អាមេរិក៖លោក Rex Tillerson រងការរិះគន់ដោយមិនបានចេញមុខផ្សព្វផ្សាយរបាយការណ៍ស្តីពីសិទ្ធិមនុស្ស
នៅសហរដ្ឋអាមេរិក ក្រសួងការបរទេសតែងតែចេញផ្សាយរបាយការណ៍ប្រចាំឆ្នាំស្តីពីស្ថានភាពសិទ្ធិមនុស្សក្នុងលោក ហើយជាទូទៅ លោករដ្ឋមន្រ្តីការបរទេសបានធ្វើសន្និសីទកាសែតដើម្បីផ្សព្វផ្សាយរបាយការណ៍នោះជាសាធារណៈ។ តែសម្រាប់ការចេញផ្សាយរបាយការណ៍សិទ្ធិមនុស្សប្រចាំឆ្នាំ ២០១៦ លោករដ្ឋមន្រ្តីការបរទេសថ្មី Rex Tillerson មិនបានចេញមុខលើកយករបាយការណ៍នោះទៅបង្ហាញនៅមុខក្រុមអ្នកកាសែត និងនៅលើកញ្ចក់ទូរទស្សន៍ដូចដែលអតីតរដ្ឋមន្រ្តីធ្លាប់បានធ្វើនារយៈពេល ២៥ឆ្នាំកន្លងទៅឡើយ។
ចុះផ្សាយនៅថ្ងៃ៖
ស្តាប់ - ០២:០៩
ក៏ដូចជារៀងរាល់ឆ្នាំដែរ ក្រសួងការបរទេសអាមេរិកតែងតែបានចេញផ្សាយរបាយការណ៍ប្រចាំឆ្នាំដាច់ដោយឡែករបស់ខ្លួនស្តីពីស្ថានភាពសិទ្ធិមនុស្សនៅក្នុងប្រទេសនីមួយៗលើលោក។ នៅក្នុងរបាយការណ៍ប្រចាំឆ្នាំនោះ ក្រសួងការបរទេសបានចាប់អារម្មណ៍លើស្ថានភាពសិទ្ធិមនុស្សនៅក្នុង ១៩៩ប្រទេស តែក៏ដូចជាសព្វមួយដង អាមេរិកបានផ្តោតសំខាន់លើប្រទេសដែលស្ថិតក្នុងបញ្ជីខ្មៅរបស់ខ្លួន រួមមាន កូរ៉េខាងជើង ចិន រុស្ស៊ី អ៊ីរ៉ង់ ឬមួយប្រទេសគុយបាជាដើម។
បើគិតក្នុងរយៈពេល ២៥ឆ្នាំកន្លងទៅ លោករដ្ឋមន្រ្តីការបរទេសអាមេរិកផ្ទាល់ខ្លួនជាអ្នកដែលបានលើកយករបាយការណ៍ប្រចាំឆ្នាំស្តីពីសិទ្ធិមនុស្សក្នុងលោកទៅបង្ហាញជាសាធារណៈតាមរយៈការធ្វើសន្និសីទកាសែត ឬមួយក៏នៅលើកញ្ចក់ទូរទស្សន៍។ តែសម្រាប់របាយការណ៍ប្រចាំឆ្នាំ ២០១៦ កន្លងទៅ លោក Rex Tillerson ដែលជារដ្ឋមន្រ្តីការបរទេសថ្មីក្នុងជំនាន់លោកប្រធានាធិបតីដូណាល់ ត្រាំ និងជារដ្ឋមន្រ្តីដែលមិនសូវនិយាយជាសាធារណៈមិនបានយកគំរូតាមរដ្ឋមន្រ្តីការបរទេសមុនៗទេ។
លោក Rex tillerson បានត្រឹមថ្លែងយ៉ាងសាមញ្ញថា ការលើកកម្ពស់សិទ្ធិមនុស្ស និងអភិបាលកិច្ចប្រជាធិបតេយ្យ គឺជាមូលដ្ឋានគ្រឹះនៃនយោបាយការបរទេសអាមេរិក។ យ៉ាងណាក៏ដោយ កាយវិការរបស់លោក Rex Tillerson របៀបនេះបានទទួលការរិះគន់ទិតៀនយ៉ាងខ្លាំងពីក្រុមអ្នកសាធារណរដ្ឋ ក៏ដូចពីក្រុមអ្នកប្រជាធិបតេយ្យ ពិសេសពីក្រុមអង្គការអ្នកការពារសិទ្ធិមនុស្ស។ លោក Kenneth Roth ប្រធានអង្គការសិទ្ធិមនុស្ស Human Rights Watch បានចោទជាសំណួរថា តើការគេចវេសរបស់លោក Tillerson មិនមែនជាចេតនាគេចពីសំណួររបស់អ្នកកាសែតទាក់ទងនឹងលោកដូណាល់ ត្រាំទេឬយ៉ាងណា?។
គួររម្លឹកជូនថា របាយការណ៍ប្រចាំឆ្នាំ ២០១៦ របស់ក្រសួងការបរទេសអាមេរិកស្តីពីសិទ្ធិមនុស្សក្នុងលោកហាក់គ្មានជាប់ពាក់ព័ន្ធនឹងការងាររបស់រដ្ឋបាលលោកដូណាល់ ត្រាំទេ តែទាក់ទងនឹងការងារក្នុងជំនាន់រដ្ឋបាលរបស់អូបាម៉ា។ អ៊ីចឹងហើយបានជាមានសំណួរចោទឡើងថា ហេតុអ្វីដែលជាលោករដ្ឋមន្រ្តីការបរទេសថ្មី Rex Tillerson គេចមុខធ្វើអី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ