លោកដូណាល់ ត្រាំ ចង់លុបសិទ្ធិបានសញ្ជាតិតាមដែនដីកំណើត
កើតនៅលើទឹកដីអាមេរិក មិនប្រាកដថានឹងអាចបានសញ្ជាតិអាមេរិកជាស្វ័យប្រវត្តិទៀតទេ ! លោកប្រធានាធិបតីអាមេរិក ដូណាល់ ត្រាំ គ្រោងនឹងចេញក្រិត្យលុបចោល សិទ្ធិទទួលបានសញ្ជាតិអាមេរិក របស់កូនជនបរទេស និងកូនអន្តោប្រវេសន៍ខុសច្បាប់ ដែលបានកើតនៅលើទឹកដីអាមេរិក ក្នុងពេលឆាប់ៗខាងមុខនេះហើយ។ នេះបើតាមវិបសៃត៍Axios on HBO ដែលលោកត្រាំបានផ្តល់បទសម្ភាសន៍ដោយផ្តាច់មុខ។
ចុះផ្សាយនៅថ្ងៃ៖ កែប្រែថ្ងៃទី៖
កូនរបស់បុគ្គលដែលមិនមែនជាជនជាតិអាមេរិក មិនអាចទទួលសញ្ជាតិអាមេរិក និងទាញយកផលប្រយោជន៍បានមួយជីវិត ដោយសារមូលហេតុម្យ៉ាងថាបានកើតនៅលើទឹកដីអាមេរិក ទៀតបានឡើយ ! នេះជាប្រសាសន៍របស់លោកប្រធានាធិបតី ដូណាល់ ត្រាំ នៅក្នុងបទសម្ភាសន៍ជាមួយអ្នកសារព័ត៌មានAxios on HBO ដោយអះអាងទៀត លោកបានពិភាក្សា ជាមួយទឹប្រឹក្សា រួចរាល់អស់ហើយ ហើយកំពុងរៀបចំដំណើរការ ចេញក្រិត្យប្រធានាធិបតី លុបសិទ្ធិទទួលសញ្ជាតិអាមេរិក តាមដែនដីកំណើត។
បើលោកត្រាំ សម្រេចយ៉ាងដូច្នេះ តើវានឹងផ្ទុយពីរដ្ឋធម្មនុញ្ញអាមេរិកមាត្រា១៤ ដែលចែងថា “គ្រប់បុគ្គលដែលបានកើតលើទឹកដីអាមេរិកនិងបានចូលសញ្ជាតិអាមេរិក និងដែលស្ថិតក្រោមយុត្តាធិការនៃច្បាប់ជាធរមាន ត្រូវបានក្លាយជាពលរដ្ឋរបស់អាមេរិក និងរបស់រដ្ឋដែលគេរស់នៅ”ទេឬ ?
សម្រាប់ក្រុមអ្នកអភិរក្សនិយម ជាង៤០ឆ្នាំកន្លងមកនេះ អាមេរិកបានអនុវត្តច្បាប់ដោយបកស្រាយខុសតែប៉ុណ្ណោះ។ តែបើតាមអត្ថន័យនៃច្បាប់ដើម ក្មេងកើតលើដីអាមេរិកដែលអាចទទួលសញ្ជាតិអាមេរិកបាន ទាល់តែម្តាយឪពុកជាជនស្របច្បាប់ ពោលគឺជាបុគ្គលដែលមានបណ្ណស្នាក់នៅអចិន្ត្រៃយ៍ ឬជាពលរដ្ឋអាមេរិក។ នេះបើតាមការបញ្ជាក់បន្ថែមរបស់ក្រុមអ្នកអភិរក្សនិយមដដែល។
នៅក្នុងសេចក្តីសម្រេចរបស់តុលាការឆ្នាំ១៨៩៨ តុលាការកំពូលអាមេរិកបានប្រកាសថា កូនដែលកើតពីឪពុកម្តាយអន្តោប្រវេសន៍ស្របច្បាប់ ជាពលរដ្ឋរដ្ឋអាមេរិក។ ផ្ទុយទៅវិញ ស្ថាប័នកំពូលនេះមិនដែលបានផ្តល់សេចក្តីសម្រេចអ្វីទាក់ទងនឹងកូនអន្តោប្រវេសន៍ខុសច្បាប់ ឬអ្នកមានក្រដាសស្នាមបណ្តោះអាសន្នឡើយ។
នៅរវាងពីឆ្នាំ១៩៨០-២០០៦ ចំនួនកូនក្មេងកើតពីម្តាយឪពុកជាអន្តោប្រវេសន៍បានកើនឡើងឥតឈប់ឈរ ដល់៣៧០០០០នាក់ មុនចាប់ធ្លាក់ចុះបន្តិចវិញ។ នេះបើតាមការសិក្សារបស់វិទ្យាសា្ថនស្រាវជ្រាវPEW ឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ