អង្គការសហប្រជាជាតិអនុម័តច្បាប់ប្រឆាំងហិង្សាលើស្ត្រីជាប្រវត្តិសាស្ត្រ
មហាសន្និបាតអង្គការសហប្រជាជាតិបានសំរេចអនុម័តច្បាប់ ប្រឆាំងនឹងអំពើហិង្សាលើស្ត្រីកាលពីថ្ងៃសុក្រកន្លងទៅ។ ទំរាំបានដល់ការសំរេចនេះ អ្នកចូលរួមក្នុងមហាសន្និបាត៦០០០ នាក់ បានជជែកគ្នាយ៉ាងតឹងសរសៃក អស់រយៈពេលពីរសប្តាហ៍មកហើយ។ គេសង្កេតឃើញថា ក្នុងការជជែកគ្នានេះ បុរីវ៉ាទីកង់ និងបណ្តាប្រទេសកាន់សាសនាអ៊ីស្លាម តែងតែជំទាស់នឹងបណ្តាបស្ចិមប្រទេស លើប្រធានបទស្តីពីការពន្យារកំណើត រឺក៏អំពើហិង្សានៅតាមផ្ទះជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៣
ការប្រកាសអនុម័តច្បាប់ប្រឆាំងហិង្សាលើស្ត្រី កាលពីថ្ងៃសុក្រ នៅក្នុងមហាសន្និបាតរបស់អង្គការសហប្រជាជាតិ ត្រូវបានទទួលការស្វាគមន៍យ៉ាងអធិកអធម ពីអ្នកចូលរួមប្រហែលជា ៦០០០នាក់។
ប៉ុន្តែអ្វីដែលគួរអោយកត់សំគាល់គឺថា មហាសន្និបាតបានប្រព្រិត្តិទៅអស់រយៈពេលរហូតដល់ទៅពីរសប្តាហ៍ ទំរាំតែឈានទៅដល់ការសំរេចអនុម័តច្បាប់នេះ គឺដោយសារតែប្រទេសសមាជិកអង្គការសហប្រជាជាតិ បានជជែកគ្នា យ៉ាងតឹងសរសៃក។
ប្រទេសជាច្រើន មើលទៅហាក់បានត្រឹមតែនិយាយថា ខ្លួនយល់ព្រមអនុម័តច្បាប់នេះ អោយរួចតែពីមាត់តែប៉ុណ្ណោះ។ រហូតដល់នាទីចុងក្រោយនៃមហាសន្និបាត ប្រទេសដែលកាន់សាសនាអ៊ីស្លាមដូចជា អ៊ីរ៉ង់ អារ៉ាប៊ី សាអ៊ូឌីត នីហ្សេរីយ៉ោ និងហុងឌុយរ៉ាស ព្រមទាំងបុរីវ៉ាទីកង់ដែលកាន់សាសនាកាតូលិកផងដែរនោះ បានព្យាយាមបញ្ចូលនូវវិសោធនកម្មរបស់ប្រទេសអេហ្ស៊ីប ដើម្បីធ្វើយ៉ាងណាកុំអោយអង្គការសហប្រជាជាតិសំរេចអនុវត្តនូវអ្វី ដែលផ្ទុយទៅនឹងច្បាប់ ទំនៀមទំលាប់ប្រពៃណី រឺក៏សាសនារបស់ប្រទេសណាមួយ។
ប៉ុន្តែ វិសោធនកម្មនេះ ត្រូវបានទាត់ចោលនៅក្នុងអង្គប្រជុំ។
អង្គប្រជុំក៏បានទាត់ចោលផងដែរ នូវគំរោងច្បាប់ទាក់ទងនឹងអ្នកស្រលាញ់ភេទដូចគ្នា ដែលដាក់ឡើងដោយបណ្តាបស្ចិមប្រទេស និងសហរដ្ឋអាមេរិក។ ដូច្នេះជាសេចក្តីសំរេច ច្បាប់ដែលត្រូវអនុម័តគឺផ្តោតសំខាន់ទៅលើការការពារស្ត្រី អោយចៀសផុតពីភាពរើសអើងនានា។
យោងតាមធនាគារពិភពលោក ស្ត្រីដែលមានអាយុពី ១៥ឆ្នាំ ទៅ ៤៤ឆ្នាំ ច្រើនតែបាត់បង់ជីវិតដោយសារការរំលោភបំពាន និងអំពើហិង្សានៅតាមគ្រួសារ ជាជាងដោយសារជំងឺមហារីក រឺក៏គ្រោះថ្នាក់ចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ