កិច្ចសន្យាទិញយន្តហោះចម្បាំង បារាំង Rafale ១២៦គ្រឿង អាចស្លាប់មុនកើត
កិច្ចសន្យាប្រចាំសតវត្សរ៍របស់ក្រុមហ៊ុនបារាំងDassaultដែលត្រូវលក់យន្តហោះចម្បាំងប្រមាណ ១២៦គ្រឿងទៅឲ្យឥណ្ឌា ហាក់បាត់ពន្លឺបណ្តើរៗ។ កាលពីល្ងាចថ្ងៃចន្ទ ម្សិលមិញរដ្ឋមន្រ្តីក្រសួងការពារជាតិឥណ្ឌា បានប្រកាស ពីនយោបាយថ្មី ដែលថា រាល់ការចរចាទិញយន្តហោះចម្បាំង នឹងធ្វើឡើង រវាងរដ្ឋាភិបាល និង រដ្ឋាភិបាល គឺលែង ឆ្លងកាត់ តាមការដេញថ្លៃរបស់ក្រុមហ៊ុនដូចមុនទៀតហើយ។
ចុះផ្សាយនៅថ្ងៃ៖
ស្តាប់ - ០២:១៨
ជាជាងការដាក់ឲ្យដេញថ្លៃ កិច្ចសន្យា ទិញយន្តហោះចម្បាំង ដែលជាញឹកញយ បង្កឲ្យមានការភ័ន្តច្រលំ ឬ បញ្ហាចលាចល រដ្ឋាភិបាលឥណ្ឌា បានសម្រេចទិញ យន្តហោះ Rafale ៣៦គ្រឿង ដែលផលិតរួចជាស្រេចក្នុងប្រទេសបារាំង។ រាល់កិច្ចសន្យាទិញយន្តហោះចម្បាំងRafaleបារាំង ផ្សេងទៀត នៅថ្ងៃខាងមុខ នឹងធ្វើឡើង តាមរយៈការចរចាដោយផ្ទាល់ រវាងរដ្ឋាភិបាល និងរដ្ឋាភិបាលតែប៉ុណ្ណោះ។ នេះបើតាមការអះអាងរបស់លោករដ្ឋមន្រ្តីការពារជាតិឥណ្ឌា ម៉ានូហា ប៉ារីការ។ ការប្រកាសរបស់រដ្ឋមន្រ្តីការពារជាតិឥណ្ឌាទំនងមានន័យថា គម្រោងការទិញយន្តហោះRafale ទាំង១២៦គ្រឿង ដែលឥណ្ឌា និងក្រុមហ៊ុនបារាំងDassault បានចរចាគ្នាអស់៣ឆ្នាំមកហើយ នឹងត្រូវរដ្ឋាភិបាលឥណ្ឌាបិទកប់ចោលមួយកន្លែង។
កាលពីសប្តាហ៍មុន នៅក្នុងដំណើរទស្សនកិច្ចផ្លូវរដ្ឋ ក្នុងប្រទេសបារាំង នាយករដ្ឋមន្រ្តីឥណ្ឌាបានបង្កើតភាពភ្ញាក់ផ្អើលមួយ ដោយបានប្រកាសទិញ យន្តហោះចម្បាំង បារាំង ៣៦គ្រឿង សម្រាប់បំពាក់ភ្លាមៗឲ្យកងទ័ពអាកាសឥណ្ឌា។ ដោយទិញយន្តហោះផលិតរួចជាស្រេច នៅក្នុងទឹកដី បារាំង ឥណ្ឌាដែលចង់ធ្វើទំនើបកម្មជាបន្ទាន់វិស័យកងទ័ព ចង់ធ្វើការសន្សំសំចៃក្នុងកញ្ចប់ថវិកាយោធារបស់ខ្លួន។ តម្លៃសរុបរបស់យន្តហោះ ទាំង១២៦គ្រឿង បានកើនឡើងពី ១២ពាន់ លានទៅ ២០ពាន់លានអឺរ៉ូ។
ចាប់តាំងពីឆ្នាំ ២០១២ ឥណ្ឌា និងក្រុមហ៊ុនរដ្ឋបារាំង Dassault បានបើកការចរចាលើកិច្ចសន្យាលក់យន្តហោះRafale១២៦ ដែលនៅក្នុងនោះ ១០៨គ្រឿង ត្រូវផលិតឡើង នៅក្នុងទឹកដីឥណ្ឌា ដោយក្រុមហ៊ុនរដ្ឋបារាំង និងក្រុមហ៊ុនរដ្ឋឥណ្ឌា។ តាមរដ្ឋមន្រ្តីការពារជាតិ ឥណ្ឌា ការចរចាលើកិច្ចសន្យាទិញRafale ១២៦គ្រឿងបានជួបឧបសគ្គយ៉ាងច្រើន។ រដ្ឋាភិបាលឥណ្ឌា ចំណេញពេលច្រើន ដោយទិញយន្តហោះចម្បាំងRafale ដែលផលិតរួចស្រេច ក្នុងទឹកដីបារំាង។ ប៉ុន្តែ ធ្វើដូច្នេះ រដ្ឋាភិបាលឥណ្ឌា នឹងខកខាន មិនបានទទួលបច្ចេកវិទ្យារបស់បារាំង ដើម្បីផលិតយន្តហោះRafale ក្នុងប្រទេសឥណ្ឌា។ នយោបាយផលិតក្នុងស្រុក Made in India ដែលលោកនាយករដ្ឋមន្រ្តីណារិនដ្រា ម៉ូឌី បានសន្យាធ្វើនៅក្នុងអាណត្តិរបស់លោកក៏ត្រូវរលាយសាបសូន្យដែរ។
អ្នកជំនាញខ្លះវាយតម្លៃថា ឥណ្ឌាទំនងបោះបង់ចោលកិច្ចសន្យាចាស់ ដោយសារតែ ការផ្ទេរបច្ចេកវិទ្យា ហើយនិងការផលិតយន្តហោះចម្បាំងRafaleក្នុងទឹកដីឥណ្ឌា មានតម្លៃថ្លៃ ជាងការផលិត នៅក្នុងប្រទេសបារាំងទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ