លោកសម រង្ស៊ី៖ ព្រមស្បថរឿងសន្លឹកឆ្នោត និងប្រើវប្បធម៌សន្ទនារឿងព្រំដែន តែអ្វីៗផ្អែកលើការពិត
ប្រធានគណបក្សសង្គ្រោះជាតិលោក សម រង្ស៊ី នៅព្រឹកថ្ងៃពុធទី១០ មិថុនានេះ បានមកដល់កម្ពុជាវិញហើ់យ បន្ទាប់ពីបាត់មុខមួយរយៈ។ តបតាមការបបួលពីលោកនាយករដ្ឋមន្ត្រី លោកសម រង្ស៊ី នឹងស្បថជាមួយលោកនាយករដ្ឋមន្ត្រីហ៊ុន សែន ទាំងរឿងបន្លំសន្លឹកឆ្នោត និងបញ្ហាព្រំដែនជាមួយប្រទេសវៀតណាម ប៉ុន្តែថា ការស្បថជារឿងអបិយជំនឿ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ស្បថជារឿងអបិយជំនឿ ការបន្លំសន្លឹកឆ្នោត និងបញ្ហាព្រំដែន ត្រូវផ្អែកលើបច្ចេកទេសវិទ្យាសាស្ត្រ និងការពិតនៅតាមព្រំដែន។ នេះគឺជាការលើកឡើងពីលោកសម រង្ស៊ី ប្រធានគណបក្សសង្គ្រោះជាតិនៅអាកាសយានដ្ឋានអន្តរជាតិភ្នំពេញ។ សម្លេងលោក សម រង្ស៊ី៖
ប្រធានគណបក្សប្រឆាំងរូបនេះ បន្ថែមថា គណបក្សសង្គ្រោះជាតិ និងប្រើប្រាស់វប្បធម៌សន្ទនាជាមួយបក្សកាន់អំណាចដើម្បីជជែករឿងព្រំដែនជាមួយវៀតណាម។ ប៉ុន្តែមិនបានបញ្ជាក់ថានឹងប្រកាន់គោលជំហររួមជាមួយគណបក្សកាន់អំណាចនោះទេ។ ការឆ្លើយតបនេះ បន្ទាប់ពីលោកនាយករដ្ឋមន្ត្រី បានបបួលលោកស្បថនៅមុខព្រះអង្គដង្កើរ ចំពោះការចោទប្រកាន់ថា បក្សកាន់អំណាចបានលួចបន្លំសន្លឹកឆ្នោត និងបានប្រើប្រាស់ផែនទីក្លែងក្លាយក្នុងរឿងព្រំដែននោះ។
សូមគូសបញ្ជាក់ថា លោកនាយករដ្ឋមន្ត្រី កាលពីថ្ងៃអង្គារម្សិលមិញ បានស្នើទៅកាន់សមាជិកការិយាល័យនយោបាយជាន់ខ្ពស់បក្សកុម្មុយនិស្តវៀតណាម ឱ្យប្រទេសនេះ បន្តរក្សាភាពស្ងៀមស្ងាត់នៅតំបន់ព្រំដែនជាពិសេស ខេត្តរតនៈគីរី។ ខេត្តរតនៈគីរីដែលបញ្ហាព្រំដែនមិនទាន់ត្រូវបានដោះស្រាយបញ្ចប់ និងបានផ្ទុះឡើងវិញបន្ទាប់ពីភាគីវៀតណាមបានជីកស្រះ នៅតំបន់ព្រំដែន។ បក្សប្រឆាំង សង្គមស៊ីវិល និងសមាគមន៍នានា បានរិះគន់ខ្លាំងៗលើរដ្ឋាភិបាលរបស់បក្សកាន់អំណាចថា ព្រងើយកន្តើយចំពោះបញ្ហានេះ។
បន្ថែមពីបញ្ហារសើបទាំងពីរ លោកសម រង្ស៊ីបានសំដែងការរំលែកទុក្ខដល់ក្រុមគ្រួសារលោកជាស៊ីមប្រធានគណបក្សប្រជាជនកម្ពុជាផងដែរ។ បើតាមលោក សម រង្ស៊ី បើទោះបីជាធ្លាប់មានប្រវត្តិយ៉ាងណាក៏ដោយ ក៏ប៉ុន្តែអំពើល្អនៅពេលមានជីវិតគឺអ្វីដែលត្រូវចងចាំ។ នៅថ្ងៃទី១១ មិថុនាស្អែកលោក សម រង្ស៊ីនឹងដឹកនាំសមាជិកគណបក្សសង្គ្រោះជាតិ ទៅរំលែកទុក្ខលោកជាស៊ីមដល់គេហដ្ឋាន។
គួរកត់សំគាល់ថា ក្នុងសំណុំរឿងព្រំដែន និងលទ្ធផលបោះឆ្នោតគឺជាបញ្ហារសើប ដែលគណបក្សកាន់អំណាច និងគណបក្សប្រឆាំង តែងតែប្រកាន់គោលជំហរផ្សេងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ