ព្រឹទ្ធសភាអាមេរិកសម្រេចឲ្យលោកដូណាល់ ត្រាំរួចខ្លួនលើបទញុះញង់ឲ្យមានអំពើហិង្សា
ចុះផ្សាយនៅថ្ងៃ៖
ស្តាប់ - ០៦:៥៦
ព្រឹទ្ធសភាអាមេរិកបានសម្រេចកាលពីថ្ងៃសៅរ៍ ទី១៣ កុម្ភៈម្សិលមិញថាលោកដូណាល់ ត្រាំ គ្មានទោសកំហុសឡើយពាក់ព័ន្ធនឹងបទចោទប្រកាន់ថាបានញុះញង់ឲ្យមានការបះបោរ។ ជាការបះបោរសម្រុកចូលលុកលុយដោយហិង្សានៅវិមានកាពីតូលរហូតបណ្តាលឲ្យមនុស្ស ៥ នាក់ស្លាប់ កាលពីថ្ងៃទី ៦ ខែមករាកន្លងទៅ។ ក្រោយព្រឹទ្ធសភាសម្រេចទម្លាក់ចោលនូវបទចោទប្រកាន់នេះតើនឹងមានអ្វីកើតឡើងបន្ទាប់ទៀតចំពោះលោកត្រាំ និងសហរដ្ឋអាមេរិក?
សវនាការជំនុំជម្រះទោសលោកអតីតប្រធានាធិបតីអាមេរិកដូណាល់ ត្រាំ
ព្រឹទ្ធសភាអាមេរិកបានចាប់ផ្តើមជំនុំជម្រះក្តីទម្លាក់លោកដូណាល់ ត្រាំ ចេញពីតំណែងចាប់តាំងពីថ្ងៃអង្គារទី ៩ខែកុម្ភៈ ឆ្នាំ ២០២១ មក។ ត្រឹមតែរយៈពេលដ៏ខ្លីពោលគឺរយៈពេលត្រឹមតែ ៥ ថ្ងៃ ប៉ុណ្ណោះ ការជំនុំជម្រះទោសលោកអតីតប្រធានាធិបតីអាមេរិកដូណាល់ ត្រាំ បានបញ្ចប់កាលពីរសៀសថ្ងៃសៅរ៍ម្សិលមិញ ម៉ោងនៅក្នុងសហរដ្ឋអាមេរិក។
រីឯលទ្ធផលវិញគឺវាដូចអ្វីដែលក្រុមអ្នកវិភាគបានព្យាករណ៍ទុកមែន គឺលោក ត្រាំ បានរួចខ្លួន គ្មានទោសកំហុសអ្វីឡើយពីបទញុះញង់ឲ្យមានការបះបោរ ចូលលុកលុយដោយហិង្សានៅឯវិមានកាពីតូល ដែលជានិមិត្តរូបនៃលទ្ធិប្រជាធិបតេយ្យអាមេរិកកាលពីខែមុន។
ជាថ្មីម្តងទៀតលោកនិងជាលើកទី២ហើយ ដែលលោកប្រធានាធិបតីទី៤៥ របស់អាមេរិករូបនេះបានរួចខ្លួនពីការផ្តន្ទាទោសដោយព្រឹទ្ធសភា ក៏ព្រោះតែសមាជិកសភាភាគច្រើន មកពីគណបក្សសាធារណៈរដ្ឋនៅតែបន្តគាំទ្ររូបលោក។
នេះគឺជាមូលហេតុដែលធ្វើឲ្យព្រឹទ្ធសភាមិនអាចទទួលបានសំឡេងគ្រប់គ្រាន់ចំនួន ២ ភាគ ៣ ឬស្មើនឹង ៦៧សំឡេង ដើម្បីអាចកាត់ទោសលោកដូណាល់ ត្រាំ ពីបទញុះញង់ឲ្យមានការចូលលុកលុយនៅវិមានកាពីតូលកាលពីថ្ងៃទី ៦ ខែមករាបាន។
នៅក្នុងសវនាការកាលពីរសៀលថ្ងៃសៅរ៍ម្សិលមិញនេះ សមាជិកព្រឹទ្ធសភាសរុបទាំងអស់ចំនួន ១០០នាក់ បានបោះឆ្នោតក្នុងសំឡេង ៥៧ ទល់នឹង៤៣។ ក្នុងចំណោមសំឡេងគាំទ្រទាំង ៥៧ មាន ៥០ ជាសំឡេងឆ្នោតរបស់សមាជិកព្រឹទ្ធសភាមកពីខាងគណបក្សប្រជាធិបតេយ្យ ហើយ ៧ សំឡេងផ្សេងទៀត គឺជារបស់សមាជិកព្រឹទ្ធសភាមកពីខាងគណបក្សសាធារណរដ្ឋរបស់លោកត្រាំ។
ជារួមមក ព្រឹទ្ធសភាអាមេរិកមិនអាចផ្តន្ទាទោសលោកត្រាំពីបទចោទប្រកាន់ថាបានញុះញង់ឲ្យមានអំពើហិង្សាបានទេដោយខ្វះសំឡេងគាំទ្រចំនួន ១០ សំឡេង។
ជាការគួរឲ្យកត់សម្គាល់ដែរក្រោយនីតិវិធីដកតំណែងលោកបានបិទបញ្ចប់ លោកដូណាល់ ត្រាំ បានចេញសេចក្តីថ្លែងការណ៍មួយដោយថ្កោលទោសការកាត់ក្តីនេះថាជាការតាមប្រមាញ់ធ្វើបាបលោកមិនលែងដៃនិងមិនធ្លាប់មាននៅក្នុងប្រវត្តិសាស្ត្រអាមេរិក។
ក្រោយព្រឹទ្ធសភាសម្រេចទម្លាក់ចោលនូវបទចោទប្រកាន់នេះ តើនឹងមានអ្វីកើតឡើងបន្ទាប់ទៀតចំពោះលោកត្រាំ?
រួចខ្លួនពីការផ្តន្ទាទោសជាលើកទី២ ក្នុងដំណើរការទម្លាក់តំណែងអាចចាត់ទុកថាលោកដូណាល់ ត្រាំ ទទួលបានជោគជ័យនិងធូរស្រាលខ្លួនបានខ្លះ។ ក្រោយការសម្រេចរបស់ព្រឹទ្ធសភាបែបនេះ វាបង្ហាញថាលោកដូណាល់ ត្រាំ នៅតែមានសិទ្ធិអាចឈរឈ្មោះសម្រាប់ការបោះឆ្នោតប្រធានាធិបតីជាថ្មីម្តងទៀតនាឆ្នាំ ២០២៤ ខាងមុខ ប្រសិនបើលោកចង់និងជ្រើសរើសធ្វើដូច្នោះ។
ហើយនេះក៏មានន័យថា ការប៉ុនប៉ងរបស់ក្រុមអ្នកប្រជាធិបតេយ្យ ក្នុងការបិទផ្លូវលោកដូណាល់ ត្រាំ មិនឲ្យអាចឈរឈ្មោះសម្រាប់មុខតំណែងសាធារណៈផ្សេងៗ ជាពិសេសឈរឈ្មោះជាប្រធានាធិបថ្មីសាជាថ្មី ត្រូវរលាយបាត់រូបរាងដូចជាអំបិលត្រូវទឹកអីចឹង។
យ៉ាងណាក៏ដោយ ការសម្រេចរបស់ព្រឹទ្ធសភាមិនមែនជាជោគជ័យដ៏ត្រចះត្រចង់ខ្លាំងណាស់ណាឡើយសម្រាប់លោកត្រាំ។ ហេតុអ្វី?
ការដែលព្រឹទ្ធសភាអាមេរិក បានសម្រេចឲ្យលោកដូណាល់ ត្រាំ រួចខ្លួនលើបទចោទប្រកាន់ គឺគ្រាន់តែជោគជ័យមួយផ្នែកប៉ុណ្ណោះ ពីព្រោះថារួចទោសពីបទញុះញង់ឲ្យមានអំពើហិង្សាក៏ពិតមែន តែលោកអតីតប្រធានាធិបតីអាមេរិករូបនេះ នៅត្រូវប្រឈមមុខនឹងបទចោទប្រកាន់ជាច្រើនទៀត។
គួរជ្រាបដែរថាបទចោទប្រកាន់ផ្សេងទៀតដែលលោកត្រាំ កំពុងប្រឈមគឺជាប់ពាក់ព័ន្ធនឹងករណីក្លែងបន្លំពន្ធ និងការបោកប្រាស់លើរឿងធានារ៉ាប់រងជាដើម។ ដូច្នោះហើយ បើលោកដូណាល់ ត្រាំ អាចរួចខ្លួនផុតទោសពីបទចោទប្រកាន់ទាំងអស់ទើបគេអាចចាត់ទុកថាវាជាជោគជ័យមួយដ៏ត្រចះត្រចង់បំផុតសម្រាប់រូបលោក។
តើសេចក្តីសម្រេចរបស់ព្រឹទ្ធសភាអាមេរិកមានអត្ថន័យយ៉ាងណាសម្រាប់លោកបៃដិន?
ទាក់ទងរឿងនេះ ជាដំបូងគេគួរដឹងថា លោកចូ បៃដិន ដែលជាអ្នកប្រជាធិបតេយ្យមួយរូបនិងជាប្រធានាធិបតីបច្ចុប្បន្នរបស់សហរដ្ឋអាមេរិក មិនគាំទ្រឡើយតាំងពីដំបូងអឺយម្ល៉េះចំពោះដំណើរការទម្លាក់តំណែងលោកដូណាល់ ត្រាំ ទាំងតក់ក្រហល់។ សម្រាប់លោកបៃដិន ការចោទប្រកាន់ទម្លាក់លោកត្រាំចេញពីតំណែងនៅគឺជារឿងអាចនឹងធ្វើឲ្យមានការប្រេះឆាបាក់បែកកាន់តែខ្លាំងនៅក្នុងសង្គមជាតិអាមេរិក។
យ៉ាងណាក៏ដោយ សម្រាប់លោកចូ បៃដិន បើទោះបីជាលោកត្រាំបានរួចខ្លួនពីការចោទប្រកាន់ក៏ដោយក៏នីតិវិធីដកតំណែងលោកនេះ បានបង្ហាញពីលទ្ធិប្រជាធិបតេយ្យផុយស្រួយមួយទៅហើយនៅក្នុងសហរដ្ឋអាមេរិក។
ដោយឡែក បើយោងទៅតាមសម្តីរបស់មន្ត្រីសេតវិមានអាមេរិកដែលមានចុះផ្សាយនៅក្នុងសារព័ត៌មាន BBC លោកចូ បៃដិន មិនដែលបានតាមដានឡើយរឿងពាក់ព័ន្ធនឹងនីតិវិធីចោទប្រកាន់ទម្លាក់លោកត្រាំពីតំណែង។ ក្នុងអំឡុងពេលនៃដំណើរការជំនុំជម្រះទោសលោកត្រាំ លោកបៃដិន គិតតែពីដោះស្រាយបញ្ហាជាច្រើនទាក់ទងនឹងជំងឺរាតត្បាតកូវីដ១៩ និងការជួយស្រោចស្រង់ប្រទេសពីវិបត្តិសេដ្ឋកិច្ចដែលជាចំណុចអាទិភាពរបស់រដ្ឋបាលអាមេរិកថ្មី។
ជាចុងបញ្ចប់នេះគួរបញ្ជាក់ជូនដែរថា បន្ទាបពីបានបញ្ចប់នីតិវិធីដកតំណែងអតីតប្រធានាធិបតីលោកដូណាល់ ត្រាំ ព្រឹទ្ធសភានឹងត្រូវបន្តការងារសំខាន់ផ្សេងទៀត សម្រាប់ប្រទេសអាមេរិកទាំងមូល។ ក្នុងនោះរួមមានការបញ្ជាក់អំពីការតែងតាំងមន្ត្រីថ្មីក្នុងជួររដ្ឋបាលលោកបៃដិន និងត្រូវពិនិត្យមើលផងដែរលើគោលនយោបាយថ្មីរបស់លោកចូ បៃដិន ខណៈសហរដ្ឋអាមេរិកកំពុងព្យាយាមយ៉ាងខ្លាំងដោះស្រាយទល់នឹងបញ្ហាកូវីដ និងវិបត្តិសេដ្ឋកិច្ចធ្ងន់ធ្ងរដែលកំពុងកើតមាននៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ