រដ្ឋសមាជិកអឺរ៉ុប៥ប្រទេសចង់បើកប្រជុំរឿងចែកចាយថ្នាំបង្ការមិនស្មើភាព
ក្នុងពេលដែលក្រុមហ៊ុនអ្នកផលិត ជាពិសេសក្រុមហ៊ុនAstraZeneca ប្រកាសថានឹងប្រគល់ថ្នាំបង្ការឱ្យសហភាពអឺរ៉ុបយឺតជាងការគ្រោងទុក និងតិចជាងការបញ្ជាទិញ អឺរ៉ុបប្រេះឆាគ្នាកាន់តែខ្លាំងរឿងចែកចាយថ្នាំបង្ការមិនស្មើភាព។ នៅក្នុងលិខិតចេញផ្សាយនៅថ្ងៃសៅរ៍ទី ១៣មីនា ២០២១ ប្រទេសអូទ្រីស សាធារណរដ្ឋឆែក ស្លូវេនី ប៊ុលហ្ការី និងលេតូនី បានស្រែកអំពាវនាវឱ្យសហភាពអឺរ៉ុបបើកប្រជុំ ឱ្យបានលឿនបំផុតតាមដែលអាចធ្វើទៅបាន ដើម្បីជជែកអំពីវិសមភាពដ៏សម្បើមនៃការចែកចាយថ្នាំបង្ការ។
ចុះផ្សាយនៅថ្ងៃ៖
ស្តាប់ - ០២:១៣
ប្រមុខរដ្ឋាភិបាលអូទ្រីស លោក Sebastian Kurz បានចោទរដ្ឋជាសមាជិកសហភាពអឺរ៉ុប (ដោយមិនបញ្ចេញឈ្មោះ ប្រទេសដោយចំៗ) ថាបានលួចទៅចរចា ចុះកិច្ចសន្យា ដោយស្ងាត់ៗ ជាមួយមន្ទីរពិសោធន៍ ដើម្បីបានថ្នាំបង្ការ ហេតុដូច្នេះហើយបានជាសមាជិកសហភាពអឺរ៉ុបទទួលបានថ្នាំ បង្ការមិនស្មើគ្នា។
ជាមួយសមភាគី ឆែក ស្លូវេនី ប៊ុលហ្គារី និងលេតូនី ប្រមុខរដ្ឋាភិបាលអូទ្រីសបានសរសេរលិខិតរួមគ្នា ផ្ញើជូនលោកស្រីប្រធានគណៈកម្មការអឺរ៉ុប អួរស៊ូឡា វ៉ុនឌែរ ឡេយែននិងលោក ស្ហាល មីស្ហែលប្រធានក្រុមប្រឹក្សាអឺរ៉ុប ដោយអះអាងថា "ក្រុមហ៊ុនផលិតឱសថ ប្រគល់ថ្នាំបង្ការ មករដ្ឋជាសមាជិកសហភាពអឺរ៉ុប មិនស្មើភាពគ្នាទេ។ ប្រសិនបើនៅតែបន្តប្រព័ន្ធនេះ វិសមភាពនៃការទទួលថ្នាំបង្ការនឹងមានគម្លាតកាន់តែខ្លាំងនៅរដូវក្តៅខាងមុខ ដោយប្រទេសខ្លះអាចចាក់ថ្នាំបង្ការជូនប្រជាពលរដ្ឋ ឱ្យមានភាពស៊ាំសមូហភាពក្នុងរយៈពេលតែប៉ុន្មានសប្តាហ៍ ឯប្រទេសខ្លះទៀតមានយុទ្ធនាការចាក់ថ្នាំបង្ការអូសជើង។ ដូច្នេះអឺរ៉ុបត្រូវជួបជុំគ្នាជជែកអំពីបញ្ហានេះឱ្យបានឆាប់បំផុត"។ នេះជាការទាមទាររបស់ប្រមុខដឹកនាំប្រទេសទាំង៥។
លិខិតរបស់ប្រមុខរដ្ឋាភិបាលទាំង៥ បានទៅប្រគល់ដល់ដៃអ្នកទទួលខុសត្រូវជាន់ខ្ពស់សហភាពអឺរ៉ុបហើយ។ សម្រាប់អឺរ៉ុប នៅក្នុងជំនួបកំពូលអឺរ៉ុបដែលប្រព្រឹត្តទៅនៅថ្ងៃទី ២៥-២៦មីនា ២០២១ ការសម្របសម្រួលយុទ្ធនាការប្រយុទ្ធប្រឆាំងនឹងជំងឺរាតត្បាតកូវីដ១៩ គឺជាចំណុចចំបងទីមួយ នៃរបៀបវារៈប្រជុំ។ ប៉ុន្តែសហភាពអឺរ៉ុបបានបដិសេធជាស្រេចថា ការចែកចាយនិងចរចាចែកចាយថ្នាំបង្ការប្រព្រឹត្តទៅប្រកបដោយតម្លាភាពបំផុត។ ប្រទេសជាសមាជិកនីមួយៗជាអ្នកសម្រេចដោយខ្លួនថាប្រទេសត្រូវការថ្នាំណានិងក្នុងបរិមាណណា។ រដ្ឋមន្ត្រីក្រសួងសុខាភិបាលអូទ្រីសផ្ទាល់ក៏បានប្រកាសនៅក្នុងវិទ្យុជាតិអូទ្រីសនាថ្ងៃសៅរ៍ទី១៣មីនានេះ អំពីតម្លាភាពនៃការចរចាទទួលថ្នាំបង្ការកូវីដ១៩ដែរ។
សូមបញ្ជាក់ថា បើប្រៀបទៅនឹងសហរដ្ឋអាមេរិក អង់គ្លេស និងអ៊ីស្រាអែល អឺរ៉ុបយឺតយ៉ាវនិងជួបការលំបាកខ្លាំងខាងផ្គត់ផ្គង់និងទទួលថ្នាំវ៉ាក់សាំងកូវីដ១៩ណាស់។ យុទ្ធនាការចាក់ថ្នាំបង្ការនៅអឺរ៉ុបកំពុងអូសជើងខ្លាំងហើយ ក្រុមហ៊ុន Astrazenecaបានប្រកាសនៅថ្ងៃសៅរ៍ទី ១៣ មីនា ២០២១ កាត់បន្ថយបន្ថែមទៀតបរិមាណថ្នាំបង្ការដែលត្រូវប្រគល់ទៅឱ្យអឺរ៉ុបដោយលើកហេតុផលថាមានជាប់បម្រាមនាំចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ