ហ្វេសប៊ុកសម្រេចបិទគណនីទាំងអស់ដែលមានជាប់ពាក់ព័ន្ធនឹងរបបសឹកភូមា
ចុះផ្សាយនៅថ្ងៃ៖
ស្តាប់ - ០៧:៥៦
ក្រុមហ៊ុនហ្វេសប៊ុកបានសម្រេចបិទរាល់គណនី ទំព័រហ្វេសប៊ុកដែលមានជាប់ទាក់ទងកងទ័ពភូមា នៅក្រោមហេតុផលថា របបសឹកភូមាបានប្រើអំពើហិង្សា ធ្ងន់ធ្ងរទៅលើបាតុករ ទាមទារលទ្ធិប្រជាធិបតេយ្យ។ នេះបើតាមសេចក្តីប្រកាសរបស់ក្រុមហ៊ុនអាមេរិកាំង ចេញផ្សាយនៅ ថ្ងៃព្រហស្បតិ៍នេះ។ ក្រុមហ៊ុនហ្វេសប៊ុកបានសម្រេចបិទចោលគណនីហ្វេសប៊ុករបស់កងទ័ពដែលនៅសេសសល់ នៅបន្ទាប់ពីបានបិទទំព័រផ្សាយព័ត៌មានដ៏សំខាន់ របស់កងទ័ពភូមា កាលពី សប្តាហ៍មុន។
នៅក្នុងសេចក្តីប្រកាសព័ត៌មាន នៅថ្ងៃនេះ ក្រុមហ៊ុនហ្វេសប៊ុក បានសម្រេច ហាមឃាត់ លែងឲ្យកងទ័ពភូមាអាចប្រើបណ្តាញសង្គម ហ្វេសប៊ុក និងInstagram របស់ខ្លួន ចាប់តាំងពី ថ្ងៃព្រហស្បតិ៍នេះតទៅ។ ហេតុផលដែលធ្វើឲ្យក្រុមហ៊ុនហ្វេសប៊ុកសម្រេចបិទទំព័រ គណនីរបស់កងទ័ពភូមា គឺ របបសឹកភូមាបានប្រើអំពើហិង្សា ធ្ងន់ធ្ងរទៅលើបាតុករ ទាមទារលទ្ធិប្រជាធិបតេយ្យនៅភូមា។
ហ្វេសប៊ុកបានលើកឡើងថា ព្រឹត្តិការណ៍ដែលកើតឡើង នៅក្រោយរដ្ឋប្រហារយោធានៅភូមា ជាពិសេស ការបង្រ្កាបហិង្សា ទៅលើបាតុករភូមា ជាហេតុផលសំខាន់ដែលជំរុញឲ្យហ្វេសប៊ុកសម្រេចបិទទាំងស្រុង និងជារៀងរហូត រាល់គណនី ទំព័រហ្វេសប៊ុក ដែលជាប់ពាក់ព័ន្ធនឹងកងទ័ពភូមា។ គណនីដែលហ្វេសប៊ុក សម្រេចបិទនៅថ្ងៃ នេះ មានគណនី របស់កងទ័ពជើងអាកាស កងទ័ពជើងទឹក ហើយនិងក្រសួងការពារជាតិភូមា។ ក្រុមហ៊ុនពាណិជ្ជកម្ម ដែលមានជាប់ទាក់ទងនឹងកងទ័ពភូមា ក៏ត្រូវហាមមិនឲ្យផ្សាយពាណិជ្ជកម្មលើទំព័រហ្វេសប៊ុកដែរ។
នៅមុន សម្រេចបិទគណនីរបស់កងទ័ពភូមា ដែលនៅសេសសល់ ហ្វេសប៊ុក ធ្លាប់បានបិទទំព័រហ្វេសប៊ុកជាច្រើន ដែលមានតាំងពីប្រព័ន្ធផ្សព្វផ្សាយរដ្ឋ និងឯកជន ដែលគ្រប់គ្រងដោយកងទ័ពភូមា។ នៅ សប្តាហ៍មុន ហ្វេសប៊ុក បានសម្រេចបិទទំព័រហ្វេសប៊ុកឈ្មោះ ថា True News ដែលកងទ័ពភូមាប្រើជាមធ្យោបាយសម្រាប់ផ្សព្វផ្សាយរហូតមក ពីវិធានការ ឬសារព្រមាន ដល់អ្នកដែលហ៊ានធ្វើបាតុកម្ម នៅក្រោយរដ្ឋប្រហារ ជាដើម។ ហ្វេសប៊ុកបានសម្រេចបិទ ទំព័រហ្វេសប៊ុករបស់ក្រសួងព័ត៌មានរបស់កងទ័ពភូមា ឈ្មោះ True News ក៏ព្រោះថា True News ផ្សព្វផ្សាយថា មានភាពមិនប្រក្រតី ការបន្លំ នៅក្នុងការបោះឆ្នោត ដែលជាហេតុផលសំខាន់ធ្វើឲ្យកងទ័ពត្រូវធ្វើរដ្ឋប្រហារ ទម្លាក់រដ្ឋាភិបាលលោកស្រីអ៊ុងសាន ស៊ូជី។
ចាប់តាំងពីកើតមានរដ្ឋប្រហារ ហ្វេសប៊ុកបានសម្រេចបិទគណនីហ្វេសប៊ុក របស់ទូរទស្សន៍ ឬ កាសែតគ្រប់គ្រងដោយកងទ័ពភូមា ដែលដើរតួនាទីសំខាន់ ក្នុងការផ្សព្វផ្សាយឃោសនាបុព្វហេតុធ្វើរដ្ឋប្រហាររបស់កងទ័ពភូមា។
ប៉ុន្តែ យ៉ាងណាក៏ដោយ ទំព័ហ្វេសប៊ុក របស់ស្ថាប័នដែលគ្រប់គ្រងដោយរបបសឹក ដូចជាក្រសួងអប់រំ ឬក្រសួងសុខាភិបាល គឺមិនត្រូវប៉ះពាល់ ដោយវិធានការបិទរបស់ក្រុមហ៊ុនហ្វេសប៊ុកលើកនេះទេ។
តើវិធានការរបស់ហ្វេសប៊ុកនឹងអាចប៉ះពាល់ដល់កងទ័ពភូមា
នៅភូមា ពាក្យថា អ៊ីនធ័រនែត គឺមានន័យថា ហ្វេសប៊ុក។ នៅប្រទេសដែលទើបផ្តើមបើកឲ្យមានការប្រើអ៊ីនធ័រនែតទូលំទូលាយ នៅឆ្នាំ ២០១៣ ហ្វេសប៊ុកបានគ្របដណ្តប់បណ្តាញទំនាក់ទំនងភាគច្រើន នៅភូមា។ ហ្វេសប៊ុកត្រូវគេប្រើគ្រប់កន្លែង គ្រប់ពេលវេលា និងសម្រាប់គ្រប់រឿង មិនថា សម្រាប់ទាក់ទង ឬទទួលព័ត៌មាននានា។ ប្រជាជនភូមាភាគច្រើនសុទ្ធតែប្រើហ្វេសប៊ុក សម្រាប់តភ្ជាប់ជាមួយពិភពលោកខាងក្រៅ។
សូម្បីកងទ័ពភូមា ក៏បានប្រើបណ្តាញសង្គមហ្វេសប៊ុក នេះដែរ សម្រាប់ជាមធ្យោបាយផ្សព្វផ្សាយផ្តាច់មុខរបស់ខ្លួន។
ប៉ុន្តែ កងទ័ព ភូមាត្រូវបានផាត់ចេញ បន្តិចម្តងៗ ពីបណ្តាញសង្គម ហ្វេសប៊ុក គឺ តាំងពីកើតមាន រឿងអំពើហិង្សាទៅលើជនជាតិរូហ៊ីងយ៉ា នៅរដ្ឋរ៉ាឃីន នៅឆ្នាំ២០១៧ម្ល៉េះ។ នៅឆ្នាំ ២០១៨ ហ្វេសប៊ុកបានលុបចោលគណនីហ្វេសប៊ុករបស់មេទ័ពភូមា លោកមីន អ៊ុងឡាំង នៅក្រោយ របាយការណ៍របស់អង្គការសហប្រជាជាតិចោទប្រកាន់លោកថា ជាអ្នកទទួលខុសត្រូវម្នាក់នៃអំពើប្រល័យពូជសាសន៍ ទៅលើជនជាតិរ៉ូហ៊ីងយ៉ា។ ទំព័រហ្វេសប៊ុករបស់ថ្នាក់ដឹកនាំយោធាភូមាជាច្រើនរូបផ្សេងទៀត ក៏ត្រូវបានបិទជាបន្តបន្ទាប់ដែរ។ មេទ័ពភូមា និងមន្រ្តីជាន់ខ្ពស់ភូមាផ្សេងទៀត លែងមានគណនី ហ្វេសប៊ុកផ្ទាល់ខ្លួន តាំងពីច្រើនឆ្នាំមកហើយ ប៉ុន្តែ ពួកគេនៅតែអាចបង្កើតគណនីបន្លំឈ្មោះ ផ្សេងទៀត ឬប្រើស្ថាប័នកងទ័ពសម្រាប់ បង្កើតគណនីហ្វេសប៊ុក ដើម្បីផ្សព្វផ្សាយការងារ ស្នាដៃរបស់កងទ័ពភូមា។
ដូច្នេះ បើសិន ហ្វេសប៊ុក សម្រេចបិទទាំងស្រុង គ្រប់គណនីហ្វេសប៊ុក ដែលមានជាប់ទាក់ទង នឹងកងទ័ពភូមា នោះ កងទ័ពភូមា បា្រកដជាបាត់បង់មធ្យោបាយ ផ្សព្វផ្សាយដ៏សំខាន់មួយរបស់ខ្លួនមិនខាន។ អ្វីដែលគេបារម្ភនៅពេលនេះ គឺថា របបសឹកភូមាអាចសងសឹកវិញ ពោលគឺបិទមិនឲ្យប្រើហ្វេសប៊ុកក្នុងប្រទេសភូមា ដូចដែលធ្លាប់កើតមាននៅ ប្រទេសចិន។ រឿងនេះប្រហែលអាចទៅរួច ព្រោះថា នៅក្រោយរដ្ឋប្រហារយោធា ដើម្បី ទប់ស្កាត់កុំឲ្យប្រជាជនបះបោរ ប្រកូកប្រកាសតាមហ្វេសប៊ុក ឲ្យចុះថ្នល់ធ្វើបាតុកម្ម របបសឹកភូមាបានកាត់ផ្តាច់អ៊ីនធ័រនែត ជាញយដង និងបានបិទមួយរយៈបណ្តាញសង្គម ដែលនៅក្នុងនោះមានផងដែរ ហ្វេសប៊ុក។ ប៉ុន្តែ បើសិនរបបសឹកភូមាសងសឹកបិទហ្វេសប៊ុកវិញ នោះប្រជាជនភូមាក៏នៅតែរកមធ្យោបាយ ដើម្បីទាក់ទងគ្នាបានដែរ។ ទីណា មានការគាបសង្កត់ ទីនោះ មានការរើបំរះ។ ជាក់ស្តែង នៅក្រោយ យោធាផ្តាច់អ៊ីនធ័រនែត ជាច្រើនថ្ងៃ និងបិទហ្វេសប៊ុក សកម្មជនជាច្រើនបានចូលទៅ ភ្ជាប់បណ្តាញ VPNដើម្បីអាចចូលទៅប្រើហ្វេសប៊ុក ប្រើបណ្តាញ ទូរស័ព្ទ ទាក់ទងគ្នា ឬ ប្រើមធ្យោបាយចាស់បុរាណ ដោយចុះ ថ្នល់ជួបមុខគ្នាតែម្តង ដើម្បី ធ្វើបាតុកម្មប្រឆាំងរដ្ឋប្រហារ ដោយមិនចាំបាច់ត្រូវការហ្វេសប៊ុក ឬអ៊ីនធ័រនែតអ្វីនោះទេ។
ហេតុអ្វី ហ្វេសប៊ុកទើបតែមកសម្រេច ចាត់វិធានការ នៅពេលនេះ?
ដោយប្រកាសបិទរាល់គណនីហ្វេសប៊ុក ដែលមានជាប់ទាក់ទង របបសឹកភូមា ក្រុមហ៊ុនអាមេរិកាំងហ្វេសប៊ុកហាក់ប្រកាន់ជំហរ នៅខាង ប្រជាជនភូមាដែលធ្វើបាតុកម្មប្រឆាំង រដ្ឋប្រហារ ថ្ងៃទី ១កុម្ភៈ។ ហ្វេសប៊ុកធ្វើដូច្នេះ គឺដើម្បីជៀសវាង ជាន់ដានចាស់ នៅពេលហ្វេសប៊ុកត្រូវរងការចោទប្រកាន់ថា ស្ពឹកស្រពន់ ឬបានចូលរួម ផ្សព្វផ្សាយឲ្យមានអំពើហិង្សា ការស្អប់ រើសអើង នៅលើបណ្តាញសង្គមរបស់ខ្លួន នៅក្នុងអំឡុង វិបត្តិជនជាតិរ៉ូហ៊ីងយ៉ា។
ត្រូវដឹងថា គឺនៅលើបណ្តាញហ្វេសប៊ុក ដែលប្រមុខសង្ឃ ជាតិនិយមភូមាបានបង្ហោះផ្សាយថា ក្មេងស្រីភូមា កាន់ពុទ្ធសាសនាត្រូវអ្នកកាន់សាសនាអ៊ីស្លាមចាប់រំលោភ។ ការបង្ហោះផ្សាយនៅពេលនោះបានបង្កឲ្យជម្លោះ សម្លាប់គ្នារវាងសហគមន៍សាសនាទាំងពីរនៅភូមា។ នៅឆ្នាំ ២០១៧ ដល់វេនកងទ័ពភូមា ដែលប្រើបណ្តាញសង្គមហ្វេសប៊ុក សម្រាប់ផ្សព្វផ្សាយ ចោទប្រកាន់ថា ជនជាតិរ៉ូហ៊ីងយ៉ា ជាក្រុមគ្រោះថ្នាក់ ជាភេរវជន វាយប្រហារលើកងទ័ព និងប្រជាជនភូមា។ កងទ័ពភូមាបានផ្សព្វផ្សាយសារជាច្រើនដែលមានលក្ខណៈ ញុះញង់ ឲ្យមានការរើសអើង ស្អប់ និងការប្រព្រឹត្តិអំពើហិង្សា លើជនជាតិរ៉ូហ៊ីងយ៉ា។ ប៉ុន្តែ កាលណោះ ហ្វេសប៊ុកមិនបានចាត់វិធានការអ្វីច្រើនទេ ដែលជាហេតុធ្វើឲ្យហ្វេសប៊ុករងការរិះគន់ខ្លាំងមែនទែន ពី សហគមន៍អន្តរជាតិ។ លើកនេះ ហ្វេសប៊ុក បានឆាប់សម្រេចបិទរាល់គណនីហ្វេសប៊ុកទាំងអស់ដែលមានជាប់ពាក់ព័ន្ធនឹងកងទ័ពភូមា។ ប៉ុន្តែ សម្រាប់អ្នកជំនាញមួយចំនួន ចំណាត់ការរបស់ហ្វេសប៊ុកនៅតែយឺតយ៉ាវ ព្រោះថា ហ្វេសប៊ុកបានបណ្តោយឲ្យប្រព័ន្ធផ្សព្វផ្សាយរបស់កងទ័ព ប្រើបណ្តាញសង្គម ផ្សព្វផ្សាយព័ត៌មានមិនពិតជាច្រើន ទាក់ទងនឹងការបោះឆ្នោត។ តិចឬច្រើន ហ្វេសប៊ុកបានចូលរួមឲ្យមានព្រឹត្តិការណ៍ ធ្វើរដ្ឋប្រហារនៅភូមា ព្រោះថា នៅក្រោយ ផ្សព្វផ្សាយបំផុសបំផុលនៅតាមបណ្តាញសង្គមហ្វេសប៊ុក ថា មានការក្លែងបន្លំនៅក្នុងការបោះឆ្នោត កងទ័ព ក៏មានលេស ប្រកាសធ្វើរដ្ឋប្រហារទម្លាក់ រដ្ឋាភិបាលលោកស្រីអ៊ុងសាន ស៊ូជីតែម្តង។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ