លោកដូណាល់ត្រាំនិងនាយក FBI ប្រឈមមុខដាក់គ្នាជុំវិញការចេញផ្សាយរបាយការណ៍សម្ងាត់
ការប្រឈមមុខដាក់គ្នាត្រូវបានលាតត្រដាងជាសាធារណៈ ចាប់តាំងពីថ្ងៃពុធ រវាងលោកប្រធានាធិបតីដូណាល់ត្រាំ និងនាយកទីភ្នាក់ងារ FBI។ ដើមហេតុ គឺគម្រោងផ្សព្វផ្សាយជាសាធារណៈនូវរបាយការណ៍សម្ងាត់ ស្តីពីដំណើរការស៊ើបអង្កេតរបស់ FBI នៅក្នុងសំណុំរឿងពាក់ព័ន្ធនឹងរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
នាយក FBI ដែលចេញមុខប្រឆាំងនឹងលោកដូណាល់ត្រាំជាសាធារណៈនៅពេលនេះ គឺជានាយកថ្មី ដែលតែងតាំងដោយលោកដូណាល់ត្រាំខ្លួនឯងផ្ទាល់ ក្រោយពីបានដកតំណែងនាយកចាស់ សល់ពីសម័យកាលលោកអូបាម៉ា។
របាយការណ៍ដែលជាដើមហេតុនៃភាពចម្រូងចម្រាសនេះត្រូវបានរៀបចំតាក់តែងឡើងដោយ គណៈកម្មការសភាដឹកនាំដោយមនុស្សជំនិតរបស់លោកដូណាល់ត្រាំ នៅក្នុងគណបក្សសាធារណរដ្ឋ។ របាយការណ៍នេះត្រូវដាក់ជាការណ៍សម្ងាត់ ដោយសារតែវាមានមូលដ្ឋានចេញពីឯកសារសម្ងាត់របស់ FBI ហើយវាទាក់ទងនឹងដំណើរការស៊ើបអង្កេតរបស់ FBI ទៅលើការសង្ស័យពីការជាប់ពាក់ព័ន្ធ រវាងរុស្ស៊ី និងមន្រ្តីស្និទ្ធនឹងលោកដូណាល់ត្រាំ។
សមាជិកសភាមកពីគណបក្សសាធារណរដ្ឋបានអនុម័តឲ្យចេញផ្សាយរបាយការណ៍នេះជាសាធារណៈ ដោយអះអាងថា របាយការណ៍នេះបង្ហាញពីការរំលោភអំណាចរបស់ FBI នៅក្នុងការលួចស្តាប់កិច្ចសន្ទនារបស់មន្រ្តីស្និទ្ធិនឹងលោកដូណាល់ត្រាំ នៅក្នុងអំឡុងយុទ្ធនាការឃោសនាបោះឆ្នោតកាលពីឆ្នាំ២០១៦។ លោកដូណាល់ត្រាំ និងមន្រ្តីជំនិតរបស់លោក មើលឃើញថា នេះគឺជាការបង្ហាញឲ្យឃើញកាន់តែច្បាស់ ពីភាពលម្អៀងរបស់ FBI នៅក្នុងការស៊ើបអង្កេតលើសំណុំរឿងរុស្ស៊ី និងការឃុបឃិតគ្នា រវាងថ្នាក់ដឹកនាំ FBI ដើម្បីប្រឆាំងនឹងលោកដូណាល់ត្រាំ។
ហេតុដូច្នេះហើយបានជាលោកដូណាល់ត្រាំបានឲ្យដឹងថា លោកនឹងអនុញ្ញាតឲ្យចេញផ្សាយរបាយការណ៍សម្ងាត់នេះ ហើយការចេញផ្សាយអាចនឹងត្រូវធ្វើនៅថ្ងៃសុក្រនេះ។
សមាជិកសភាគណបក្សប្រជាធិបតេយ្យវិញបានរិះគន់ថា របាយការណ៍សម្ងាត់នេះត្រូវបានតាក់តែងឡើង ដោយច្បិចយកតែព័ត៌មានមួយជ្រុង ដើម្បីដាក់បន្ទុកលើ FBI នៅក្នុងគោលដៅតែមួយគត់ គឺជួយដល់លោកដូណាល់ត្រាំ ដែលកំពុងជាប់ពាក់ព័ន្ធក្នុងដំណើរការស៊ើបអង្កេតលើសំណុំរឿងរុស្ស៊ី។
ទីភ្នាក់ងារ FBI បានចេញសេចក្តីថ្លែងការណ៍ជាសាធារណៈកាលពីថ្ងៃពុធ បង្ហាញនូវក្តីព្រួយបារម្ភចំពោះការចេញផ្សាយរបាយការណ៍នេះ។ FBI បារម្ភថា របាយការណ៍នេះមិនមានតុល្យភាពដោយបង្ហាញតែជ្រុងម្ខាង ហើយកាន់តែបារម្ភទៅទៀត គឺខ្លាចមានការណ៍សម្ងាត់ត្រូវលេចធ្លាយជាសាធារណៈ។ លោក គ្រីស្តូហ្វ័រ វ្រេ (Christopher Wray) នាយកទីភ្នាក់ងារ FBI ក៏បានចេញមុខដោយផ្ទាល់ប្រឆាំងនឹងការចេញផ្សាយរបាយការណ៍នេះដែរ ដែលធ្វើឲ្យលោកត្រូវប្រឈមមុខដោយផ្ទាល់ជាមួយនឹងលោកដូណាល់ត្រាំ ដែលជាប្រធានាធិបតី ដែលជាអ្នកតែងតាំង ហើយក៏ជាអ្នកដែលមានសិទ្ធិអំណាចដកតំណែងលោកចេញវិញដែរ។ ក៏ប៉ុន្តែ បើតាមការផ្សាយរបស់ទូរទស្សន៍ CNN លោកគ្រីស្តូហ្វ័រ វ្រេ អាចនឹងលាឈប់ពីតំណែងដោយខ្លួនឯង ប្រសិនបើរបាយការណ៍សម្ងាត់ស្តីពី FBI នេះត្រូវចេញផ្សាយជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ