លោក ស៊ិន ចាន់សេរីវុត្ថា៖នឹងមានជើងហោះហើរផ្ទាល់ពីអាមេរិកមកកម្ពុជាក្នុងពេលដ៏ឆាប់
អ្នកនាំពាក្យអាកាសចរណ៍ស៊ីវិលកម្ពុជា លោក ស៊ិន ចាន់សេរីវុត្ថា បានប្រាប់វិទ្យុបារាំងអន្តរជាតិនៅថ្ងៃពុធនេះថា នឹងមានជើងហោះហើរផ្ទាល់ពីអាមេរិក មកកម្ពុជាក្នុងពេលដ៏ឆាប់។ សេចក្ដីសម្រេចនេះធ្វើឡើងនៅក្នុងជំនួបរវាងរដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលកម្ពុជា និងលោក W phatrick Murphy ឯកអគ្គរដ្ឋទូតអាមេរិកប្រចាំកម្ពុជា កាលពីថ្ងៃចន្ទ។
ចុះផ្សាយនៅថ្ងៃ៖
សូមជម្រាបជូនថា កិច្ចព្រមព្រៀងហោះហើរត្រង់ពីអាមេរិកមកកម្ពុជា បានបើកការចរចាតាំងតែពីឆ្នាំ២០១៤ តែទើបមានការព្រមព្រៀងនៅឆ្នាំ២០២០នេះ។ ទន្ទឹមនឹងការអនុញ្ញាត្តឲ្យមានការហោះហើរត្រង់ពីអាមេរិមកកម្ពុជា នៅមានបញ្ហាមួយចំនួនទៀតដែលកម្ពុជា និងអាមេរិកជជែកមិនទាន់ត្រូវរ៉ូវគ្នា។
បញ្ហានៅត្រង់ថា មិនទាន់មានការឯកភាពនៅក្នុងប្រើប្រាស់ពាក្យបច្ចេកទេស ហើយក្រុមហ៊ុនអាកាសចរណ៍អាមេរិកចង់បានកិច្ចព្រមព្រៀងលក្ខណៈបច្ចេកទេសផ្ទាល់ខ្លួន។ ក្នុងន័យនេះ ក្រុមហ៊ុនអាកាសចរណ៍អាមេរិកទាមទារឲ្យមានការធ្វើសេវាកម្មផ្ទៃដីដោយភាគីអាមេរិកខ្លួនឯងផ្ទាល់ ដើម្បីទប់ស្កាត់បញ្ហាអន្តិសុខ។ ប៉ុន្តែការទាមទារនេះបានប៉ះពាល់ដល់កិច្ចព្រមព្រៀងសម្បទានរបស់ក្រុមហ៊ុនអាកាសចរណ៍បារាំង។ តែយ៉ាងណាមិញ អ្នកនាំពាក្យអាកាសចរណ៍ស៊ីវិលកម្ពុជា លោក ស៊ិន ចាន់សេរីវុត្ថា បានគូសបញ្ជាក់ថា នេះគ្រាន់តែបញ្ហាបន្តិចបន្តួច ដែលអាចជជែកគ្នាបាន។
អ្នកនាំពាក្យដដែលបានលើកឡើងទៀតថា កិច្ចព្រមព្រៀងហោះហើរផ្ទាល់ពីអាមេរិមកកម្ពុជាគឺជាផ្នែកមួយលើកកម្ពស់ពាណិជ្ជកម្ម ទេសចរណ៍ និងការវិនិយោគ ពីអាមេរិក ហើយបន្ថែមលើនេះ លោក W phatrick Murphy ឯកអគ្គរដ្ឋទូតអាមេរិកប្រចាំកម្ពុជា បានផ្ដល់ទំនុកចិត្តដល់កម្ពុជាថា កន្លែងណាមានការហោះហើរត្រង់របស់អាមេរិកកន្លែងនោះមានការវិវត្តន៍ដូចជាពាណិជ្ជកម្ម ទេសចរណ៍ និងការវិនិយោគជាដើម។
លោក W phatrick Murphy ក៏បានលើកឡើងនៅក្នុងជំនួបរវាងរដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិលកម្ពុជាដែរថា ត្រូវមានយន្តហោះប្រភេទBoeing ដែលផលិតនៅអាមេរិកប្រតិបត្តិកានៅដែនអាកាសកម្ពុជា។ តែយ៉ាងណាក៏ដោយ គេនៅចាំបានថា ចន្លោះឆ្នាំ១៩៩០ ដល់២០០០កម្ពុជាធ្លាប់មានយន្តហោះប្រភេទBoeing ប្រតិបត្តិការផងដែរ តែដោយសារកត្តាតម្លៃ ក្រុមហ៊ុនអាកាសចរណ៍ជាច្រើនបានប្ដូរទៅប្រើប្រាស់យន្តហោះAirbus ដែលមានតម្លៃទាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ