COP២៦៖ លោកបៃដិនរិះគន់មេដឹកនាំចិននិងរុស្ស៊ីចំពោះការខកខានចូលរួមកិច្ចប្រជុំ
ចុះផ្សាយនៅថ្ងៃ៖
ស្តាប់ - ០៦:៥០
កាលពីយប់ថ្ងៃអង្គារ ២វិច្ឆិកាម្សិលមិញ ប្រធានាធិបតីអាមេរិកលោក ចូ បៃដិន បានរិះគន់មេដឹកនាំចិន និងរុស្ស៊ីដែលអវត្តមានក្នុងសន្និសីទអាកាសធាតុ COP២៦។ សម្រាប់លោកបៃដិន ការខាកខានមិនបានចូលរួមកិច្ចប្រជុំរបស់មេដឹកនាំនៃប្រទេសមហាអំណាចទាំងពីរ គឺជាការខកខានក្នុងការបង្ហាញភាពជាអ្នកដឹកនាំលើបញ្ហាប្រែប្រួលអាកាសធាតុ។ តើលោកចូ បៃដិន និយាយអ្វីខ្លះពីមេដឹកនាំចិន និងរុស្ស៊ី? តើមានអ្វីខ្លះទៀតបានកើតឡើងកាលពីថ្ងៃអង្គារម្សិលមិញនៅឯកិច្ចប្រជុំ COP២៦?
ប្រធានាធិបតីអាមេរិកលោក ចូ បៃដិន បានរិះគន់យ៉ាងខ្លាំងចំពោះមេដឹកនាំចិននិងរុស្ស៊ីដែលខកខានមិនបានទៅចូលរួមដោយផ្ទាល់ក្នុងកិច្ចប្រជុំកំពូលអាកាសធាតុរបស់អង្គការសហប្រជាជាតិដែលហៅកាត់ថា COP២៦។
តើលោកចូ បៃដិនបាននិយាយអ្វីខ្លះ?
កាលពីយប់ថ្ងៃអង្គារ ទី២ វិច្ឆិកាម្សិលមិញ ក្នុងពេលថ្លែងសុន្ទរកថានៅឯសន្និសីទ COP២៦ លោកបៃដិនបានបញ្ជាក់ថាអាកាសធាតុគឺជាបញ្ហាដ៏ធំសម្បើមមួយ ហើយការជួបប្រជុំគ្នារបស់មេដឹកនាំពិភពលោកជាង១២០ ប្រទេស គឺដើម្បីបង្កើតកិច្ចព្រមព្រៀងអាកាសធាតុថ្មីប្រកបដោយមហិច្ឆតាដើម្បីដោះស្រាយបញ្ហាដ៏ធំនៅចំពោះមុខនេះ។
ក៏ប៉ុន្តែ ទាំងមេដឹកនាំចិនលោក ស៊ី ជីនពីង និងប្រធានាធិបតីរុស្ស៊ីលោក វ្ល៉ាឌីមៀរ ពូទីន គ្មានវត្តមាននៅក្នុងកិច្ចប្រជុំកំពូលអាកាសធាតុនៅទីក្រុង Glasgow នោះទេ។ លោកប្រធានាធិបតីអាមេរិកបានលើកឡើងថាមេដឹកនាំនៃប្រទេសមហាអំណាចទាំងពីរមិនបង្ហាញភាពជាអ្នកដឹកនាំឡើយ។
ប្រធានាធិបតីអាមេរិកបានចាប់ផ្តើមដោយការរិះគន់លោកស៊ីថាបានធ្វើខុសដែលអវត្តមានក្នុងសន្និសីទអន្តរជាតិស្តីអំពីអាកាសធាតុដែលមានរយៈពេល ១៣ ថ្ងៃនេះ។ លោកបៃដិន ថា ចិនដែលព្យាយាមបង្ហាញពីតួនាទីថ្មីរបស់ខ្លួនក្នុងនាមជាមេដឹកនាំពិភពលោកតែបែរជាមិនមកបង្ហាញខ្លួនក្នុងជំនួបកំពូលស្តីអំពីអាកាសធាតុ។ អាកាធាតុដែលឥឡូវនេះគឺជារឿងសំខាន់បំផុតតែមួយគត់ដែលទទួលបានការចាប់អារម្មណ៍ពីពិភពលោកទាំងមូល។
ស្រដៀងគ្នានេះដែរ លោកចូ បៃដិន ក៏បានរិះគន់ខ្លាំងចំពោះការសម្រេចចិត្តរបស់លោកពូទីន មិនទៅចូលរួមកិច្ចប្រជុំ COP២៦។ “បើអ្នកមិនមកចូលរួមកិច្ចប្រជុំផង តើអ្នកអាចនឹងអះអាងថាខ្លួនអ្នកមានភាពជាអ្នកដឹកនាំគំរូយ៉ាងម៉េចកើតទៅ?។ នេះគឺជាសំណួរដែលចោទឡើងដោយលោកប្រធានាធិបតីអាមេរិក។
ហេតុអ្វីមេដឹកនាំចិននិងរុស្ស៊ីមិនទៅចូលរួមសន្និសីទ COP២៦?
រហូតមកទល់ពេលនេះ ពុំមានការបញ្ជាក់ប្រាប់ជាផ្លូវការនោះទេអំពីមូលហេតុដែលលោកប្រធានាធិបតីចិនអវត្តមានក្នុងសន្និសីទអន្តរជាតិCOP២៦។ ក៏ប៉ុន្តែចាប់តាំងពីជំងឺកូវីដ១៩ ផ្ទុះឡើងវិញនៅក្នុងប្រទេសចិនមក គេមិនបានឃើញលោកស៊ី ធ្វើដំណើរចេញក្រៅប្រទេសឡើយ។
ចំណែកនៅឯកិច្ចប្រជុំ COP២៦ វិញ លោក Xie Zhenhua បេសកជនពិសេសទទួលបន្ទុកផ្នែកអាកាសធាតុរបស់ចិនបានឆ្លើយតបទៅកាន់អ្នកសារព័ត៌មាន ដោយច្រានចោលនូវមន្ទិលសង្ស័យថាចិនដែលជាប្រទេសបញ្ចេញកាបូនិកដ៏ធំបំផុតរបស់ពិភពលោកនាពេលបច្ចុប្បន្ននេះ ធុញទ្រាន់ឬចង់គេចវេសនឹងកាតព្វកិច្ចណាមួយក្នុងបុព្វហេតុអាកាសធាតុ។
ដូចគ្នាចឹងដែរ គ្មានហេតុផលណាមួយត្រូវបានប្រកាសប្រាប់នោះទេចំពោះការដែលប្រធានាធិបតីរុស្ស៊ី មិនទៅចូលរួមដោយផ្ទាល់ក្នុងសន្និសីទអាកាសធាតុរបស់អង្គការសហប្រជាជាតិ។
អ្វីដែលគេដឹងនាខណៈពេលនេះ គឺប្រទេសរស្ស៊ីក៏កំពុងប្រឈមខ្លាំងណាស់ដែរទៅនឹងការឆ្លងរីករាលដលនៃជំងឺកូវីដ ដោយចំនួនអ្នកឆ្លងប្រចាំថ្ងៃកើនឡើងឥតឈប់នៅមួយរយៈពេលចុងក្រោយនេះ។
ដោយឡែក កាលពីថ្ងៃអង្គារម្សិលមិញ តាមរយៈការថ្លែងសារនៅក្នុងវីដេអូមួយ លោកពូទីនបានប្រាប់មេដឹកនាំជាង ១២០ ប្រទេសដែលមានវត្តមានក្នុងកិច្ចប្រជុំ COP២៦ ថាព្រៃឈើក្នុងទំហំដ៏ធំរបស់រុស្ស៊ីនឹងជួយឲ្យម៉ូស្គូអាចធ្វើអព្យាក្រឹតកាបោនបាននៅឆ្នាំ ២០៦០។
ក្រោយការលើកឡើងខាងលើ អ្នកជំនាញជាច្រើនបានចោទសួរពីការគណនាថាតើព្រៃឈើរបស់រុស្សីអាចស្រូបយកកាបោនបានប៉ុណ្ណា ជាពិសេសបន្ទាប់ពីព្រៃឈើនៅទីនោះជាច្រើនត្រូវបានបំផ្លាញដោយភ្លើងឆេះនាពេលថ្មីៗនេះ។
តើមានអ្វីខ្លះទៀតកើតឡើងកាលថ្ងៃអង្គារម្សិលមិញនៅឯកិច្ចប្រជុំ COP២៦?
ក្រោយជួបប្រជុំគ្នារយៈពេលពីរ នៅថ្ងៃអង្គារម្សិលមិញ មេដឹកនាំពិភពលោកបានប្តេជ្ញាបញ្ចប់ការកាប់បំផ្លាញព្រៃឈើនៅឆ្នាំ ២០៣០ ដើម្បីជួយទប់ស្កាត់ការកើនឡើងកម្តៅផែនដី។ ការប្តេជ្ញានេះទទួលបានការគាំទ្រពីមេដឹកនាំតំណាងឲ្យជាង ៨៥% នៃតំបន់ព្រៃឈើនៅទូទាំងពិភពលោក។
ក្រៅពីនេះ លោកប្រធានាធិបតីអាមេរិកលោកចូ បៃដិន ក៏បានប្រកាសដាក់ចេញនូវផែនការកាត់បន្ថយការបញ្ចេញឧស្ម័នមេតាន ដែលជាឧស្ម័នផ្ទះកញ្ចក់ដ៏មានឥទ្ធិពលចំពោះការកើនឡើងកម្តៅផែនដីដែរ។
ប្រទេសរាប់សិបបានចូលរួមជាមួយសហរដ្ឋអាមេរិក និងសហភាពអឺរ៉ុប ដោយពួកគេបានព្រមព្រៀងគ្នាធ្វើយ៉ាងណាកាត់បន្ថយការបំភាយឧស្ម័នមេតានឲ្យបានចំនួន ៣០% ក្នុងរយៈពេល១០ ឆ្នាំ ពោលគឺនៅឆ្នាំ ២០៣០ខាងមុខដូចទៅនឹងការសន្យាចំពោះការបិទបញ្ចប់ការកាប់បំផ្លាញព្រៃឈើអីចឹងដែរ។
នៅក្នុងគំនិតផ្តួចផ្តើមដាច់ដោយឡែកមួយទៀត សហរដ្ឋអាមេរិក អង់គ្លេស បារាំង និងអាល្លឺម៉ង់បានប្រកាសថាពួកគេនឹងផ្តល់ប្រាក់កម្ចី និងប្រាក់ជំនួយចំនួន ៨,៥ ពាន់លានដុល្លារក្នុងរយៈពេល ៥ ឆ្នាំដើម្បីជួយអាហ្រ្វិកខាងត្បូងឲ្យដកចេញនូវការប្រើប្រាស់ថាមពលបានមកពីធ្យូងថ្ម។ អាហ្វ្រិកខាងត្បូងនេះ គឺជាប្រទេសដែលផលិតថាមពលអគ្គិសនីប្រមាណ ៩០% ពីរោងចក្រប្រើធ្យូងថ្ម។ ធ្យូងថ្ម ដែលជាប្រភពបញ្ចេញឧស្ម័នកាបូនិកច្រើនជាងគេរហូតដល់ទៅ ៤០% បើប្រៀបធៀបនឹងប្រេង (៣៩%) ឧស្ម័នហ្គាស (១៩%)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ