តារាហូលីវូដ Natalie Portman បដិសេធមិនទៅហ្សេរុយសាឡិម ដោយសារនាយករដ្ឋមន្ត្រីអ៊ីស្រាអែល
តារាហូលីវូដនាង Natalie Portman ឲ្យដឹងថា នាងមិនបានទៅចូលរួមកម្មវិធី ដែលនាងឈ្នះពាន់រង្វាន់ចំនួន ២ លានដុល្លារ នៅទីក្រុងហ្សេរុយសាឡិមឡើយ។ ការណ៍ដែលនាងធ្វើបែបនេះ គឺដើម្បីបង្ហាញជំហរប្រឆាំងទៅនឹងគោលនយោបាយរបស់លោកនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ
ចុះផ្សាយនៅថ្ងៃ៖ កែប្រែថ្ងៃទី៖
តារាសម្តែងហូលីវូដនាង Natalie Portman បាននិយាយនៅក្នុងសេចក្តីថ្លែងការណ៍មួយដែលត្រូវបានចេញផ្សាយកាលពីថ្ងៃសុក្រនៅលើបណ្តាញសង្គម Instagram ថានាងបានសម្រេចចិត្តមិនទៅទទួលពាន់វង្វាន់ ដោយសារនាងចង់បង្ហាញចេតនាមិនគាំទ្រ ចំពោះរបៀបដឹកនាំប្រទេស របស់នាយករដ្ឋមន្តី្រអ៊ីស្រាអែល លោក នេតាន់យ៉ាហ៊ូ ដែលជាអ្នកថ្លែងសុន្ទរកថាក្នុងកម្មពិធីនោះ។
តារាសម្តែងអាមេរិក ដើមកំណើតអ៊ីស្រាអែល រូបនេះ បានអះអាងថា នាងមិនមែនជាអ្នកមានមនោគមវិជ្ជា ប្រឆាំងបះបោរ នឹងប្រទេសអ៊ីស្រាអែលឡើយ។ ប៉ុន្តែក្នុងនាមជាជនជាតិអ៊ីស្រាអែល និងសាសន៍ជ្វីហ ម្នាក់ នាងមានសិទ្ឋិរិះគន់មេដឹកនាំរបស់ខ្លួន។
កាលពីថ្ងៃសុក្រ ខាងមូលនិធិពាន់រង្វាន់Genesis បានប្រាប់ថា នាង Natalie Portman បានលុបចោលការចូលរួមរបស់ខ្លួននៅក្នុងពិធីប្រគល់រង្វាន់ ដែលគ្រោងធ្វើក្នុងទីក្រុងហ្សេរុយសាឡិម នាចុងខែមិថុនា។
សូមជម្រាបថា ទីក្រុងហ្សេរុយសាឡិម គឺជាទឹកដីមានជម្លោះដណ្តើមគ្នារុំារៃ រវាងអ៊ីស្រាអែល និង ប៉ាឡេស្ទីន។ ប៉ុន្តែរដ្ឋាភិបាលអាមេរិក ដឹកនាំដោយលោកដូណាល់ ត្រាំ បានប្រកាសទទួលស្គាល់ក្រុង ហ្សេរុយសាឡឹម ជារដ្ឋធានី របស់អ៊ីស្រាអែល កាលដើមខែធ្នូ ឆ្នាំ២០១៧។ ការប្រកាសរបស់អាមេរិកនេះ បានធ្វើឲ្យកិច្ចប្រឹងប្រែងស្វែងរកសន្តិភាពរវាង អ៊ីស្រាអែល និង ប៉ាឡេស្ទីន ត្រូវធ្លាក់ក្នុងសភាពដុនដាប ដោយជំនួសមកវិញនូវកម្តៅនៃការប្រឈមមុខដាក់គ្នារវាងប្រទេសជិតខាងទាំងពីរនេះ។ ជាក់ស្តែង ការប៉ះទង្គិចរវាងបាតុករប៉ាឡេស្ទីន និងកងកម្លាំងអ៊ីស្រាអែល បានបណ្តាលឲ្យប្រជាជនប៉ាឡេស្ទីនស្លាប់កើនឡើងដល់៣៨ នាក់ នេះបើរាប់ចាប់តាំងពីថ្ងៃទី ៣០ ខែមីនា។
អ្នកតំណាងតួហូលីវូដនាង Natalie Portman បានប្រាប់ទៅម្ចាស់កម្មវិធីថា នាង Portman ខ្វល់ខ្វាយចំពោះ ព្រឹត្តិការណ៍ថ្មីៗ ដែលកើតឡើងនៅអ៊ីស្រាអែល ដូច្នេះនាងមិនចង់ចូលរួមក្នុងព្រឹត្តិការណ៍សាធារណៈណាមួយនៅក្នុងប្រទេសអ៊ីស្រាអែលទេ។ ពាក់ព័ន្ឋរឿងនេះដែរ មូលនិធិពាន់រង្វាន់Genesis មិនបានបញ្ជាក់ប្រាប់ពីព្រឹត្តិការណ៍ណាមួយឡើយ ដែលធ្វើឱ្យនាងPortman មានការព្រួយបារម្ភនោះ។
គួរកត់សម្គាល់ថា មូលនិធិ Genesis ត្រូវបានបង្កើតឡើងនៅឆ្នាំ ២០១៣ ដើម្បីប្រគល់ពាន់រង្វាន់ ដល់បុគ្គលណាដែលកសាងស្នាដៃល្អក្នុងអាជីពរបស់ខ្លួន ឬជនគំរូដ៏ល្អសម្រាប់ក្មេងៗជីហ្វជំនាន់ក្រោយ។ កើតនៅក្រុងយេហ្សេរុយសាឡិម ក្នុងគ្រួសារដែលមានឪពុកជាវេជ្ជបណ្ឌិត និងម្តាយជាអ្នកសិល្បៈ។ នាង Natalie Portman វ័យ ៣៦ ឆ្នាំ បានឈ្នះពាន់រង្វាន់អូស្ការ តារាសម្តែងដ៏ល្អបំផុតសម្រាប់ឆ្នាំ ២០១០ ផ្នែករបាំបាឡេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ