អាមេរិកនឹងរកអន្តរាគមន៍ជួយលោក មាជ សុវណ្ណារ៉ា
ស្ថានទូតអាមេរិកនៅថ្ងៃទី២៥ ខែកក្កដានេះ តាមរយៈសេចក្តីប្រកាសព័ត៌មានរបស់ខ្លួន បានឲ្យដឹងថាក្រសួងការបរទេសអាមេរិកនឹងជួយដល់ លោក មាជ សុវណ្ណារ៉ា ជាពលរដ្ឋអាមេរិកតាមតែអាចធ្វើទៅបាន។ ចំណែក អ្នកនាំពាក្យរដ្ឋាភិបាលថាការបង្គាប់បញ្ជារបស់អាមេរិកមកកម្ពុជា គឺហាក់ដូចជាបង្ហាញការដើរថយក្រោយរបស់សហរដ្ឋអាមេរិក ដែលចង់ឃើញកម្ពុជាមាននីតិរដ្ឋ។
ចុះផ្សាយនៅថ្ងៃ៖
ស្តាប់ - ០១:៥៤
លោក មាជ សុវណ្ណារ៉ា ដែលមានសញ្ជាតិអាមេរិក ត្រូវបានស្ថានទូតអាមេរិកប្រចាំកម្ពុជាប្រកាសថាក្រសួងការបរទេសសហរដ្ឋអាមេរិកយកចិត្តទុកដាក់យ៉ាងខ្លាំងក្នុងការជួយដល់ពលរដ្ឋរបស់ខ្លួននៅបរទេស។ក្រោយពេល ដែលតុលាការក្រុងភ្នំពេញបានដាក់ទោសលោក មាជ សុវណ្ណារ៉ា និងសកម្មជនទាំង១០នាក់ផ្សេងទៀតរបស់គណបក្សសង្រ្គោះជាតិ មន្ត្រីកុងស៊ុលអាមេរិក នៅថ្ងៃសុក្រ ទី២៤ កក្កដា ក៏បានទៅមើលលោក សុវណ្ណារ៉ា ផងដែរ។ ហើយអាមេរិកនឹងបន្តគាំទ្រផ្នែកកុងស៊ុលទាំងអស់ តាមដែលអាចធ្វើទៅបាន។
ក្នុងលិខិតនោះ ស្ថានទូតអាមេរិកប្រចាំកម្ពុជា មានក្តីកង្វល់ចំពោះដំណើរការដាក់ទោស ដល់សកម្មជនគណបក្សសង្រ្គោះជាតិទាំង១១នាក់នោះ។ ហើយស្ថានទូតស្នើឲ្យរដ្ឋាភិបាលកម្ពុជាពិនិត្យមើលឡើងវិញ ឲ្យបានហ្មត់ចត់ចំពោះការកាត់ទោសរបស់តុលាការ ដើម្បីធ្វើយ៉ាងណាឲ្យការកាត់ទោសមានលក្ខណៈពេញលេញ មានតម្លាភាព ស្របទៅនឹងច្បាប់កម្ពុជា និងច្បាប់អន្តរជាតិ។
គួររំលឹកដែរថា សកម្មជន និងសមាជិកគណបក្សសង្គ្រោះជាតិចំនួន១១នាក់ រួមទាំងលោក មាជ សុវណ្ណារ៉ា ផងនោះ ត្រូវបានតុលាការក្រុងភ្នំពេញកាត់ទោស កាលពីថ្ងៃទី២១ ខែកក្កដា ឲ្យជាប់ពន្ធនាគារក្នុងម្នាក់ៗ ពី៧ទៅ២០ឆ្នាំ ពីបទដឹកនាំកុប្បកម្ម បង្កឲ្យមានហិង្សាក្បែរស្ពាននាគ ជិតទីលានប្រជាធិបតេយ្យ កាលពីថ្ងៃទី១៥ កក្កដា ២០១៤ កន្លងទៅ។
លោក ផៃ ស៊ីផាន អ្នកនាំពាក្យរដ្ឋាភិបាលបានឲ្យដឹងថាការស្វែងរកអន្តរាគមន៍ជួយ លោក មាជ សុវណ្ណារ៉ា ដែលមានសញ្ជាតិអាមេរិក គឺជាកាតព្វកិច្ចរបស់រដ្ឋាភិបាលអាមេរិក។ ក៏ប៉ុន្តែ លោក មាជ សុវណ្ណារ៉ា មានដើមកំណើតនៅកម្ពុជា ហើយបានប្រព្រឹត្តិបទល្មើសនៅកម្ពុជា។
លោក ផៃ ស៊ីផាន បានបញ្ជាក់ទៀតថាការចេញសេចក្តីប្រកាសព័ត៌មានរបស់អាមេរិក បង្គាប់បញ្ជាកម្ពុជា ដែលដឹកនាំដោយរដ្ឋាភិបាលស្របច្បាប់ គឺជាការបាត់បង់តម្លៃ និងឧត្តមគតិ លទ្ធិប្រជាធិបតេយ្យរបស់អាមេរិក។ ហើយលោកបន្ថែមថានេះ ហាក់ដូចជាការដើរថយក្រោយរបស់សហរដ្ឋអាមេរិក ដែលចង់ឃើញកម្ពុជាមាននីតិរដ្ឋ តែបែរជាបង្គាប់បញ្ជារដ្ឋាភិបាលកម្ពុជាឲ្យជ្រៀតជ្រែកក្នុងដំណើរការយុត្តិធម៌របស់តុលាការទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ