AstraZeneca៖ តើសហភាពអឺរ៉ុប និងអង់គ្លេសកំពុងផ្ទុះសង្រ្គាមដណ្តើមវ៉ាក់សាំងគ្នា?
ចុះផ្សាយនៅថ្ងៃ៖
ស្តាប់ - ០៨:៣៤
អង់គ្លេស និងសហភាពអឺរ៉ុប បានប៉ះសំដីគ្នា នៅបន្ទាប់ពីសហភាពអឺរ៉ុបព្រមានបិទខ្ទប់ការនាំចេញវ៉ាក់សាំង AstraZeneca ដែលផលិតឡើងក្នុងទឹកដី អឺរ៉ុប។ សហភាពអឺរ៉ុបត្រូវសម្រេចរឿងបិទខ្ទប់ ការនាំចេញវ៉ាក់សាំង AstraZenecaនៅក្នុងជំនួបកំពូលអឺរ៉ុបដែលត្រូវធ្វើនៅថ្ងៃព្រហស្បតិ៍ និងថ្ងៃសុក្រចុងសប្តាហ៍នេះ។
តាំងពីថ្ងៃ អាទិត្យ នាយករដ្ឋមន្រ្តី អង់គ្លេស បូរីស ចនសុន បានបង្កើនកិច្ចសន្ទនាតាមទូរស័ព្ទ ដើម្បីបញ្ចុះបញ្ចូលមេដឹកនាំបារាំង អាល្លឺម៉ង់ ហូឡង់ និងបែលហ្ស៊ិកជាដើម កុំឲ្យចាត់វិធានការបិទខ្ទប់ការនាំចេញវ៉ាក់សាំង AstraZeneca។
នាយករដ្ឋមន្រ្តីអង់គ្លេស សម្រុកចរចាទ្វេភាគីជាមួយមេដឹកនាំបណ្តាប្រទេសសមាជិកសហភាពអឺរ៉ុប នៅមុនពេលសហភាពអឺរ៉ុបត្រូវបើកជំនួបកំពូល នៅថ្ងៃព្រហស្បតិ៍ ទី ២៥មីនា ដើម្បី សម្រេចថា នៅក្នុងកាលៈទេសៈដែលអឺរ៉ុបកំពុងខ្វះវ៉ាក់សាំង ដោយសារតែការផ្គត់ផ្គង់យឺតយ៉ាវ និងមិនគ្រប់ចំនួនពីក្រុមហ៊ុនផលិតវ៉ាក់សាំង តើអឺរ៉ុប ត្រូវ បិទខ្ទប់ការនាំចេញ វ៉ាក់សាំង ដែលផលិតនៅទឹកដីអឺរ៉ុបដែរឬទេ។
នៅពេលបារាំង អាល្លឺម៉ង់ និងអ៊ីតាលី គាំទ្រវិធានការបិទខ្ទប់វ៉ាក់សាំង ដែលផលិតឡើងនៅទឹកដីអឺរ៉ុប នៅក្នុងបរិបទ ដែលក្រុមហ៊ុន AstraZenecaផ្គត់ផ្គង់ វ៉ាក់សាំងមិនគ្រប់ចំនួនឲ្យអឺរ៉ុបនោះ ប្រទេសហូឡង់ និងបែលហ្ស៊ីក ដែលតាំងទី រោងចក្រផលិតវ៉ាក់សាំង ក្នុងទឹកដី របស់ខ្លួន មានអរិភាព និងទាមទារឲ្យមានដំណោះស្រាយរួម ណាមួយ ដើម្បី ឲ្យប៉ះពាល់ប្រយោជន៍របស់គ្រប់ភាគី។
ដោយសារតែក្រុមហ៊ុនអង់គ្លេស ស៊ុយអែត នៅតែយឺតយ៉ាវ និងផ្គត់ផ្គង់វ៉ាក់សាំង AstraZeneca មិនគ្រប់តាមចំនួនកុម្ម៉ង់ ប្រធានគណៈកម្មការអឺរ៉ុបបានព្រមានកាលពីថ្ងៃសៅរ៍ ថា សហភាពអឺរ៉ុបនឹងអាចបិទខ្ទប់ការនាំចេញវ៉ាក់សាំង AstraZeneca ដែលផលិតក្នុងទឹកដី អឺរ៉ុបវិញ។ រដ្ឋមន្រ្តីការពារជាតិអង់គ្លេសបានចេញមុខ ព្រមានសហភាពអឺរ៉ុបពីផលវិបាក បើសិន ចាត់វិធានការបិទខ្ទប់មិនឲ្យនាំចេញវ៉ាក់សាំង AstraZeneca ចេញពីទឹកដីអឺរ៉ុបមែន។
អង់គ្លេសភ័យខ្លាច ខ្វះវ៉ាក់សាំង សម្រាប់ចាក់ដូសទី ២ឲ្យប្រជាជនរបស់ខ្លួន
អង់គ្លេស ចូលខ្លួនមកពាក់ព័ន្ធ លើកនេះ ដោយសារថា ការសម្រេចណាមួយរបស់សហភាពអឺរ៉ុប នៅថ្ងៃព្រហស្បតិ៍ នឹងអាចប៉ះពាល់ដល់យុទ្ធនាការចាក់វ៉ាក់សាំងក្នុងប្រទេសអង់គ្លេស។ នៅក្នុងជំនួបកំពូល អឺរ៉ុប នៅថ្ងៃព្រហស្បតិ៍ មេដឹកនាំប្រទេសសមាជិកទាំង ២៧របស់សហភាពអឺរ៉ុបត្រូវសម្រេចថា តើគេត្រូវ រារាំង ការនាំចេញវ៉ាក់សាំង AstraZenecaដែលផលិតនៅ ទឹកដី អឺរ៉ុបដែរឬទេ។ សហភាពអឺរ៉ុបកំពុងផ្តោតទៅលើការផលិតវ៉ាក់សាំង AstraZeneca នៅ រោងចក្រ មួយកន្លែង ឈ្មោះ Halix ក្នុងតំបន់Leyde ក្នុងប្រទេសហូឡង់ ដែលមានស្តុកទុកវ៉ាក់សាំង AstraZeneca១៥លានដូស និងដែលមានសមត្ថភាព ផលិតវ៉ាក់សាំង AstraZeneca ៥លានដូស ក្នុងមួយខែ។
តាមក្រុមហ៊ុន AstraZeneca រោងចក្រ ក្នុងប្រទេសហូឡង់ ត្រូវផលិតវ៉ាក់សាំង សម្រាប់ការផ្គង់ផ្គង់នៅប្រទេសអង់គ្លេស ហើយនិងសហភាពអឺរ៉ុប។ ប៉ុន្តែ ដោយសារទីភ្នាក់ងារឱសថអឺរ៉ុប នៅមិនទាន់ផ្តល់ ប័ណ្ណអនុញ្ញាតទទួលស្គាល់វ៉ាក់សាំង AstraZenecaផលិតនៅហូឡង់ វ៉ាក់សាំង ដែលផលិតនៅ ហូឡង់ ត្រូវមានគោលដៅ នាំចេញទៅអង់គ្លេស និងប្រទេសផ្សេងទៀត។ អង់គ្លេស ដែលបានចាក់វ៉ាក់សាំង ដល់ប្រជាជនរបស់ខ្លួន បានជាង ២៧លាននាក់ ត្រូវការ ពឹងផ្អែកខ្លាំងលើវ៉ាក់សាំងមួយផ្នែកផលិតនៅ ទឹកដី អឺរ៉ុប សម្រាប់ ការចាក់វ៉ាក់សាំង ដូសទី ២ឲ្យប្រជាជនរបស់ខ្លួន។ បើសិន អង់គ្លេសមិនបានទទួលវ៉ាក់សាំង AstraZenecaដែលផលិតនៅទឹកដីអឺរ៉ុប ដោយសារតែវិធានការបិទខ្ទប់របស់អឺរ៉ុប នោះ អង់គ្លេស នឹងអាចខកខាន ក្នុងការចាក់វ៉ាក់សាំងដូសទី២ ដែលសំខាន់ណាស់សម្រាប់ឲ្យវ៉ាក់សាំងមានប្រសិទ្ធិភាព ១០០ភាគរយ ទប់ទល់នឹងជំងឺកូវីដ១៩។
តើសហភាពអឺរ៉ុបអាចមានសិទ្ធិបិទខ្ទប់ មិនឲ្យនាំចេញវ៉ាក់សាំង AstraZenecaទៅ អង់គ្លេសបានដែរ?
នៅមុនសម្រេចបិទខ្ទប់ការនាំចេញវ៉ាក់សាំង AstraZeneca ដែលផលិតនៅក្នុងទឹកដីអឺរ៉ុប ដែល នឹងអាចប៉ះពាល់ដល់ប្រទេសអង់គ្លេស សហភាព អឺរ៉ុប តាមរយៈ ប្រទេសអ៊ីតាលី ធ្លាប់បានរារាំង មិនឲ្យក្រុមហ៊ុន AstraZeneca នាំចេញ វ៉ាក់សាំង ជាង ២សែន ៥ម៉ឺនដូស ដែលផលិតក្នុងប្រទេសអ៊ីតាលី ចេញទៅប្រទេសអូស្ត្រាលី នៅថ្ងៃទី ៥មីនាកន្លងទៅ ក្នុងហេតុផលថា សហភាពអឺរ៉ុបខ្វះខាតវ៉ាក់សាំង។
ការសម្រេចរបស់អ៊ីតាលី ធ្វើឡើង ដោយយោងទៅលើយន្តការគ្រប់គ្រង ត្រួតពិនិត្យ ការនាំចេញវ៉ាក់សាំង ដែលសហភាពអឺរ៉ុបបានបង្កើតឡើងនៅខែមករា នៅក្រោយ ក្រុមហ៊ុនAstraZeneca មិនបានគោរពតាមកិច្ចសន្យា ដោយបានប្រគល់វ៉ាក់សាំង យឺតយ៉ាវ និងមិនគ្រប់ចំនួន តាមការកុម្ម៉ង់ ដែលមានចែងក្នុងកិច្ចសន្យា។ សម្រាប់សហភាពអឺរ៉ុប ក្រុមហ៊ុន AstraZeneca បានកាត់បន្ថយ ចំនួនវ៉ាក់សាំង សម្រាប់អឺរ៉ុប ដើម្បី អាចនាំចេញវ៉ាក់សាំង របស់ខ្លួន ទៅប្រទេសផ្សេង។
តាមភាគីអឺរ៉ុប ការនាំចេញ វ៉ាក់សាំងបង្ការកូវីដចេញពី ទឹកដីអឺរ៉ុប មានច្រើនជាងវ៉ាក់សាំង ដែលអឺរ៉ុបត្រូវទទួលបាន។ ជាក់ស្តែង ពីដើមខែកុម្ភៈ ដល់ថ្ងៃទី ៩មីនា អឺរ៉ុប បាននាំចេញវ៉ាក់សាំង បង្ការជំងឺកូវីដ ៩លានដូស ទៅអង់គ្លេស ដែលធ្វើឲ្យអង់គ្លេសសម្រេចបានលឿន យុទ្ធនាការចាក់វ៉ាក់សាំងរបស់ខ្លួន។ ប៉ុន្តែ ផ្ទុយមកវិញ វ៉ាក់សាំង ដែលផលិតទឹកដីអង់គ្លេស មិនដែលបញ្ជូនចេញមកទឹកដី អឺរ៉ុបវិញនោះទេ។
ក្នុងហេតុផលខ្វះវត្ថុធាតុ សម្រាប់ផលិត វ៉ាក់សាំង ក្រុមហ៊ុន AstraZenecaបានប្រាប់សហភាពអឺរ៉ុបថា គេអាចប្រគល់វ៉ាក់សាំង ទៅឲ្យសហភាពអឺរ៉ុប តែ ៧០ដូសប៉ុណ្ណោះ នៅត្រីមាសទី២ ពោលគឺមិនមែន ១៨០លានដូស តាមកិច្ចសន្យានោះទេ។ នៅពេលអង់គ្លេសបានទទួលវ៉ាក់សាំង គ្រប់គ្រាន់ គ្មានបញ្ហា នៅត្រីមាសទី ១ អឺរ៉ុបបានទទួលវ៉ាក់សាំង AstraZenecaតែ ៣០លានដូស ប៉ុន្តែ មិនមែន ៩០លានដូស ដូចដែលក្រុមហ៊ុនបានសន្យាប្រគល់ឲ្យសហភាពអឺរ៉ុបនោះទេ។
ដើម្បីទាមទារឲ្យមានភាពយុត្តិធម៌ ស្មើភាពគ្នា ក្នុងរឿងទទួលបានវ៉ាក់សាំង សហភាពអឺរ៉ុបគ្រោងនឹងចេញវិធានការថ្មី សម្រាប់ហាមឃាត់ការនាំចេញវ៉ាក់សាំង បង្ការកូវីដ ទៅកាន់ប្រទេសដែលមានផលិតវ៉ាក់សាំង ក្នុងទឹកដីរបស់ខ្លួនរួចហើយ ឬប្រទេសណាដែលមានសំបូរអ្នកបានចាក់វ៉ាក់សាំងច្រើនជាងសហភាពអឺរ៉ុប។ គេអាចយល់បានភ្លាមថា ប្រទេសដែលសហភាពអឺរ៉ុបសំដៅដល់ គឺអង់គ្លេស អាមេរិក ឬអ៊ីស្រាអែលជាដើម ដែលបានចាក់វ៉ាក់សាំង ដល់ប្រជាជនរបស់ខ្លួន បានជាង ៦០ភាគរយ នៅពេលអឺរ៉ុបវិញ ទើបចាក់បាន ១២%ប៉ុណ្ណោះ។ យ៉ាងណាក៏ដោយ ក្នុងរឿងបិទខ្ទប់ការនាំចេញវ៉ាក់សាំងដែលផលិតនៅទឹកដីអឺរ៉ុបនេះ មិនមែនសុទ្ធតែបានទទួលការគាំទ្រពី ប្រទេសសមាជិកទាំង ២៧របស់អឺរ៉ុបនោះទេ។ ប្រទេសអៀរឡង់ចេញមុខប្រឆាំង ដោយព្រមាន ពីការសងសឹក មកលើអឺរ៉ុបវិញ។ នាយករដ្ឋមន្រ្តី អៀរឡង់បានព្រមានពីការខ្វះខាត ធនធានក្នុងការផលិតវ៉ាក់សាំងទៅថ្ងៃ មុខ នៅពេលប្រទេសដទៃទៀត សងសឹកអឺរ៉ុប ដោយបិទខ្ទប់ មិនឲ្យគេលក់វត្ថុធាតុ សម្រាប់ ផលិតវ៉ាក់សាំង មិនឲ្យក្រុមហ៊ុនផលិតវ៉ាក់សាំងក្នុងទឹកដី អឺរ៉ុប។ ប្រទេសហូឡង់ និងបែលហ្ស៊ិកជាដើមដែលមានរោងចក្រផលិតវ៉ាក់សាំង AstraZeneca និងPfizer មិនចង់ឲ្យអឺរ៉ុបចាត់វិធានការបិទខ្ទប់ ដើម្បីដោះស្រាយវិបត្តិខ្វះវ៉ាក់សាំងនៅអឺរ៉ុបនោះទេ។ តាមរដ្ឋាភិបាល ហូឡង់ និងបែលហ្ស៊ិក គេគួររកដំណោះស្រាយជាមួយក្រុមហ៊ុន AstraZenecaផ្ទាល់ ជាជាង បង្កជម្លោះ ជាមួយប្រទេសដទៃ ដោយសារតែរឿងវ៉ាក់សាំងនេះ។
ប្រធានអង្គការសុខភាពពិភពលោកខកចិត្តដែលឃើញ គម្លាតរវាងប្រទេសក្រីក្រ និងប្រទេសអ្នកមាន ក្នុងរឿងទទួលបានវ៉ាក់សាំង កាន់តែរីកធំៗឡើង
ប្រទេសអ្នកមានដែលកំពុងនាំមុខក្នុង ចាក់វ៉ាក់សាំងបានច្រើនក្នុងចំណោមប្រជាជនរបស់ខ្លួន គឺនៅតែឈ្លោះដណ្តើមវ៉ាក់សាំងគ្នា ចំណែកប្រទេសក្រីក្រ នៅតែគ្មានវ៉ាក់សាំង ចាក់នឹងគេ។ នេះជាតថភាពជាក់ស្តែង ដែលកំពុងកើតមានសព្វថ្ងៃនេះ។
នៅចំពោះមុខ រឿងអយុត្តិធម៌ និងមិនសមរម្យបែបនេះ ប្រធានអង្គការសុខភាពពិភពលោក មានតែសំដែងការសោកស្តាយ និងអាណោចអាធ័មតែប៉ុណ្ណោះ។ តើឯណាទៅ ពាក្យសាមគ្គីភាព ដែលក្រុមប្រទេសអ្នកមានធ្លាប់បានសន្យា ពេញបរបូមាត់ នោះ? ក្នុងនាមប្រទេសក្រីក្រ ប្រធានអង្គការសុខភាពពិភពលោកបានចោទសំណួរនេះនៅក្នុងសន្និសីទកាសែត ជាទីដែលលោកបានបង្ហាញពីគម្លាតខ្លាំងមែនទែន រវាងប្រទេសអ្នកមាន និងប្រទេសអ្នកក្រ ក្នុងរឿងចាក់វ៉ាក់សាំងបង្ការកូវីដ។
ត្រូវដឹងថា រហូតមកដល់ថ្ងៃនេះ មានវ៉ាក់សាំង ជាង ៤៥៥លានដូស ត្រូវបានគេចាក់ នៅក្នុងពិភពលោក ប៉ុន្តែ នៅក្នុងនោះ គឺ ១ភាគ៤ មាននៅ សហរដ្ឋអាមេរិក។ អ៊ីស្រាអែលដែលបានចំណាយលុយរាប់លានដុល្លារ បាននាំមុខ គេក្នុងពិភពលោកខាងមានប្រជាជនចាក់វ៉ាក់សាំង ច្រើនជាងគេ ប្រមាណ ៦០%នៃប្រជាជនសរុប។
ចំណែកនៅបណ្តាប្រទេសដែលមានប្រាក់ចំណូលទាប មានវ៉ាក់សាំង មិនដល់ ០,១%ដែលត្រូវចាក់ជូនប្រជាជន។ សព្វថ្ងៃនេះ តាមរយៈយន្តការកូវ៉ាក់ អង្គការសុខភាពពិភពលោកបានជួយចែកវ៉ាក់សាំងបានប្រមាណ ៣១លានដូស ប៉ុណ្ណោះ ទៅ កាន់ប្រទេស៥៧ក្នុងពិភពលោក។ ៣១លានដូស គឺច្រើនជាង បន្តិច វ៉ាក់សាំង ដែលអង់គ្លេស បានចាក់ឲ្យប្រជាជនខ្លួន។ ៣១លានដូស គឺតិចជាងឆ្ងាយណាស់ ១០០លានដូស ដែលអាមេរិកបានចាក់ឲ្យប្រជាជនរបស់ខ្លួន។ សម្រាប់ ប្រធានអង្គការសុខភាព ពិភពលោក វិសមភាព គម្លាតធំខ្លាំងក្នុងរឿងចាក់វ៉ាក់សាំង រវាងប្រទេសអ្នកមាន និងប្រទេសអ្នកក្រ មិនត្រឹមតែជារឿងគ្មានសីលធម៌ ប៉ុណ្ណោះទេ ប៉ុន្តែ វានឹងទៅបំផ្លាញ ផែនការសេដ្ឋកិច្ច និងជំងឺរាតត្បាតក្នុងពិភពលោកទាំងមូល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ