រដ្ឋមន្ត្រីការពារជាតិហ្វីលីពីន បំពេញទស្សនកិច្ចនៅលើកូនកោះជាប់ជម្លោះ ក្នុងសមុទ្រចិនខាងត្បូង
រដ្ឋមន្ត្រីការពារជាតិហ្វីលីពីន លោក Lorenzana កាលពីថ្ងៃសុក្រម្សិលមិញ បានអញ្ជើញទៅបំពេញទស្សនកិច្ចនៅលើកោះជាប់ជម្លោះមួយក្នុងសមុទ្រចិនខាងត្បូងដែលហ្វីលីពីននិងចិននៅតែបន្តទាមទារ ថាជាដែនអធិបតេយ្យភាពរបស់ប្រទេសគេរៀងៗខ្លួន
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក Lorenzana រដ្ឋមន្ត្រីការពារជាតិហ្វីលីពីន បានថ្លែងប្រាប់ក្រុមអ្នកកាសែតដែលអមដំណើរលោកថា ការដែលលោកអញ្ជើញទៅកាន់កោះមួយរបស់ហ្វីលីពីននៅក្នុងសមុទ្រចិនខាងត្បូងនោះ គឺជាដំណើរទស្សនកិច្ចធម្មតាមួយរបស់លោកនៅលើដែនដីហ្វីលីពីន។
តែប្រទេសចិនដែលនៅតែបន្តទាមទារជានិច្ចថាតំបន់កោះស្ទើរតែទាំងអស់នៅក្នុងសមុទ្រចិនខាងត្បូងគឺជាដែនកម្មសិទ្ធិរបស់ខ្លួន រួមទាំងតំបន់នានាដែលស្ថិតនៅក្បែរព្រំដែនប្រទេសជិតខាង។ លើសពីនេះ ក្នុងរយៈពេលប៉ុន្មានឆ្នាំចុងក្រោយនេះ ប៉េកាំង កាន់តែបង្ហាញនូវភាពឈ្លានពានរបស់ខ្លួនខ្លាំងឡើងៗដែរ។
ទីប្រជុំកោះ Spratleys ដែលរួមមានកោះទាំងអស់ជាង១០០កោះ ជាតំបន់ជាប់ជម្លោះមួយដ៏ខ្លាំងក្លាដោយសារតែតំបន់នោះ ជាតំបន់យុទ្ធសាស្ត្រយោធាមួយដ៏សំខាន់បំផុត។
ដូច្នេះហើយ បានជាហ្វីលីពីន ចិន ព្រុយណេ ម៉ាឡេស៊ី តៃវ៉ាន់និងវៀតណាម នៅតែបន្តការឈ្លោះប្រកែកគ្នាដើម្បីប្រជែងដណ្តើមយកទីប្រជុំកោះSpratleys ដ៏សំសខាន់នេះ អោយស្ថិតនៅក្រោមការគ្រប់គ្រងរបស់ប្រទេសខ្លួន។
ចិនដែលមានមហិច្ចតាយ៉ាងខ្លាំងក្លានោះ សូម្បីតែកូនកោះតូចមួយនៅទីប្រជុំកោះ Spratleys ដែលចិនហៅឈ្មោះថា Thitu និងជាទីដែលរដ្ឋមន្ត្រីការពារជាតិហ្វីលីពីនបានធ្វើដំណើរទៅទស្សនកិច្ចនោះ ក៏នៅតែស្រែកឃ្លាន ថាជាដែនដីរបស់ខ្លួនដែរ។ កូនកោះ Thitu នេះដែលជាភាសាហ្វីលីពីនហៅថា Pag-asa គឺជាទីជម្រកយោធភូមិមួយដ៏សំខាន់របស់ហ្វីលីពីន។ គួររំលឹកថា ចិនតែងតែមកចាក់ដីលើកបំពេញឲ្យកាន់តែខ្ពស់នៅ Subi ដែលជាតំបន់ជួរថ្មប៉ប្រះទឺកនិងស្ថិតនៅចម្ងាយតែ២៦ គម ប៉ុណ្ណោះ ពីកោះ Thitu។
ចំណែក រដ្ឋមន្ត្រីការពារជាតិហ្វីលីពីនវិញ បានជូនដំណឹងប្រាប់ដែរថា ដំណើរការសាងសង់ផ្លូវមាត់ទឹកមួយនៅលើកោះ Thiitu ដើម្បីទុកប្រើជាកន្លែងរើនិងផ្ទុកសម្ភារៈសំខាន់ៗ ជាអាទិ៍នៅក្នុងការជួសជូលផ្លូវចុះចតយន្តហោះនោះនឹងត្រូវចាប់ផ្តើមនៅក្នុងប៉ុន្មានសប្តាហ៍ខាងមុខនេះ។
គួរបញ្ជាក់ថា ដំណើរទស្សនកិច្ចរបស់រដ្ឋមន្ត្រីការពារជាតិហ្វីលីពីននេះ ត្រូវបានប្រព្រឹត្តទៅតែមួយសប្តាហ៍ប៉ុណ្ណោះបន្ទាប់ពីប្រធានាធិបតីហ្វីលីពីនលោក Rogrigo Duterté បានថ្លែងអះអាងថា លោកនឹងមិនអញ្ជើញទៅកាន់តំបន់ Spratley នៅខែមិថុនាខាងមុខដើម្បីទៅលើកទង់ជាតិហ្វីលីពីននៅទីនោះទេ នេះក៏ដើម្បីបញ្ជាក់ពីមិត្តភាពរបស់ប្រទេសហ្វីលីពីនជាមួយនឹងប្រទេសចិនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ