ទីភ្នាក់ងាររបស់ អ.ស.ប. ទទួលបន្ទុកជនភៀសខ្លួនប៉ាឡេស្ទីនទាញសញ្ញាអាសន្នពីកង្វះថវិកា
ប្រទេសហ្សកដានី តាមរយៈប្រមុខការទូតបានប្រកាសឲ្យដឹងនៅថ្ងៃព្រហស្បតិ៍ ទី៣០ សីហាថា ខ្លួននឹងរៀបចំសន្និសីទអន្តរជាតិមួយនាថ្ងៃទី២៧ កញ្ញាខាងមុខដើម្បីស្វែងរកថវិកាជួយទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនហៅកាត់ថា Unrwa។ តាមប្រមុខការទូតហ្សកដានី Unrwa នឹងអស់លុយនៅដំណាច់ខែកញ្ញាខាងមុខ ហើយត្រូវការលុយជាបន្ទាន់ចំនួន ២០០លានដុល្លារពីពេលនេះដល់ដំណាច់ឆ្នាំដើម្បីបំពេញការងាររបស់ខ្លួន។ ចំណែកនាយក Unrwa លោកព្ជែរ ក្រេអេនប៊ុលបានក៏បានទាញសញ្ញាអាសន្នពីកង្វះថវិកា និងបានប្តេជ្ញាចិត្តក្នុងការបន្តអាណត្តិរបស់ Unrwa ដែលប្រគល់ឲ្យដោយមហាសន្និបាតអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:២០
« យើងកំពុងនិយាយអំពីមនុស្ស ហើយខ្ញុំជឿជាក់ថា ពិតជាគ្មាននរណាម្នាក់មានបំណងបោះបង់ចោលជនភៀសខ្លួនប៉ាឡេស្ទីនទាំង ៥លាន ៣សែននាក់នោះទេ។ ពួកគេសុទ្ធសឹងជាមនុស្សដែលត្រូវមានសិទ្ធដូចមនុស្សដទៃទៀតក្នុងលោកអ៊ីចឹងដែរ។ អស់ជាច្រើនទសវត្សមកហើយដែលពួកគេកំពុងប្រឈមនឹងភាពអយុត្តិធម៌យ៉ាងខ្លាំង និងកំពុងស្ថិតក្នុងស្ថានភាពអស់សង្ឃឹម។
ចំណែកយើង យើងបានប្តេជ្ញាចិត្តនឹងបន្តអនុវត្តន៍អាណត្តិដែលមហាសន្និបាតអង្គការសហប្រជាជាតិបានប្រគល់ឲ្យ។ ដរាបណាដំណោះស្រាយមួយយុត្តិធម៌ និងយូរអង្វែងត្រូវបានរកឃើញសម្រាប់ជម្លោះអ៊ីស្រាអែល និងប៉ាឡេស្ទីនទេ យើងនឹងមិនបោះបង់អាណត្តិរបស់យើងចោលឡើយ។
យើងបានចាប់ផ្តើមការងាររបស់យើងក្នុងឆ្នាំនេះជាមួយនឹងការខ្វះខាតថវិកាចំនួន ៤៤៦លានដុល្លារ។ គឺជាស្ថានការណ៍ប្រកបដោយគ្រោះថ្នាក់ខ្លាំងណាស់សម្រាប់គ្រប់អង្គការមនុស្សធម៌ទាំងអស់ មិនថាតែទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនមួយប៉ុណ្ណោះទេ។
យើងរកបានថវិកាចំនួន ២៣៨លានដុល្លារហើយសម្រាប់ ៦ខែដើមឆ្នាំ ២០១៨។ ទឹកប្រាក់នេះបានអនុញ្ញាតឲ្យយើងចាប់ផ្តើមឆ្នាំសិក្សាទាន់ពេល »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ