លោក សេង សុមុនី៖ មេគណសង្ឃតាមខេត្តត្រូវណែនាំព្រះសង្ឃកុំឲ្យនិមន្តចូលកន្លែងប្រជ្រៀតក្នុងពិធីអុំទូក
លោក សេង សុមុនី អ្នកនាំពាក្យក្រសួងធម្មការ និងសាសនា តាមរយៈវិទ្យុបារាំងអន្តរជាតិនៅថ្ងៃអាទិត្យនេះ បានអំពាវនាវឱ្យមេគណសង្ឃនៅតាមបណ្តាខេត្ត ដែលមានការរៀបចំពិធីបុណ្យអុំទូកពេលខាងមុខ ត្រូវណែនាំ ភិក្ខុ សាមណេរ ហាមនិមន្តទៅកន្លែងប្រារព្ធពិធីបុណ្យអុំទូក ដែលមានមនុស្សច្រើនកុះករ។ តាមអ្នកនាំពាក្យក្រសួងធម្មការនិងសាសនា ការនិមន្តចូលទៅកន្លែងប្រជ្រៀតមនុស្សច្រើននឹងនាំឱ្យប៉ះពាល់ដល់ការគោរពប្រតិបត្តិធម៌វិន័យសង្ឃ។
ចុះផ្សាយនៅថ្ងៃ៖
ស្តាប់ - ០២:៣៧
នៅដើមខែវិច្ឆិកាខាងមុខនេះ ការប្រារព្ធពិធីបុណ្យអុំទូកបណ្តែតប្រទីប និងសំពះព្រះខែ អកអំបុកថ្នាក់ជាតិឆ្នាំ២០២២នេះ ពុំត្រូវបានរៀបចំធ្វើឡើងនៅក្នុងទីក្រុងភ្នំពេញនោះទេ ប៉ុន្តែពិធីនេះ ធ្វើទៅបាននៅតាមបណ្តាខេត្តទូទាំងប្រទេស តាមលទ្ធភាពដែលអាចធ្វើទៅបាន។
ទន្ទឹមនឹងការរៀបចំពីធីបុណ្យអុំទូកនេះ សាលាគណខេត្តបាត់ដំបង បានចេញសេចក្តីណែនាំមួយមិនអនុញ្ញាតឱ្យព្រះសង្ឃគ្រប់អង្គនិមន្តចូលក្នុងកន្លែងប្រារព្ធពិធីតាំងពិពណ៌ បុណ្យអុំទូកនិងបណ្តែតប្រទីបនេះទេ។ តាមសេចក្តីណែនាំ សកម្មភាព និងរូបភាពចូលទៅកំសាន្តប្រជ្រៀតចូលជាមួយគ្រហស្ថ បានធ្វើឱ្យប៉ះពាល់ដល់គុណតម្លៃនៃព្រះពុទ្ធសាសនា សេចក្តីថ្លែថ្នូរ ភេទជាអ្នកបួស និងធម៌វិន័យ ដែលនាំឱ្យជះឥទ្ធិពលដល់ជំនឿសាសនា ព្រមទាំងការមិនសប្បាយចិត្តពីពុទ្ធបរិស័ទថែមទៀតផង។
ដោយឃើញថាមានការរៀបចំពិធីបុណ្យអុំទូកនៅតាមបណ្តាខេត្តជាច្រើន តែមានការចេញសេចក្តីណែនាំឃើញនៅតែខេត្តបាត់ដំបង លោក សេង សុមុនី អ្នកនាំពាក្យក្រសួងធម្មការនិងសាសនាតាមរយៈវិទ្យុបារាំងអន្តរជាតិនៅថ្ងៃទី០៩ ខែតុលា ឆ្នាំ ២០២២ អំពាវនាវដល់មេគណសង្ឃនៅតាមបណ្តាខេត្តដែលមានការរៀបចំពិធីបុណ្យអុំទូកខាងមុខត្រូវណែនាំ ភិក្ខុ សាមណេរ កុំឲ្យទៅនិមន្តចូលរួមក្នុងកន្លែងប្រារព្ធពិធីបុណ្យអុំទូកនេះដែលមានមនុស្សកុះករ។ ក្រៅពីនេះ មេគណសង្ឃនិងមន្ទីរធម្មការ និងសាសនា គួរមានកិច្ចសហការជាមួយអាជ្ញាធរតំបន់ ទប់ស្កាត់កុំអោយមានរូបភាពខាងលើនេះកើតឡើង។
លោក សេង សុមុនី បានគូសបញ្ជាក់ថា កន្លងមក ការប្រតិបត្តិធម៌វិន័យសង្ឃនៅពុំទាន់ធ្វើទៅបានដោយត្រឹមត្រូវនៅឡើយទេ។ ដ្បិតថាព្រះសង្ឃនៅតាមបណ្តាខេត្តខ្លះ មានកាតព្វកិច្ចរួមចំណែកដឹកនាំក្រុមប្រណាំងទូកមកប្រកួត មើលខុសត្រូវទូក និងមើលសមត្ថភាពក្រុមប្រណាំងទូកក៏ដោយ តែក្រសួងជារឿយៗតែងធ្វើការណែនាំឱ្យសង្ឃអង្គនោះសំងំនៅក្នុងវត្តក្បែរនោះ ឬ នៅក្នុងរោងពន្លាជ័យទូកដែលជាកន្លែងចំណុះទូកចត ដើម្បីកុំអោយមានការប៉ះពាល់វិន័យសង្ឃ និងដើម្បីលើកកម្ពស់កិត្តិយស និងសេចក្តីថ្លៃថ្នូររបស់ព្រះពុទ្ធសាសនា។ ប៉ុន្តែនៅមានព្រះសង្ឃអង្គខ្លះ នៅតាមតំបន់មួយចំនួន បានអនុវត្តន៍ប្រាសចាកក្រមប្រតិបត្តិធម៌ មកកំសាន្ត ដោយការចូលប្រជ្រៀតជាមួយគ្រហស្ថទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ