ការបារម្ភចំពោះសមត្ថភាពអាជ្ញាធរលីប៊ីក្នុងការរក្សាសុវត្ថិភាពនៅពេលបោះឆ្នោត
នៅថ្ងៃសៅរ៍ស្អែកនេះ លីប៊ីនឹងរៀបចំធ្វើការបោះឆ្នោត តាមបែបប្រជាធិបតេយ្យ ដើម្បីជ្រើសរើសតំណាងរាស្រ្ត នៅក្រោយការដួលរលំនៃរបបផ្តាច់ការ កាដាហ្វ៊ី។ ក៏ប៉ុន្តែ បញ្ហាសុវត្ថិភាពក្នុងពេលបោះឆ្នោត កំពុងតែជាក្តីបារម្ភដ៏ធំមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
នៅថ្ងៃស្អែក ពលរដ្ឋលីប៊ីនឹងអាចចេញទៅបោះឆ្នោត ជ្រើសរើសតំណាងរាស្រ្ត តាមលក្ខណៈប្រជាធិបតេយ្យ ជាលើកដំបូងបង្អស់ ក្រោយពីបានរស់នៅក្រោមរបបផ្តាច់ការរបស់គ្រួសារកាដាហ្វ៊ី អស់រយៈពេលជាង ៤០ឆ្នាំ។ ក៏ប៉ុន្តែ ក្រុមអ្នកសង្កេតការណ៍បាននាំគ្នាសម្តែងនូវការព្រួយបារម្ភ ដោយមិនដឹងជារដ្ឋាភិបាលបណ្តោះអាសន្នលីប៊ីមានសមត្ថភាពគ្រប់គ្រាន់ អាចរក្សាសុវត្ថិភាពនៅក្នុងពេលបោះឆ្នោតនេះបានដែរឬក៏យ៉ាងណា។
នៅក្នុងរយៈពេលប៉ុន្មានថ្ងៃកន្លងទៅនេះ គេសង្កេតឃើញមានអំពើហិង្សាជាច្រើនជុំវិញការបោះឆ្នោតនេះ ដូចជា ការវាយបំផ្លាញទីស្នាក់ការគណៈកម្មការរៀបចំការបោះឆ្នោត និងការដុតបំផ្លាញហិបឆ្នោត និងសន្លឹកឆ្នោត នៅប៉ែកខាងកើតប្រទេសលីប៊ី។
គួរបញ្ជាក់ថា ក្រុមសកម្មជននៅប៉ែកខាងកើតប្រទេសលីប៊ី បាននាំគ្នាតវ៉ាប្រឆាំងនឹងការបោះឆ្នោតនៅថ្ងៃស្អែកនេះ ដោយពួកគេទាមទារគ្រប់គ្រងតំបន់ប៉ែកខាងកើត ដោយស្វយ័ត ហើយឲ្យបង្កើតជារដ្ឋសហព័ន្ធនៅលីប៊ី។ អង្គការក្រៅរដ្ឋាភិបាលឈ្មោះ International Crisis Group បានលើកឡើងថា ក្រុមសកម្មជនទាមទារស្វយ័តភាពនេះ អាចនឹងនាំគ្នាចេញតវ៉ា ប្រដាប់ដោយអាវុធ ដើម្បីរំខានដំណើរការបោះឆ្នោត ជាពិសេស នៅប៉ែកខាងកើតប្រទេស។
ក្រៅពីនេះ គេសង្កេតឃើញជាទូទៅថា ចាប់តាំងពីរបបដឹកនាំលោកកាដាហ្វ៊ីត្រូវដួលរលំទៅ គេតែងតែឃើញមានការប៉ះទង្គិចរវាងក្រុមប្រដាប់អាវុធផ្សេងៗគ្នា ហើយអង្គការសិទ្ធិមនុស្ស Amnesty International បានព្រមានថា ក្រុមប្រដាប់អាវុធទាំងនេះ មិនមែនស្ថិតក្រោមអង្គការចាត់តាំង ឬក្រោមការគ្រប់គ្រងដឹកនាំរបស់អ្នកណាម្នាក់ទេ។ ដូច្នេះ ពួកគេគឺជាក្រុមប្រដាប់អាវុធអនាធិបតេយ្យ ដែលពិបាកនឹងគ្រប់គ្រង។
ទោះជាយ៉ាងណា រដ្ឋាភិបាលបណ្តោះអាសន្នលីប៊ីបានធានាថា គេបានដាក់ពង្រាយកម្លាំងរហូតដល់ទៅជាង ៥ម៉ឺននាក់ ដើម្បីធានាសុវត្ថិភាព ក្នុងពេលបោះឆ្នោតនេះ។ ការដឹកជញ្ជូនហិបឆ្នោត និងសន្លឹកឆ្នោត នឹងត្រូវធ្វើដោយកងទ័ព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ