ត្រីឡើងពីថ្ងៃ៣១ធ្នូ ដល់ថ្ងៃទី៨មករា
ក្រសួងកសិកម្មបានប្រកាសផ្តល់ព័ត៌មានដល់ប្រជាជនខ្មែរ ដែលជាអ្នកធ្វើត្រីប្រហុក ផ្អក និងត្រីឆ្អើរអំពីថ្ងៃដែលត្រីឡើងពីថ្ងៃទី៣១ធ្នូដល់ថ្ងៃទី៨មករា ដើម្បីអោយពួកគេទៅទិញត្រី។ លោកណៅ ធួកប្រធានរដ្ឋបាលជនផលបានអះអាងអំពីកំណើនត្រី និងតម្លៃត្រីប្រហុកចុះថោក នៅឆ្នាំនេះ។
ចុះផ្សាយនៅថ្ងៃ៖
ស្តាប់ - ០១:៣៥
ជាព័ត៌មានសម្រាប់ប្រជាជនខ្មែរអ្នកធ្វើត្រីប្រហុក រដ្ឋបាលជលផលនៃក្រសួងកសិកម្មបានប្រកាសជូនព័ត៌មានអោយដឹងអំពីថ្ងៃត្រូវទិញត្រីធ្វើប្រហុក ផ្អក និងត្រីឆ្អើរដែលស្ថិតនៅចន្លោះថ្ងៃទី៣១ធ្នូ និងថ្ងៃទី៨មករានេះ។
លោកណៅ ធួកប្រធានរដ្ឋបាលជលផលនៃក្រសួងកសិកម្មបានថ្លែងប្រាប់វិទ្យុបារាំងអន្តរជាតិថា រដ្ឋបាលជលផលត្រូវជូនដំណឹងដល់ប្រជាពលរដ្ឋ ដូចរៀងរាល់ឆ្នាំដើម្បីផ្តល់ព័ត៌មានអោយពិតប្រាកដអំពីថ្ងៃពេលវេលាដែលត្រូវទិញត្រី។ លោកណៅ ធួកបានបន្តថាបន្ទាប់ពីរយៈពេលដើមខែមករានេះ ត្រីនឹងឡើងម្តងទៀតនៅដើមខែកុម្ភៈ ក្នុងអំឡុងសប្តាហ៍ទីមួយ។
ប្រធានរដ្ឋបាលជលផលអះអាងថាត្រីឆ្នាំនេះមានកំណើនបន្ទាប់ពីការអនុវត្តន៍ការបិទឡូត៍នេសាទទ្រង់ទ្រាយធំ និងការបង្ក្រាបបទល្មើសនេសាទមក។ លើសពីនេះតម្លៃត្រីក៏បានចុះថោកពាក់កណ្តាល បើប្រៀបធៀបនឹងឆ្នាំមុនដែរ។
នៅក្នុងគោលដៅសង្គ្រោះធនធានមច្ឆាជាតិ នៅក្នុងតំបន់បឹងទន្លេសាប និងប្រើប្រាស់ធនធាននេះប្រកបដោយចីរភាព កាលពីថ្ងៃទី២៧ធ្នូកន្លងទៅ លោកឧបនាយករដ្ឋមន្ត្រីប៊ិន ឈិន ប្រធានគណៈកម្មាការអធិការកិច្ចលើការគ្រប់គ្រង និងអភិវឌ្ឍន៍ឡូត៍នេសាទជុំវិញបឹងទន្លេសាបបានប្រកាសសេចក្តីសម្រេចបញ្ជាអោយមានការអនុវត្តន៍ជំហានទី២ស្តីពីការបង្ក្រាបបទល្មើសនេសាទនៅតំបន់បឹងទន្លេសាបនេះ។
រដ្ឋាភិបាលបានចាប់ផ្តើមប្រើវិធានការធ្ងន់ធ្ងរ កាលពីខែវិច្ឆិកាកន្លងទៅដើម្បីបង្រ្កាបបទល្មើសជលផលដែលបានកើនឡើងឥតឈប់ឈរ នៅតាមបណ្តាខេត្តជុំវិញបឹងទន្លេសាប រហូតដល់រដ្ឋាភិបាលបានសម្រេចដកហូត មកវិញទៀត ឡូត៍របស់រដ្ឋ ទាំង៣៥ពី ឯកជន ដែលរដ្ឋបានផ្តល់ឲ្យធ្វើអាជីវកម្មកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ