ហ្ស៊ីកាកំពុងជះស្រមោលស្រអាប់លើការប្រកួតកីឡាអូឡាំពិកពិភពលោកនៅប្រេស៊ីល
រដ្ឋបាលអាមេរិករបស់លោក បារ៉ាក់ អូបាម៉ា គ្រោងបញ្ចេញថវិកា ១៨០០លានដុល្លារ ដើម្បីប្រយុទ្ធប្រឆាំងនឹងវីរ៉ុសហ្ស៊ីកា។ ហើយក្នុងពេលជាមួយគ្នានេះដែរ គណៈកម្មាការអូឡាំពិកអាមេរិក បានប្រកាសអនុញ្ញាតឱ្យកីឡាករ កីឡារិនី និងសម្ព័ន្ធកីឡាបោះបង់បេក្ខភាពចេញទៅប្រកួតកីឡាអូឡាំពិកពិភពលោកនៅទីក្រុងរីយ៉ូ ប្រទេសប្រេស៊ីល នាខែមិថុនាខាងមុខ ប្រសិនបើពួកគេខ្លាចជំងឺហ្ស៊ីកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ប្រឈមមុខនឹងការរាតត្បាតដូចលាជផ្ទុះនៃវីរ៉ុសហ្ស៊ីកា រដ្ឋាភិបាលអាមេរិកបានប្រកាសបានស្នើសុំទៅកាន់សភាអាមេរិក ឱ្យបញ្ចេញថវិកា ១៨០០លានដុល្លារ ជាមូលនិធិបន្ទាន់ សម្រាប់យកទៅប្រើប្រាស់ក្នុងកិច្ចការពារ និងជាការប្រយុទ្ធប្រឆាំងនឹងវីរ៉ុសហ្ស៊ីកា។ នេះបើតាមសេចក្តីប្រកាសរបស់សេតវិមាននៅថ្ងៃចន្ទទី ៨កុម្ភ២០១៦។
ជាទូទៅ វីរ៉ុសហ្ស៊ីកា ត្រូវបានចម្លងតាមរយៈមូសខ្លាខាំនៅពេលជននោះធ្វើដំណើរទៅកាន់តំបន់អាមេរិកឡាទីន។ ប៉ុន្តែកាលពីសប្តាហ៍មុន អាជ្ញាធរសុខភាពអាមេរិកបានបញ្ជាក់រកឃើញជាលើកទីមួយ ករណីកើតហ្ស៊ីកាឆ្លងតាមរយៈការរួមភេទ។
ដូច្នេះក្តីព្រួយបារម្ភនឹងជំងឺហ្ស៊ីកាកាន់តែរីកធំធាត់ជាលំដាប់។ គឺទំនងក្នុងន័យនេះហើយ ទើបបានជាគណៈកម្មាធិការអូឡាំពិកអាមេរិក បានជូនដំណឹងទៅកាន់សហព័ន្ធកីឡា និងអត្តពលិករអាមេរិកទាំងអស់ ឱ្យធ្វើពិចារណានិងធ្វើសេចក្តីសម្រេចចិត្តឱ្យបានម៉ត់ហ្មត់ ថាគួរទៅឬមិនទៅចូលរួមប្រកួតកីឡាអូឡាំពិកពិភពលោកនៅទីក្រុងរីយ៉ូប្រទេសប្រេស៊ីល នាខែមិថុនាខាងមុខ។ សម្រាប់គណៈកម្មាធិការ ប្រសិនបើកីឡាករ កីឡាការិនី ឬអត្តពលិករណាមានការព្រួយបារម្ភ មិនទុកចិត្តនឹងជំងឺហ្ស៊ីកា មិនគួរធ្វើដំណើរទៅចូលរួមទេ។
នេះជាការសម្រេចចុងក្រោយនៅក្នុងជំនួបប្រជុំរបស់គណៈកម្មាធិការអូឡាំពិកអាមេរិក ក្រោយពីមានហេតុការណ៍ផ្ទុះជំងឺហ្ស៊ីកាកើតឡើងខ្លាំង ដែលបង្កការព្រួយបារម្ភយ៉ាងខ្លាំង ក្នុងរង្វង់កីឡាករកីឡាការិនីនិងជំនួយការមួយចំនួនធំ។ អាមេរិកកាលក្នុងសម័យកីឡាអូឡាំពិកក្រុងឡុងដ៏ឆ្នាំ២០១២ ជាម្ចាស់ពានរង្វាន់មេដាយមាសច្រើនជាងគេ។
សូមបញ្ជាក់ថា ការប្រកួតកីឡាអូឡាំពិកពិភពលោកនឹងត្រូវចាប់ផ្តើមនៅរវាងមិនដល់៥ខែទៀតទេ។ គណៈកម្មាធិការអូឡាំពិកអន្តរជាតិបានទទួលស្គាល់ថាមានការព្រួយបារម្ភយ៉ាងខ្លាំងដែរ តែសង្ឃឹមថាអាចលុបបំបាត់ការរាតត្បាតបាន ហើយមិនលុបចោលកម្មវិធីកីឡាថ្នាក់ពិភពលោកមួយនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ