អាមេរិកដាក់ទណ្ឌកម្មហិរញ្ញវត្ថុលើក្រុមហ៊ុនកូរ៉េខាងជើងពីបទបានវាយប្រហារតាមអ៊ីនធ័រនែត
នៅថ្ងៃសុក្រ ទី១៣ កញ្ញា រដ្ឋបាលអាមេរិកាំងបានប្រកាសពីការដាក់ទណ្ឌកម្មហិរញ្ញវត្ថុលើក្រុមហ៊ុនកូរ៉េខាងជើងចំនួន ៣ ដែលបានវាយប្រហារតាមអ៊ីនធ័រនែតលើមន្ទីរពេទ្យអង់គ្លេសកាលពីឆ្នាំ ២០១៧ ឬមួយលើធនាគារកណ្តាលនៃប្រទេសបង់ក្លាដែសក្នុងឆ្នាំ ២០១៦។ ក្រសួងសេដ្ឋកិច្ចអាមេរិកបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ក្រុមហ៊ុនចោរព័តមានវិទ្យាកូរ៉េខាងជើងទាំង ៣ ជាក្រុមហ៊ុនដែលស្ថិតក្រោមការគ្រប់គ្រងរបស់រដ្ឋាភិបាលក្រុងព្យុងយ៉ាង។
ចុះផ្សាយនៅថ្ងៃ៖
ស្តាប់ - ០២:១៨
ក្រុមហ៊ុនចោរព័ត៌មានវិទ្យាកូរ៉េខាងជើងទាំង ៣ក្រុមហ៊ុនមានឈ្មោះ Lazarus Group Bluenoroff និងក្រុមហ៊ុន Andariel។ លោក Sigal Mandelker អនុរដ្ឋមន្រ្តីក្រសួងសេដ្ឋកិច្ចអាមេរិកទទួលបន្ទុកប្រយុទ្ធប្រឆាំងនឹងហិរញ្ញប្បទានភេរវនិយមបានបញ្ជាក់ថា បេសកកម្មរបស់ក្រុមហ៊ុនចោរព័ត៌មានវិទ្យាកូរ៉េខាងជើងទាំង ៣ក្រុមហ៊ុនគឺស្វែងរកលុយដើម្បីគាំទ្រលើកម្មវិធីអាវុធ និងគ្រាប់ស៊ីលខុសច្បាប់របស់ក្រុងព្យុងយ៉ាង។ តាមក្រសួងសេដ្ឋកិច្ចអាមេរិក ក្រុមហ៊ុន Lazarus Group ដែលរដ្ឋអំណាចកូរ៉េខាងជើងបង្កើតក្នុងឆ្នាំ ២២០៧ បានប្រើមេរោគឈ្មោះ WannaCry ២.០ វាយប្រហារលើម៉ាស៊ីនកុំព្យូទ័ពក្នុងប្រទេសមួយចំនួនក្នុងលោក ពិសេសនៅសហរដ្ឋអាមេរិក កាណាដា នូវែលហ្សេឡង់ និងប្រទេសអង់គ្លេស។ ជាសរុប មានម៉ាស៊ីនកុំព្យូទ័រប្រមាណ ៣០០ ០០០គ្រឿងក្នុងលោកបានរងការវាយប្រហារដោយមេរោគ WannaCry ២.០។
នៅក្នុងប្រទេសអង់គ្លេស ម៉ាស៊ីនកុំព្យូទ័រចំនួន ១ភាគ៣ របស់មន្ទីរពេទ្យបានរងការវាយប្រហារ ហើយភាពរអាក់រអួលផ្នែកប្រព័ន្ធព័ត៌មានវិទ្យាមួយនេះបានបណ្តាលឲ្យមានការខាតបង់គិតជាទឹកប្រាក់ចំនួន ១១២លានដុល្លារ។ ចំណែកក្រុមហ៊ុន Bluenoroff ត្រូវបានក្រុងព្យុងយ៉ាងបង្កើតឡើងដើម្បីស្វែងរកថវិកាឲ្យរដ្ឋាភិបាលដែលជាប់ទណ្ឌកម្មសេដ្ឋកិច្ចអន្តរជាតិ។ ក្រុមហ៊ុនBluenoroff នេះត្រូវបានក្រុមហ៊ុនសន្តិសុខអ៊ីនធ័រនែតចាប់អត្តសញ្ញាណបានចាប់ពីឆ្នាំ ២០១៤។ កាលណោះ Bluenoroff បានព្យាយាមលួចលុយជាង ១ ១០០លានដុល្លារពីស្ថាប័នហិរញ្ញវត្ថុក្នុងប្រទេសជាច្រើនក្នុងលោកតាំងពីម៉ិចស៊ិកដល់ប៉ាគីស្ថានដោយឆ្លងកាត់តួកគី ឈីលី និងប្រទេសវៀតណាម។
ចុងក្រោយគឺក្រុមហ៊ុនចោរព័ត៌មានវិទ្យាកូរ៉េខាងជើងឈ្មោះ Andariel ដែលគេបានស្គាល់អត្តសញ្ញាណចាប់ពីឆ្នាំ ២០១៥។ Andariel បានផ្តោតការវាយប្រហារលើរដ្ឋាភិបាល និងហេដ្ឋារចនាសម្ព័ន្ធរបស់កូរ៉េខាងត្បូង។ ទង្វើលេចធ្លោរបស់ក្រុមហ៊ុន Andariel គឺការចូលលួចព័ត៌មានឯកជននៅក្នុងម៉ាស៊ីន ATM របស់ធនាគារ រួចយកព័ត៌មានឯកជនទាំងនោះទៅលក់នៅទីផ្សារងងឹត។ ទន្ទឹមគ្នានេះ Andariel ក៏ល្បីខាងបង្កើតកម្មវិធីមួយដែលអាចបង្វែរទឹកប្រាក់លេងល្បែងបៀអនឡាញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ