ភារកិច្ចដ៏ធ្ងន់ធ្ងរនៅរង់ចាំលោក Abdel Rahim al-Kib នាយករដ្ឋមន្ត្រីលីប៊ីថ្មី
Abdel Rahim al-Kib គឺជាឈ្មោះរបស់លោកនាយករដ្ឋមន្ត្រីលីប៊ីថ្មី។ លោកបានទៅបំពេញការសិក្សានៅសហរដ្ឋអាមេរិក ហើយបន្ទាប់មកទៀតបានទៅធ្វើជាសាស្ត្រាចារ្យនៅប្រទេសនៃតំបន់ឈូងសមុទ្រពែស។ លោកបានត្រូវគេជ្រើសតែងតាំងជានាយករដ្ឋមន្ត្រីលីប៊ីថ្មីនៅថ្ងៃចន្ទទី៣១តុលាឆ្នាំ២០១១ក្នុងចំណោមបេក្ខជនទាំងអស់៥នាក់។ លោក Abdel Rahim al-Kib ជាអ្នកប្រឆាំងនឹងរបបគ្រប់គ្រងផ្តាច់ការរបស់កាដាហ្វ៊ី ហើយបានចូលមករួបរួមប្រយុទ្ធជាមួយពួកអ្នកបះបោរនៅទីក្រុងបេងហ្កាហ្ស៊ីនៅខែឧសភាកន្លងទៅនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
បណ្តុះបណ្តាលបង្កើតកងកម្លាំងទ័ពជាតិ ដកហូតអាវុធចេញពីយុទ្ធជន ទាំងនេះសុទ្ធសឹងជាសំណុំរឿងឬការដ្ឋានទីមួយដ៏សំខាន់នៅរង់ចាំលោក Abdel Rahim al-Kib នាយករដ្ឋមន្ត្រីលីប៊ីថ្មី ដើម្បីរក្សាសន្តិសុខជូនប្រទេសលីប៊ី។
សំណុំរឿងឬការដ្ឋានដ៏សំខាន់ដទៃទៀត មានដូចជា “ការគោរពសិទ្ធិមនុស្ស” ឬ “រក្សាឯកភាពជាតិ”ក៏ជាភារកិច្ចដ៏ធ្ងន់ធ្ងរនៅរង់ចាំលោក Abdel Rahim al-Kib នៅខណៈពេលដែលមានឆ្មាំបដិវត្តន៍លីប៊ីខ្លះបានត្រូវគេចោទថា បានប្រព្រឹត្តអំពើហិង្សាទៅលើប្រជាជនដែលឋិតនៅតំបន់វាលខ្សាច់សាហារ៉ាដែលគេតែងសន្និដ្ឋានថា ជាអ្នកស៊ីឈ្នួលធ្វើសង្គ្រាមបម្រើមូអាម៉ារកាដាហ្វ៊ី។
លោក Abdel Rahim al-Kib នាយករដ្ឋមន្ត្រីលីប៊ីថ្មីដឹងណាស់ថា លោកត្រូវកសាងស្ថាបនាឲ្យមានប្រជាជាតិលីប៊ីមួយថ្មីដែលចេះគោរពសិទ្ធិមនុស្ស ក៏ប៉ុន្តែលោកបានថ្លែងឲ្យដឹងទៀតថា ទាំងនេះត្រូវការពេលវេលា។
លោក Abdel Rahim al-Kib បានត្រូវគេមើលឃើញថា ជាមនុស្សម្នាក់ស្អាតស្អំត្រឹមត្រូវ ហើយជាអ្នកស្នេហាជាតិដ៏មោះមុត។ គុណសម្បត្តិទាំងនេះហើយដែលបាននាំឲ្យគេបោះឆ្នោតជ្រើសតាំងលោកធ្វើជានាយករដ្ឋមន្ត្រីនៃប្រទេសលីប៊ីថ្មី។
គួរបញ្ជាក់ថា ក្រៅពីការរៀបចំឲ្យមានលទ្ធិប្រជាធិបតេយ្យនៅប្រទេសលីប៊ីថ្មី គេត្រូវគិតគូរជាពិសេសដល់ការជំរុញឲ្យមានសន្ទុះកំណើនសេដ្ឋកិច្ច ជាពិសេសនៅក្នុងវិស័យប្រេងឥន្ធនៈដែលតំណាងដល់ទៅ៧០%នៃសេដ្ឋកិច្ចលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ