ហេតុអ្វីបានជាថ្នាក់ដឹកនំាចិនក្រាលព្រំក្រហមទទួលប្រមុខបក្សប្រឆំាងភូមាលោកស្រីអ៊ុង សានស៊ូជី ?
លោកស្រីអ៊ុង សានស៊ូជី ប្រធានគណបក្សជាតិដើម្បីលទ្ធិប្រជាធិបតេយ្យនៅភូមាដែលជាបក្សប្រឆំាងដ៏ធំបានផ្តើមបំពេញទស្សនកិច្ចមិនធ្លាប់មានរយៈពេល ៥ថ្ងៃនៅក្នុងប្រទេសចិនពីថ្ងៃពុធ ទី១០ ដល់ថ្ងៃអាទិត្យ ទី១៤ មិថុនា។ នេះជាលើកទី១ ដែលជ័យលាភីរង្វាន់ណូបែលសន្តិភាពភូមាបានទៅទស្សនកិច្ចនៅស្រុកចិនតាមការអញ្ជើញរបស់គណបក្សកុម្មុយនិស្តចិន។ តែអ្វីជាការកត់សម្គាល់ វត្តមានប្រមុខបក្សប្រឆំាងភូមានៅចិនពេលនេះបានធ្វើឡើង ចំពេលដែលទំនាក់ទំនងរវាងរដ្ឋាភិបាលទីក្រុងប៉េកំាង និងរដ្ឋាភិបាលទីក្រុងណៃពីដ៏កំពុងស្គាល់ភាពតានតឹងយ៉ាងខ្លំាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:១៤
ជាផ្លូវការ លោកស្រីអ៊ុង សានស៊ូជីបានទៅចិន តាមការអញ្ជើញរបស់គណបក្សកុម្មុយនិស្តចិន ពោលមិនមែនរដ្ឋាភិបាលចិនទេ មានន័យថា គណបក្សកុម្មុយនិស្តចិនចង់រឹតចំណងទាក់ទងជាមួយគណបក្សជាតិដើម្បីលទ្ធិប្រជាជាធិបតេយ្យរបស់លោកស្រីអ៊ុង សានស៊ូជី។ តែបើគេពិនិត្យឲ្យបានស៊ីជម្រៅបន្តិចទៅឃើញថា នេះគ្រាន់តែជារូបភាពសំបកក្រៅប៉ុណ្ណោះ ព្រោះចង់ ឬមិនចង់ វត្តមានរបស់លោកស្រីអ៊ុង សានស៊ូជីនៅស្រុកចិនពេលនេះជាសក្ខីកម្មមួយដែលបង្ហាញយ៉ាងច្បាស់មិនអាចប្រកែកបាន ពីការផ្លាស់ប្តូរជំហររបស់ចិននៅក្នុងទំនាក់ទំនងជាមួយភូមាដែលជាសម្ព័ន្ធមិត្តចាស់ទឹកមិនលេចរបស់ខ្លួន។
នៅក្នុងអតីតកាល ពោលក្នុងពេលដែលភូមាស្ថិតក្រោមការគ្រប់គ្រងរបស់របបសឹក និងក្នុងពេលដែលភូមាបានទទួលទ័ណ្ឌកម្មសេដ្ឋកិច្ចពីសហគមន៍អន្តរជាតិដោយសារតែការឃុំរូបលោកស្រីអ៊ុង សានស៊ូជីនៅក្នុងគេហដ្ឋានអស់រយៈពេលជាង ១៥ឆ្នំា ចិនគឺជាផ្លូវដង្ហើមសេដ្ឋកិច្ចរបស់ភូមាតែមួយគត់ ឬអាចនិយាយបែបម្យ៉ាងទៀតថា សេដ្ឋកិច្ចភូមាបានពឹងផ្អែកសឹងតែទំាងស្រុងលើវិនិយោគរបស់ជនជាតិចិន។ ក៏ប៉ុន្តែ តំាងពីរបបសឹកបានរលត់រលាយក្នុងឆ្នំា ២០១១ និងបង្កើតចេញនូវរដ្ឋាភិបាលស៊ីវិលមក ភូមារបស់លោកប្រធានាធិបតីថេន សេនបានផ្តើមធ្វើកំណែទម្រង់ច្រើនណាស់ ពិសេសបើកផ្លូវឲ្យក្រុមអ្នកវិនិយោគបរទេសចូលទៅរកស៊ីនៅភូមា។ សហគមន៍អន្តរជាតិ ពិសេសសហភាពអឺរ៉ុប និងអាមេរិកក៏បានលើកទ័ណ្ឌកម្មសេដ្ឋកិច្ចមួយចំនួនចេញពីភូមាដែរ។
ចិនព្យាយាមការពារភូមាកុំឲ្យធ្លាក់ក្នុងក្នុងឥទ្ធិពលអាមេរិក
អ្វីដែលចិនកំពុងសម្លឹងឃើញប្រយោជន៍ពីលោកស្រីអ៊ុង សានស៊ូជី គឺមិនមែនបច្ចុប្បន្នទេ តែសម្លឹងទុកសម្រាប់ថ្ងៃខាងមុខ។ សម្រាប់ប្រទេសណាមិនដឹងទេ តែសម្រាប់ប្រទេសចិន ការផ្លាស់ប្តូរជំហរជារឿងមួយធម្មតាប្រសិនបើចិនយល់ថា ចំាបាច់ និងអាចផ្តល់ប្រយោជន៍ចំពោះខ្លួន។ អ្វីជាការកត់សម្គាល់ វត្តមានរបស់មេបក្សប្រឆំាងភូមាលោកស្រីអ៊ុង សានស៊ូជីនៅចិនពេលនេះបានធ្វើឡើងស្របពេលនឹងហេតុការណ៍ចំនួន ៣៖
ទី១ ចំពេលដែលចិនកំពុងសម្គាល់ឃើញផលប្រយោជន៍របស់ខ្លួនជាមួយរដ្ឋាភិបាលភូមាសព្វថ្ងៃទទួលការគំរាមកំហែងយ៉ាងខ្លំាង។ ជាក់ស្តែង ដំណើរការសាងសង់មហាទំនប់វារីអគ្គសនីត្រូវបានផ្អាក បន្ទាប់ពីមានបាតុកម្មប្រឆំាងរបស់ប្រជាជនភូមា និងអាជីវកម្មអណ្តូងរ៉ែទង់ដែនត្រូវបានព្យួរមួយរយៈ។ ទំាងនេះមិនភ្លេចនិយាយទេពីជម្លោះប្រដាប់អាវុធនៅតាមព្រំដែនរវាងទ័ពភូមា និងពួកឧទ្ទាមកូកាងដែលបានបង្កឲ្យមានជនភៀសខ្លួនភូមារាប់សិបពាន់នាក់ឆ្លងទៅជ្រកកោនក្នុងទឹកដីចិន។ ជម្លោះផ្ទៃក្នុងភូមាក៏បានបណ្តាលឲ្យស្លាប់កសិករចិនចំនួន ៤នាក់កាលពីខែមីនាកន្លងទៅ។
ទី២ ចំពេលដែលសហគមន៍អន្តរជាតិកំពុងសម្លឹងឃើញផលប្រយោជន៍នៅភូមា ពិសេសអាមេរិកដែលនាដំណើរទស្សនកិច្ចនៅក្នុងប្រទេសភូមាកន្លងទៅ លោកប្រធានាធិបតីអាមេរិកអូបាម៉ាបានយកចិត្តទុកដាក់ និងឲ្យតម្លៃខ្លំាងចំពោះបុគ្គលលោកស្រីអ៊ុង សានស៊ូជីជាជាងថ្នាក់ដឹកនំាភូមាសព្វថ្ងៃ។
ទី៣ នៅខែវិច្ឆិកាខាងមុខ ភូមានឹងរៀបចំបោះឆ្នោតសភាដែលគណបក្សរបស់លោកស្រីអ៊ុង សានស៊ូជីត្រូវបានគេមើលឃើញថា នឹងទទួលបានសម្លេងគំាទ្រច្រើន។
គឺហេតុផលទំាង ៣ខាងលើនេះហើយដែលបានជម្រុញឲ្យចិនមិនអាចបន្តធ្វើព្រងើយកន្តើយចំពោះលោកស្រីអ៊ុង សានស៊ូជី ដោយទុកបណ្តោយឲ្យអ្នកផ្សេងតាមចែចង់ផ្តាច់មុខទៀតទេ។ ចិនបានសម្លឹងឃើញទុកជាមុនថា អនាគតអ្នកដឹកនំាភូមាប្រហែលគ្មាននរណាក្រៅពីលោកស្រីអ៊ុង សានស៊ូជីឡើយ។ ក្រុមអ្នកវិភាគបានលើកឡើងថា ចិនកំពុងលេងល្បែងប្រថុយប្រថាន ដោយគ្រាន់តែឮផ្គរលាន់ ចាក់ទឹកពាងចោល។ តែចិនបានឆ្លើយថា រឿងចាញ់អត់ទេ មានតែឈ្នះ ឬមួយក៏រួចខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ