វ៉េណេស៊ុយអេឡា ប្រាប់កងទ័ពឲ្យត្រៀមខ្លួនប្រយុទ្ធទប់នឹងការវាយប្រហាររបស់អាមេរិក
នៅវ៉េណេស៊ុយអេឡា លោកប្រធានាធិបតី ម៉ាឌុយរ៉ូ បានស្នើឲ្យកងទ័ពត្រៀមខ្លួនប្រយុទ្ធទល់នឹងលោកប្រធានាធិបតីអាមេរិក ដូណាល់ ត្រាំ ដែលចង់វាយប្រហារវ៉ែឡេស៊ុយអេឡា។ ប្រតិកម្មរបស់លោកម៉ាឌូរ៉ូពេលនេះបានធ្វើឡើងបន្ទាប់ពីមានព័ត៌មានចុះផ្សាយដោយកាសែតនៅអាមេរិកថា លោកត្រាំមានគម្រោងវាយប្រហារវ៉េណេស៊ុយអេឡា តាំងពីរដូវក្តៅកន្លងទៅ។
ចុះផ្សាយនៅថ្ងៃ៖
ប្រធានាធិបតីវ៉េណេស៊ុយអេឡា បានស្នើឲ្យកងទ័ពឲ្យប្រុងប្រៀបខ្លួនជាស្រេច ហើយមិនត្រូវទម្លាក់ដៃសូម្បីតែមួយវិនាទីក៏ដោយ។ «យើងធ្វើនេះ គឺដើម្បីការពារសេរីភាពក្នុងការរស់នៅដោយសន្តិភាពរបស់ស្រុកទេសយើង»។ នេះជាការបញ្ជាក់របស់លោក នីកូឡា ម៉ាឌុយរ៉ូ នៅថ្ងៃពុធ ទី០៤កក្កដានេះ គឺក្រោយពីបានលេចឮដំណឹងថា លោកប្រធានាធិបតីអាមេរិកពិតជាមានចេតនាចង់វាយប្រហារវ៉េណេស៊ុយអេឡា។
ព័ត៌មានធ្លាយចេញពីកាសែត Association Press និងទូរទស្សន៍ CNN បានឲ្យដឹងថា កាលពីខែតុលាឆ្នាំ២០១៧ លោក ដូណាល់ ត្រាំ បានសាកសួរទីប្រឹក្សាការទូតរបស់គាត់ ចំពោះទណ្ឌកម្មដែលត្រូវដាក់លើវ៉េណេស៊ុយអេឡា និងចំពោះលទ្ធភាពនៃការធ្វើប្រតិបត្តិការយោធាចំពោះប្រទេសមួយនេះ។
សូមជ្រាបថា ក្រៅពីប្រាប់ឲ្យកងទ័ពប្រុងប្រៀបខ្លួន ប្រធានាធិបតីវ៉េណេស៊ុយអេឡា ក៏បានទម្លាក់កំហុសផងដែរចំពោះបក្សប្រឆាំងនៅវ៉េណេស៊ុយអេឡា ដែលចូលដៃជើងជាមួយអាមេរិក។ លោក នីកូឡា ម៉ាឌុយរ៉ូ បានចោទសួរដែរថា តើវាជាការចៃដន្យឬដែលអាមេរិកចង់វាយវ៉េណេស៊ុយអេឡា? លោកបានឆ្លើយដោយខ្លួនឯងថាមិនមែនជាចេះដន្យឡើយ ព្រោះថាការវាយប្រហារយោធានេះ គឺអាចនឹងឆ្មក់យកធនធានប្រេងរបស់វ៉េណេស៊ុយអេឡាផង។ លោក ម៉ាឌុយរ៉ូ ពន្យល់ថា អន្តរាគមន៍យោធា គឺពុំមែនជាដំណោះស្រាយសមស្របឡើយ ប៉ុន្តែទោះជាយ៉ាងណាក្តី កងទ័ពទាហានរបស់វ៉េណេស៊ុយអេឡា គឺត្រៀមខ្លួនដោយមានទំនួលខុសត្រូវដើម្បីការពារទឹកដីរបស់ខ្លួន។
ពីភាគីអាមេរិកវិញ មន្ត្រីជាន់ខ្ពស់ម្នាក់របស់សេតវិមានអាមេរិក បានបញ្ជាក់អ្នកកាសែតថា គ្មានប្រតិបត្តិយោធាណាមួយទេ ក្នុងរយៈដ៏ខ្លីខាងមុខនេះ ហើយនិងថា ការលើកឡើងរបស់វ៉េណេស៊ុយអេឡា គឺគ្រាន់តែជាការបំប៉ោងដើម្បីនយោបាយប្រជាភិថុតរបស់វ៉េណេស៊ុយអេឡាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ