ហ្សេ២០ សម្រេចកិច្ចព្រមព្រៀងអាកាសធាតុនិង គ្រោងផ្តល់១០០ពាន់លានដុល្លារដល់ប្រទេសក្រីក្រ
នៅក្នុងថ្ងៃបិទបញ្ចប់ជំនួបកំពូល តែប៉ុន្មានម៉ោងមុនការបើកសន្និសីទអន្តរជាតិស្តីអំពី អាកាសធាតុនៅ Glasgow ក្រុមប្រទេសហ្សេ២០ បានសម្រេចរកឃើញកិច្ចព្រមព្រៀងអាកាសធាតុមួយប្រកបដោយមហិច្ឆតា ជាងកិច្ចព្រមព្រៀងអាកាសធាតុក្រុងប៉ារីសទៀត។ ប្រមុខដឹកនាំនៃក្រុមប្រទេសមានសេដ្ឋកិច្ចលូតលាស់ខ្លាំងជាងគេ២០ដំបូង បានប្តេជ្ញា កំរិតការឡើងកម្តៅអាកាសធាតុត្រឹម១,៥អង្សា ដោយគ្រប់ប្រទេសទាំងអស់សន្យានឹងបញ្ចេញសកម្មភាពច្បាស់លាស់និងមានប្រសិទ្ធភាព។ ហើយចាប់ពី ឆ្នាំនេះទៅ ក្រុមប្រទេសហ្សេ២០ នឹងលែងផ្តល់ប្រាក់ឧបត្ថម្ភគម្រោងសាងសង់មជ្ឈមណ្ឌលអគ្គីសនីដើរដោយធ្យូងថ្មទៀត នៅបរទេសទៀតហើយ។ ដោយឡែក ហ្សេ២០ ក៏គ្រោងនឹងផ្តល់ថវិកា១០០ពាន់លានដុល្លារដល់ប្រទេសប្រទេសក្រីក្រដើម្បីប្រឈមនឹងវិបត្តិបង្កឡើងកូវីដ។
ចុះផ្សាយនៅថ្ងៃ៖
ស្តាប់ - ០១:៥១
ក្រុមចំណោមថវិកា ដែលមូលនិធិរូបិយវត្ថុអន្តរជាតិទាញទុកសម្រាប់ជួយប្រទេសក្រីក្រ ក្រុមប្រទេសហ្សេ២០ មានចំណែកផ្តល់ចំនួន១០០ពាន់លានដុល្លារ។ ដំណាក់កាលដំបូង ហ្សេ២០នឹងធ្វើវិភាគទានប្រមាណ៤៥ពាន់លានដុល្លារ សម្រាប់ផ្តល់ដល់ប្រទេសដែលក្រីក្រខ្លាំងនិងត្រូវការបំផុត។
នេះជាលើកទីមួយហើយក្រុមប្រទេសហ្សេ២០ បានព្រមព្រៀងគ្នាបើកកញ្ចប់ថវិកាសម្រាប់យកទៅជួយប្រទេសកំពុងអភិវឌ្ឍយ៉ាងដូច្នេះ។ ពោលគឺហ្សេ២០ ធ្វើបានល្អដូចក្រុមប្រទេសហ្សេ៧ ដែលទើបបានកំណត់កម្មវត្ថុចែកចាយថវិកាចំនួន១០០ពាន់លានដុល្លារទៅឱ្យទ្វីបអាហ្វ្រិក។
សូមបញ្ជាក់ថា អង្គការមូលនិធិរូបិយវត្ថុបានត្រៀមកញ្ចប់ថវិកាចំនួន៦៥០ពាន់លានដុល្លារសម្រាប់ចែកឱ្យគ្រប់ប្រទេសយកទៅប្រើប្រាស់ប្រឈមនឹងវិបត្តិបង្កឡើងកូវីដ។ ការចែកចាយធ្វើឡើងទៅតាមកូតា មានន័យថា កញ្ចប់លុយធំបានទៅប្រទេសអ្នកមាន ឯអាហ្វ្រិកក្រីក្រ បានត្រឹមប្រមាណ៣៤ពាន់លានដុល្លារប៉ុណ្ណោះ។ ហេតុដូច្នេះហើយបានជាក្រុមហ្សេ២០លេចគំនិតថ្មី ថាប្រទេសអ្នកមានត្រូវយកចំណែករបស់ខ្លួនផ្ទេរមកឱ្យប្រទេសក្រីក្រវិញ ដោយស្ម័គ្រចិត្ត។
ដោយជាក់ស្តែង កាណាដានឹងផ្ទេរ២០%នៃប្រាក់ដែលFMIចែកឱ្យ សម្រាប់ជួយស្រោចស្រង់សេដ្ឋកិច្ចក្រោយវិបត្តិកូវីដរបស់បណ្តាប្រទេសកំពុងអភិវឌ្ឍ។ មុននេះ បារាំងធ្លាប់បានសន្យារួចហើយ ថានឹងបង្វែរចំណែករបស់ខ្លួន២០% ទៅឱ្យទ្វីបអាហ្វ្រិក។ ហើយបើតាម លោកប្រធានាធិបតីបារាំង ថ្លែងកាលពីខែកញ្ញា ប្រសិនបើគ្រប់គ្នាព្រមធ្វើដូចបារាំង នោះពិភពលោកពិតជាសម្រេចកម្មវត្ថុរកថវិកាបាន១០០ពាន់លានដុល្លារសម្រាប់ជួយប្រទេសក្រីក្របាន។ ឥលូវអង់គ្លេសក៏បានធ្វើការសន្យា ព្រមរំលែក២០%ដូចគ្នា។ ចំណែកជប៉ុនសន្យាផ្តល់៤ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ