ព្យុះភ្លៀងមរណៈ សម្លាប់មនុស្ស ២០ នាក់ នៅ អេមីរ៉ាតអារ៉ាប់រួម និង បារ៉ែន
ភ្លៀងដ៏កាចសាហាវ បានសម្លាប់ផ្តាច់ជីវិតមនុស្ស ជិត ២០ ក្នុងប្រទេសអេមីរ៉ាតអារ៉ាប់រួម និងប្រទេសបារ៉ែន។ ក្រុងឌូបៃ ថ្ងៃពុធទី១៧មេសា ភ្លៀងធ្លាក់តែក្នុងរយៈ ២៤ ម៉ោងតែប៉ុណ្ណោះ ប្រៀបស្មើបាននឹងចំណុះទឹកភ្លៀងរយៈពេល ២ ឆ្នាំ ក្នុងកម្រិតធម្មតានៅអេមីរ៉ាតអារ៉ាប់រួម។ ចំណែក ក្រុងអូម៉ង់ ភ្លៀងនៅថ្ងៃអង្គារ បានបំបែកកំណត់ត្រាភ្លៀងគ្រោះថ្នាក់ខ្លាំង ក្នុងរយៈពេលជិត ៣០ ឆ្នាំចុងក្រោយនេះ នៅបារ៉ែន។ សាលារៀន គ្រឹះស្ថានសាធារណៈ និងព្រលានយន្តហោះ ត្រូវបិទទ្វារផ្អាកដំណើរការ។
ចុះផ្សាយនៅថ្ងៃ៖
ស្តាប់ - ០២:៣៣
ព្យុះភ្លៀងបោកបក់ខ្លាំង នៅអេមីរ៉ាតអារ៉ាប់រួម ប៉ះពាល់ទៅលើសង្កាត់ ៧ ក្រុងឌូបៃ ។ កម្រិតទឹកភ្លៀងធ្លាក់ខ្លាំង រយៈកម្ពស់ខ្ពស់ ៤៥៤ មីលីម៉ែត្រ ចន្លោះថ្ងៃអង្គារនិងពុធ។ ចំនួនភ្លៀងច្រើនសន្ធឹកសន្ទាប់ខ្លាំងពេក សូម្បីតែដែនដីដែលសម្បូរវាលខ្សាច់ដូចអេមីរ៉ាតអារ៉ាប់រួមទៅហើយ ក៏នៅតែពុំអាចស្រូបទឹកភ្លៀងទាន់ដែរ។ ភ្លៀងធ្លាក់ត្រឹមតែក្នុងរយៈពេល២៤ម៉ោងប៉ុណ្ណោះ ត្រូវអ្នកជំនាញវាយតម្លៃថា ស្មើនឹងចំនួនទឹកភ្លៀងធ្លាក់រយៈពេល ២ឆ្នាំឯណោះ នៅអេមីរ៉ាតអារ៉ាប់រួម។ មហន្តរាយភ្លៀងធំបែបនេះ អេមីរ៉ាតអារ៉ាប់រួម ពុំដែលជួបប្រទះនោះឡើយ ជាង៧ទសវត្សរ៍ចុងក្រោយ។
នៅប្រទេសក្បែរខាង, បារ៉ែន ក៏ជំនន់ព្យុះភ្លៀងដែរ។ នៅក្រុងអូម៉ង ភ្លៀងរយៈកម្ពស់ ៩៦,៨៨ មីលីម៉ែត្រ ក្នុង១ថ្ងៃ បានបំបែកកំណត់ត្រាភ្លៀងខ្លាំង ឆ្នាំ១៩៩៥ ដែលមានត្រឹមតែ ៦៧,៩ មីលីម៉ែត្រប៉ុណ្ណោះ។
អាកាសយានដ្ឋាននៅឌូបៃជាប់កក់ស្ទះ ដ្បិតតែជើងហោះហើរជាច្រើនត្រូវបិទផ្អាកដំណើរ។ បន្ទាប់ពីលុបជើងហោះហើរជាច្រើនរួចនៅថ្ងៃពុធ អាជ្ញាធរអាកាសចរណ៍ ក៏ប្រកាសប្រាប់អ្នកដំណើរថា បើមិនចាំបាច់បំផុត ទេនោះ សូមកុំអញ្ជើញហោះទៅក្រុងឌូបៃ គ្រានេះ។
តុល្យការបឋម នៅក្រុងឌូបៃ នគរបាលអេមីរ៉ាតអារ៉ាប់រួម ឲ្យដឹងថា យ៉ាងហោចណាស់ មានបុរសចំណាស់ម្នាក់ វ័យ ៧០ ឆ្នាំ បានទទួលអនិច្ចកម្ម ព្រោះតែឡានរបស់គាត់ត្រូវជំនន់ទឹកភ្លៀងហូរនាំយកទៅជាមួយ។ ចំណែក នៅបារ៉ែន យ៉ាងតិច មនុស្ស១៨-១៩នាក់ ត្រូវបាត់បង់ជីវិត ដែលភាគច្រើនជាកូនក្មេង។
ព្យុះភ្លៀងមរណៈ និងភ្លៀងបង្កមហន្តរាយនៅពេលនៅក្រុងឌូបៃ និងក្រុងអូម៉ង់ នៅពេលនេះ ទំនងជាស្តែងឲ្យឃើញកាន់តែច្បាស់អំពីផលប៉ះពាល់អវិជ្ជមាននៃការប្រែប្រួលអាកាសធាតុ បង្កឡើងដោយស្នាដៃមនុស្សជាតិ។ នេះបើតាមសាស្ត្រាចារ្យ Friederike Otto អ្នកជំនាញអាកាសធាតុនៅសាកលវិទ្យាល័យអង់គ្លេស Grantham Institute ក្នុងទីក្រុងឡុងដ្រ៍។
ក្រោយភ្លៀង ទឹកជន់។ នៅក្រុងឌូបៃ សង្កាត់ចំនួន ៤ នៅបន្តលិចទឹក ហើយពលរដ្ឋជាច្រើននាក់ ដាច់ចរន្តទឹកស្អាតប្រើប្រាស់។ ឡាននៅរាយប៉ាយតាមផ្លូវ។ បណ្តាផ្លូវសំខាន់ៗ ជន់លិចទឹក និងខ្លះ ដាច់ផ្លូវដោយកន្លែង។ សាលារៀន និង រថភ្លើងក្រោមដី ក៏លែងដំណើរការ។ ចំណែក នៅបារ៉ែន គ្រឹះស្ថានសិក្សា ត្រូវបិទទ្វាររហូតដល់សប្តាហ៍ក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ