អ.ស.ប.៖ការសន្យាមានច្រើន តែការអនុវត្តន៍ជាក់ស្តែងមានតិចតួច
នៅក្នុងជំនួបកំពូលរៀបចំដោយអាមេរិកកាលពីថ្ងៃទី២៨ កញ្ញា ឆ្នាំ ២០១៥ មានប្រទេសសមាជិកអង្គការសហប្រជាជាតិចំនួន ៤៦ប្រទេសបានសន្យាផ្តល់ឲ្យអង្គការពិភពលោកមួយនេះនូវកម្លាំងមួកខៀវ និងសម្ភារៈបន្ថែមសម្រាប់បេសកកម្មរក្សាសន្តិភាព។ តែជិត ៩ខែកន្លងទៅនេះ មានតែ ១៤ប្រទេសប៉ុណ្ណោះដែលបានគោរពពាក្យសន្យារបស់ខ្លួនតិច ឬច្រើន។ អាមេរិកក្នុងនាមជាប្រទេសដែលបានផ្តល់វិភាគទានឲ្យអង្គការសហប្រជាជាតិច្រើនជាងគេបានអំពាវនាវដល់ប្រទេសយឺតយ៉ាវឲ្យរួសរាន់គោរពពាក្យសន្យារបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
តាមគម្រោងដែលបានសន្យាកាលពីជិត ៩ខែកន្លងទៅ អង្គការសហប្រជាជាតិត្រូវទទួលបានកម្លំាងមួកខៀវបន្ថែមជាង ៤០ ០០០នាក់ រួមទាំងសម្ភារៈមួយចំនួនដូចយ៉ាងឧទ្ធម្ភាគចក្រ ឬការិយាល័យពេទ្យចល័តជាដើម។ ជំនួយបន្ថែមជាកម្លាំងមនុស្ស និងសម្ភារៈ គឺដើម្បីយកទៅពង្រឹងបេសកកម្មរក្សាសន្តិភាពចំនួន ១៦បេសកកម្មក្នុងលោក។ តែរហូតមកដល់ពេលនេះ ក្នុងចំណោមប្រទេសទាំង ៤៦ ដែលបានសន្យា មានប្រទេសខ្លះបានគោរពត្រឹមត្រូវតាមពាក្យសន្យារបស់ខ្លួន ប្រទេសខ្លះបានគោរពតិចតួច និងប្រទេសខ្លះទៀតនៅមិនទាន់បានគោរពសោះ ដូចជាអាស៊ែបៃហ្សង់ ប្រេស៊ីល ចិន កូឡុំប៊ី ហ្សកហ្ស៊ី ន័រវែស អេស្បាញ អ៊ូហ្កង់ដា ឬប្រទេសវៀតណាមជាដើម។
ជាក់ស្តែង ចិនបានសន្យាបញ្ជូនកម្លាំងទ័ពបន្ថែមយ៉ាងតិច ៨ ០០០នាក់ទៅឲ្យអង្គការសហប្រជាជាតិ តែអ្វីៗនៅមិនទាន់លេចរូបរាងនៅឡើយទេ ហើយមន្រ្តីការទូតបរទេសម្នាក់ថែមទាំងបានធ្លោយពាក្យថា ប្រហែលជាចិនមិនគោរពតាមពាក្យសន្យារបស់ខ្លួនផងក៏មិនដឹង។ ប្រទេសអេស្បាញបានសន្យាបញ្ជូនកម្លាំងទ័ព ឧទ្ធម្ភាគចក្រ និងសម្ភារៈផ្សេងៗទៀតទៅឲ្យកម្លាំងសហប្រជាជាតិក្នុងប្រទេសលីបង់ តែបានបដិសេធវិញដោយសារតែអង្គការសហប្រជាជាតិមិនយល់ព្រមឲ្យអេស្បាញកាន់បញ្ជាការរបស់កម្លាំងមួយនេះដូចដែលអេស្បាញបានទាមទារតាំងពីដំបូង។
យ៉ាងណាក៏ដោយ អង្គការសហប្រជាជាតិសង្ឃឹមថាជាមួយការផ្តល់ជំនួយបន្ថែមជាកម្លាំងមនុស្ស និងសម្ភារៈរបស់ប្រទេសសមាជិកនឹងអនុញ្ញាតឲ្យអង្គការសហប្រជាជាតិមានកម្លាំងរក្សាសន្តិភាពជាអចិន្រ្តៃយ៍ចំនួន ១៥ ០០០នាក់ពីពេលនេះដល់ដំណាច់ឆ្នាំដែលអាចចេញអន្តរាគមន៍បានភ្លាមៗ។ គួរជម្រាបជូនថា ថវិកាប្រចាំឆ្នាំរបស់កម្លាំងរក្សាសន្តិភាពរបស់អង្គការសហប្រជាជាតិមានប្រមាណជា ៨ ០០០លានដុល្លារ ក្នុងនោះ អាមេរិកតែឯងចេញចំនួន ៣០%។
អ៊ីចឹងហើយបានជាក្នុងនាមជាប្រទេសដែលបានផ្តល់វិភាគទានច្រើនជាងគេឲ្យកម្លាំងរក្សាសន្តិភាពរបស់អង្គការសហប្រជាជាតិ អាមេរិកបានជំរុញឲ្យប្រទេសដែលបានសន្យាផ្តល់កម្លាំងមនុស្ស និងសម្ភារៈបន្ថែមរួសរាន់ចាត់វិធានការជាក់ស្តែងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ