លោកសាកូហ្ស៊ីបរិហារលើការបង្ខូចឈ្មោះលោក និងថា លោកមិនដែលក្បត់សេចក្តីទុកចិត្តរបស់ពលរដ្ឋបារាំងទេ
នៅក្នុងប្រទេសបារាំង លោកអតីតប្រធានាធិបតីនីកូឡា សាកូហ្ស៊ីបានចេញមុខការពារខ្លួនលើការចោទប្រកាន់ក្នុងបទពុករលួយទទួលលុយពីអតីតមេដឹកនាំលីប៊ីលោកកាដាហ្វីសម្រាប់ប្រើក្នុងសម័យឃោសនាបោះឆ្នោតប្រធានាធិបតីបារាំងឆ្នាំ ២០០៧។ នៅក្នុងបទសម្ភាសន៍រយៈពេល ២៥នាទីជាមួយទូរទស្សន៍បារាំង TF1 នាយប់ថ្ងៃព្រហស្បតិ៍ ទី២២ មីនា លោកសាកូហ្ស៊ីបានបរិហារពីការមូលបង្កាច់បង្ខូចឈ្មោះលោក និងថា លោកមិនដែលក្បត់សេចក្តីទុកចិត្តរបស់ពលរដ្ឋចំពោះលោកទេ។
ចុះផ្សាយនៅថ្ងៃ៖
ស្តាប់ - ០២:០៧
« ខ្ញុំបានដឹកនាំកម្លាំងសម្ព័ន្ធមិត្តអន្តរជាតិដើម្បីវាយរំលំរបបកាដាហ្វីដែលបានសន្យាបង្ហូរឈាមដូចជាទឹកទន្លេនៅក្នុងទីក្រុងបេនហ្កាហ្ស៊ី។ អន្តរាគមន៍បានចាប់ផ្តើមក្នុងខែមីនា ឆ្នាំ ២០១១ និងមានរយៈពេល ៨ខែ ហើយមេដឹកនាំផ្តាច់ការលីប៊ីលោកកាដាហ្វីបានស្លាប់ក្នុងខែតុលា ឆ្នាំ ២០១១។ ឃើញថាពីខែមីនាដល់ថ្ងៃស្លាប់ក្នុងខែតុលា លោកកាដាហ្វីមានរយៈពេល ៧ខែដើម្បីលើកបង្ហាញនូវភស្តុតាងដែលលោកបានថតទុករួមមាន ឯកសារ រូបថត ទឹកលុយបញ្ជូន និងឈ្មោះក្រុមហ៊ុន ប្រសិនបើមាន។
ចុះហេតុអ្វីបានជាលោកមិនធ្វើ?។ លើសពីនេះទៀត កូនប្រុសរបស់គាត់ គឺសៃ កាដាហ្វីបានថ្លែងក្នុងថ្ងៃទី១៦ មីនា ឆ្នាំ ២០១១ ថា សាកូហ្ស៊ីត្រូវសងលុយវិញ។ សៃ កាដាហ្វីនិយាយទៀតថា គេមានរូបថត ខ្សែអាត់សម្លេង ការបញ្ជូនលុយ និងគណនី។ ការលើកឡើងនេះបានធ្វើឡើងក្នុងថ្ងៃទី១៦ មីនា ២០១១ ហើយពេលនេះជាខែមីនា ឆ្នាំ ២០១៨ គេមិនបានឃើញឯកសារ រូបថត ឬគណនី សូម្បីភស្តុតាងតូចតាចក៏គ្មានដែរ។ គឺមានតែភាពស្អប់ខ្ពើម ភក់ជ្រាំ ភាពល្ងង់ខ្លៅ អំពើអាក្រក់ និងបង្កាច់បង្ខូចឈ្មោះ។
ខ្ញុំខ្លួនឯងជាជនរងគ្រោះ តែមិនមែនសម្រាប់ខ្ញុំទេ។ ខ្ញុំមិនសោកស្តាយសម្រាប់ខ្ញុំទេ តែសោកស្តាយសម្រាប់ប្រទេសរបស់ខ្ញុំ និងសម្រាប់តួនាទីដែលខ្ញុំបានបំពេញ។ គេគ្មានសិទ្ធិឯណាដើម្បីច្រានមនុស្សទៅក្នុងភក់ជ្រាំដោយសារតែទង្វើរបស់មនុស្សមួយក្រុមដែលជាឃាតករ និងជាអ្នកឆបោកបានធ្វើនោះទេ។ ខ្ញុំមកទីនេះមិនមែនដើម្បីនិយាយពីនយោបាយទេ តែមកទីនេះដើម្បីនិយាយការពិតប្រាប់ពលរដ្ឋបារាំង។ ខ្ញុំមិនដែលក្បត់នឹងសេចក្តីទុកចិត្តរបស់ពួកគេឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ