កូវីដ១៩៖ប្រទេសអ៊ីតាលីខ្ទប់ការនាំចេញវ៉ាក់សាំង AstraZeneca ទៅប្រទេសអូស្ត្រាលី
នៅក្នុងប្រទេសអ៊ីតាលី រដ្ឋាភិបាលបានប្រកាសឲ្យដឹងក្នុងថ្ងៃព្រហស្បតិ៍ ទី៤ មីនាពីការហាមឃាត់មិនឲ្យនាំវ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca ចំនួន ២៥០ ០០០ដូសទៅឲ្យប្រទេសអូស្រា្តលី។ នេះជាលើកទី១ ដែលវិធានការរបស់សហភាពអឺរ៉ុបស្តីពីការនាំចេញវ៉ាក់សាំងបង្ការកូវីដ១៩ ត្រូវបានអនុវត្តជាក់ស្តែង។ គួររម្លឹកថា សហភាពអឺរ៉ុបធ្លាប់បានព្រមានមន្ទីរពិសោធន៍ AstraZeneca ច្រើនដង បន្ទាប់ពីមន្ទីរពិសោធន៍អង់គ្លេស ស៊ុយអែតមួយនេះបានប្រកាសពីការយឺតយ៉ាវ ឬការមិនអាចផ្តល់ចំនួនវ៉ាក់សាំងគ្រប់គ្រាន់តាមការកម្ម៉ង់ទិញ។
ចុះផ្សាយនៅថ្ងៃ៖
ស្តាប់ - ០២:១០
វ៉ាក់សាំងបង្ការកូវីដ១៩ របស់មន្ទីរពិសោធន៍ AstraZeneca ដែលអ៊ីតាលីបានខ្ទប់មិនឲ្យនាំចេញទៅអូស្រា្តលី គឺជាវ៉ាក់សាំងដែលផលិតនៅអ៊ីតាលី ព្រោះAstraZeneca មានរោងចក្រមួយនៅលើទឹកដីអ៊ីតាលី។ មែនទែនទៅ វិធានការរបស់រដ្ឋាភិបាលអ៊ីតាលីពេលនេះមិនមែនជាការសម្រេចចិត្តជាលក្ខណៈអន្តោម័តទេ តែបានធ្វើឡើងដោយមានការព្រមព្រៀងជាមួយគណៈកម្មការអឺរ៉ុប។ ចូរកុំភ្លេចថាថ្មីៗនេះ សហភាពអឺរ៉ុបបានអនុម័តនូវយន្តការមួយស្តីពីការត្រួតពិនិត្យលើការនាំចេញវ៉ាក់សាំងបង្ការកូវីដ១៩។ យន្តការនេះបានធ្វើឡើង បន្ទាប់ពីAstraZenecaបានប្រកាសពីភាពយឺតយ៉ាវ ឬការមិនអាចផ្តល់ចំនួនវ៉ាក់សាំងគ្រប់គ្រាន់ដែលសហភាពអឺរ៉ុបបានកម្ម៉ង់ទិញដោយបានបង់លុយមុនរួចហើយ។
សហភាពអឺរ៉ុបមានមន្ទិលសង្ស័យថា ភាពយឺតយ៉ាវ ឬការមិនអាចផ្តល់ចំនួនវ៉ាក់សាំងគ្រប់គ្រាន់តាមការកម្ម៉ង់ទិញមិនមែនដោយសារAstraZeneca មានបញ្ហាផលិតទេ តែមកពីមន្ទីរពិសោធន៍អង់គ្លេស និងស៊ុយអែតមួយនេះបានឆ្លៀតលក់ឲ្យអ្នកផ្សេងដែលហ៊ានទិញក្នុងតម្លៃថ្លៃជាង។ ដូច្នេះចង់ ឬមិនចង់ ចំណាត់ការរបស់រដ្ឋាភិបាលអ៊ីតាលីពេលនេះនឹងធ្វើឲ្យផ្ទុះសង្រ្គាមពាក្យសម្តីជាថ្មីរវាងគណៈកម្មការអឺរ៉ុប និងAstraZeneca។ ហេតុផលដែលរដ្ឋាភិបាលអ៊ីតាលីបានពន្យល់នៅក្នុងការសម្រេចចិត្តរបស់ខ្លួននោះគឺថា មកពីសហភាពអឺរ៉ុបកំពុងខ្វះវ៉ាក់សាំងបង្ការកូវីដ១៩។
តាមរយៈហេតុផលនេះនាំឲ្យគេយល់ឃើញថា យន្តការត្រួតពិនិត្យលើការនាំចេញវ៉ាក់សាំងដែលសហភាពអឺរ៉ុបបានអនុម័តកំពុងប្រែក្លាយទៅជាយន្តការកម្រិតការនាំចេញវ៉ាក់សាំង។ ការហ៊ានអះអាងយ៉ាងដូចនេះក៏ដោយសារតែសហភាពអឺរ៉ុបត្រូវពន្លឿនការចាក់វ៉ាក់សាំងបង្ការកូវីដ១៩ លើពលរដ្ឋរបស់ខ្លួនទាំងអស់។ លោក Thierry Breton ស្នងការអឺរ៉ុបទទួលបន្ទុកទីផ្សារផ្ទៃក្នុងបានបញ្ជាក់ថា ចាប់ពីពេលនេះទៅដំណាច់រដូវក្តៅខាងមុខ សហភាពអឺរ៉ុបត្រូវបង្កើនការចាក់វ៉ាក់សាំងលើពលរដ្ឋខ្លួនឲ្យបានជាង ៧០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ