អំពើហិង្សាបានផ្ទុះជាថ្មីនៅតាមខ្សែព្រំដែនរវាងតំបន់ហ្កាហ្សា និងអ៊ីស្រាអែល
ពេញមួយថ្ងៃសុក្រ ទី៦ មេសា ខ្សែបន្ទាត់ព្រំដែនដែលខណ្ឌចែកតំបន់ហ្កាហ្សាទឹកដីប៉ាឡេស្ទីន នឹងទឹកដីអ៊ីស្រាអែលបានក្លាយជាឆាកនៃអំពើហិង្សាជាថ្មីរវាងក្រុមយុវជនប៉ាឡេស្ទីន និងទាហានអ៊ីស្រាអែល។ អំពើហិង្សាដែលបានបណ្តាលឲ្យស្លាប់ជនជាតិប៉ាឡេស្ទីនយ៉ាងតិច ៩នាក់ និងរបួសជាង ១ ០០០នាក់ផ្សេងទៀត។ សូមជម្រាបជូនថា ក្រុមយុវជនប៉ាឡេស្ទីនរាប់រយនាក់បានចូលរួមនៅក្នុងចលនាទាមទារសិទ្ធិនៃការវិលត្រឡប់វិញរបស់ជនភៀសខ្លួនប៉ាឡេស្ទីន។ ចលនាមួយនេះបានរៀបចំម្តងកាលពីថ្ងៃសុក្រ ទី៣០ មីនា និងដែលអំពើហិង្សាកាលណោះបានធ្វើឲ្យស្លាប់ជនជាតិប៉ាឡេស្ទីនយ៉ាងតិច ១៧នាក់ និងរបួសជាង ១ ៤០០នាក់។
ចុះផ្សាយនៅថ្ងៃ៖
ស្តាប់ - ០២:០៦
ថ្ងៃសុក្រ ទី៦ មេសាជាលើកទី២ ដែលអំពើហិង្សាបានផ្ទុះជាថ្មីរវាងទាហានអ៊ីស្រាអែល និងហ្វូងយុវជនប៉ាឡេស្ទីននៅតាមព្រំដែនខណ្ឌចែកតំបន់ហ្កាហ្សា និងទឹកដីអ៊ីស្រាអែល។ ក្រុមយុវជនប៉ាឡេស្ទីន និងប្រជាជនប៉ាឡេស្ទីនជាច្រើនពាន់នាក់បាននាំគ្នាធ្វើដំណើរទៅកាន់ជំរំចំនួន ៥ ស្ថិតក្បែរព្រំដែនដើម្បីចូលរួមនៅក្នុងចលនាទាមទារសិទ្ធិនៃការវិលត្រឡប់វិញរបស់ជនភៀសខ្លួនប៉ាឡេស្ទីន។ នៅពេលព្រឹកក្នុងថ្ងៃដដែល ចំនួនមនុស្សដែលចូលរួមនៅក្នុងចលនានោះមានតែប៉ុន្មានរយនាក់ប៉ុណ្ណោះ តែបានកើនដល់ទៅជិត ២០ ០០០នាក់នៅពេលរសៀល។
អ្វីជាការកត់សម្គាល់ ការកែនប្រមូលគ្នា និងចំនួនអ្នកចូលរួមលើកនេះមានតិចជាងកាលពីថ្ងៃសុក្រ ទី៣០ មីនាដែលមានដល់ទៅ ៣៥ ០០០នាក់។ ក៏ប៉ុន្តែលើកនេះ ក្រុមយុវជនប៉ាឡេស្ទីនបានប្រើវិធានការប្រឆាំងដោយនាំគ្នាដុតសំបកកង់ឡានបង្កឲ្យមានផ្សែងខ្មួលខ្មាញ់ហោះគ្របដណ្តប់ពីលើតំបន់ហ្កាហ្សា និងលើទឹកដីអ៊ីស្រាអែល។ គោលដៅនៃការដុតសំបកកង់ឡានរបស់ពួកគេ គឺបញ្ចេញផ្សែងខ្មៅងងឹតដើម្បីកុំឲ្យក្រុមទាហានអ៊ីស្រាអែលផ្នែកបាញ់ស៊ីបអាចមើលឃើញច្បាស់លើពួកគេ។ តាមទាហានអ៊ីស្រាអែល កំបាំងផ្សែងខ្មួលខ្មាញ់ក៏បានអនុញ្ញាតឲ្យយុវជនប៉ាឡេស្ទីនខ្លះបានឆ្លៀតឆ្លងចូលទឹកដីអ៊ីស្រាអែលដោយខុសច្បាប់។
នៅក្នុងអំពើហឹង្សាកាលពីសប្តាហ៍មុន មានស្លាប់ជនជាតិប៉ាឡេស្ទីនយ៉ាងតិច ១៧នាក់ និងរបួសជាង ១ ៤០០នាក់នៅក្រោមគ្រាប់កាំភ្លើងរបស់ទាហានអ៊ីស្រាអែល។ នៅលើកនេះ មានស្លាប់យ៉ាងតិច ៩នាក់ និងរបួសជាង ១ ០០០នាក់ ហើយបើសរុបទៅ មានស្លាប់នៅខាងប៉ាឡេស្ទីនយ៉ាងតិច ២៦នាក់ និងរបួសជាង ២ ៤០០នាក់។ ចំណែកនៅខាងអ៊ីស្រាអែលវិញសូម្បីតែម្នាក់ក៏គ្មានដែរ។ តែចលនាប៉ាឡេស្ទីនហាម៉ាស់បានសន្យាបន្តចលនាមួយនេះរហូតដល់ថ្ងៃទី១៥ ឧសភាដូចដែលបានគ្រោងទុក។
ដោយឡែក និងក៏ដូចជាលើកមុនដែរ អាមេរិកបានជំទាស់នឹងសំណើរបស់ប្រទេសកូវ៉ែតដែលស្នើឲ្យក្រុមប្រឹក្សាសន្តិសុខបើកកិច្ចប្រជុំបន្ទាន់មួយដើម្បីស៊ើបអង្កេតលើអំពើហិង្សារវាងប៉ាឡេស្ទីន និងអ៊ីស្រាអែលពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ