិនបានជួបប្រទះ។ ជំងឺនេះមិនបណ្តាលអោយមានការឆ្លងរវាងមនុស្សនិងមនុស្សឡើយ។ ប៉ុន្តែអាជ្ញាធរចិនបានរៀបចំអោយមានវិធានការការពារហ្មត់ចត់ នៅតាមបណ្តាក្រុងធំៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ក្នុងខេត្ត Jiangsu នៅភាគខាងកើតប្រទេសចិន មនុស្សបួននាក់បានឆ្លងជំងឺគ្រុនផ្តាសាយបក្សី ដែលបង្កដោយវីរុសH៧N៩ ជាវីរុសថ្មីមួយទើបបានកើតឡើងនៅសៀងហៃនាពេលថ្មីៗនេះ។ ក្នុងចំណោមជនរងគ្រោះ មានស្ត្រីបីនាក់ មានអាយុពី៣២ឆ្នាំ ទៅ៤៨ឆ្នាំ និងបុរសវ័យចំណាស់ម្នាក់អាយុ ៨៣ឆ្នាំ។
ក្នុងចំណោមអ្នកជំងឺទាំងបួនរូបនេះ មានតែស្ត្រីម្នាក់ប៉ុណ្ណោះដែលបានប៉ះពាល់ផ្ទាល់ជាមួយនឹងបក្សី ដោយសារតែគាត់ជាអ្នកប្រកបរបរកាប់មាន់ទា។ រីឯអ្នកជំងឺទាំងបីរូបទៀតមិនប្រកបការងារដែលធ្វើអោយពួកគេប៉ះពាល់មាន់ទាឡើយ។ រីឯ ស្ត្រីអ្នកជំងឺម្នាក់ទៀត ស្ថិតក្នុងស្ថានភាពធ្ងន់ធ្ងរ កំពុងព្យាបាលនៅមន្ទីរពេទ្យនៅឡើយ។
ទោះយ៉ាងណា យោងតាមមន្ទីរសុខភាព វីរុសនេះមិនបានបង្កអោយមានការឆ្លងរវាងមនុស្សនិងមនុស្សឡើយ ព្រោះអ្នកដែលនៅជិតស្និទ្ធជាមួយអ្នកជំងឺ មិនមានអាការៈគ្រុនរឺក៏ពិបាកដកដង្ហើមអ្វីឡើយ។
ថ្វីបើគ្មានការឆ្លងបែបនេះក្តី អាជ្ញាធរចិនបានរៀបចំអោយមានវិធានការការពារហ្មត់ចត់ នៅតាមបណ្តាក្រុងធំៗ។ ក្នុងខេត្ត Jiangsu មន្ទីរពេទ្យ១៦កន្លែង បានត្រៀមខ្លួនក្នុងករណីមានអ្នកជំងឺគ្រុនផ្តាសាយបក្សីថ្មីៗទៀត។
គេទទួលបានព័ត៌មានពីករណីគ្រុនផ្តាសាយបក្សីទាំងបួនថ្មីនេះ បានឆាប់រហ័សជាងករណីនៅក្រុងសៀងហៃ។ គួររំលឹកឡើងវិញថា វីរុសH៧N៩ ជាវីរុសដែលទើបកើតឡើងនៅសៀងហៃនាពេលថ្មីៗនេះ ហើយបានបណ្តាលអោយមនុស្សពីរនាក់បាត់បង់ជីវិត។
ប៉ុន្តែ គេទទួលបានព័ត៌មានយឺតយ៉ាវបំផុតលើករណីនៅសៀងហៃនេះ គឺនៅពេលបីសប្តាហ៍ក្រោយពេលដែលអ្នកជំងឺទីពីរទទួលមរណភាព ព្រោះថា ក្នុងកំឡុងពេលនោះ ក្រុមពេទ្យត្រូវការពេលវេលាផ្ទៀងផ្ទាត់អោយច្បាស់ពីលក្ខណៈជំងឺ ដើម្បីដាក់ឈ្មោះអោយដល់វីរុសថ្មីនេះ។
ដោយឡែកនៅពេលនេះ ក្រុងសៀងហៃបានប្រកាសស្ថានភាពអាសន្ននៃជំងឺដល់កម្រិតទីបី។ ហើយបានដាក់ដំណើរការមន្ទីរពេទ្យមួយកន្លែងសំរាប់ទទួលអ្នកជំងឺ។ នៅតាមសាលារៀន និងផ្ទះសំរាប់ជនចូលនិវត្តន៍នានា អាជ្ញាធរបានរៀបចំអោយមានការត្រួតពិនិត្យសីតុណ្ហភាពសិស្សានុសិស្ស និងមនុស្សចាស់។ នៅទីនោះ គេត្រូវតែរាយការណ៍ប្រាប់អាជ្ញាធរ ប្រសិនបើក្នុងមួយសប្តាហ៍ មានករណីគ្រុន ចាប់ពី៥ករណីឡើងទៅ។
ទោះយ៉ាងណា នៅមិនទាន់មានវ៉ាក់សាំងសំរាប់ចាក់ការពារវីរុសថ្មីនេះនៅឡើយទេ។ ដើម្បីចៀសវាងការឆ្លង អ្នកជំនាញនានា បានផ្តល់ដំបូន្មានអោយប្រជាជនឧស្សាហ៍លាងដៃ ហើយត្រូវចំអិនមាន់ទា និងស៊ុត អោយបានឆ្អិនល្អសិន មុននឹងបរិភោគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ