មេដឹកនាំចិននិងអាមេរិក បើកជំនួបកំពូលដើម្បីស្វែងយល់ជំហរគ្នាទៅវិញ ទៅមក?
ចុះផ្សាយនៅថ្ងៃ៖
ស្តាប់ - ០៨:៤០
នៅក្នុងជំនួបកំពូល អនឡាញ នៅព្រឹកថ្ងៃអង្គារទី ១៦ វិច្ឆិកា ប្រធានាធិបតីចិន លោកស៊ី ជីនពីងនិងប្រធានាធិបតីអាមេរិកលោកចូ បៃដិន បានពិភាក្សាពី សំណុំរឿងចម្រូងចម្រាសជាច្រើន រវាងប្រទេសទាំងពីរ។ ប៉ុន្តែ ជំនួបកំពូលតាមវីដេអូ រយៈពេលជាង ៣ម៉ោងកន្លះ មិនបានផ្តល់លទ្ធផលអ្វីធំដុំនោះទេ។ ប្រធានាធិបតីអាមេរិក និងប្រធានាធិបតីចិន នៅតែនិយាយមិនចុះសម្រុងគ្នា ពីបញ្ហាកោះតៃវ៉ាន់។ តើមានប្រយោជន៍អ្វី ដែលត្រូវមានជំនួបកំពូលអាមេរិក ចិន នៅពេលនេះ?
នៅក្នុងជំនួបតាមអនឡាញ នៅថ្ងៃអង្គារនេះ ប្រធានាធិបតីអាមេរិក លោកចូ បៃដិន និងលោកប្រធានាធិបតីចិន ស៊ី ជីនពីង បានជួបនិយាយគ្នាដល់ទៅ៣ម៉ោងកន្លះ។ ចាប់តាំងពី លោកចូ បៃដិនបានចូលកាន់តំណែងជាប្រធានាធិបតីអាមេរិក នេះជាលើកទី៣ ដែលប្រធានាធិបតីអាមេរិកបានជួបនិយាយគ្នា។ ជំនួបពីរលើកមុនៗ ធ្វើឡើងតាមទូរស័ព្ទប៉ុណ្ណោះ ចំណែកជំនួបកំពូល ជាលើកទី៣ ត្រូវធ្វើតាមវីដេអូ អនឡាញ បន្ទាប់ពី លោកប្រធានាធិបតី ចិន ស៊ី ជីនពីងលែងធ្វើដំណើរចេញក្រៅប្រទេស ជិត ២ឆ្នាំ ដោយសារតែវិបត្តិជំងឺកូវីដ១៩។
ជំនួបកំពូលនៅថ្ងៃនេះទៀតសោត ធ្វើឡើងក្នុងបរិយាកាសធូរស្រាល ដោយគេឃើញ ប្រធានាធិបតីអាមេរិកលោកចូ បៃដិនញញឹម លើកដៃស្វាគមប្រធានាធិបតីចិន នៅក្នុងសន្និសីទតាមវីដេអូ។ លោកចូ បៃដិនបាននិយាយថា លោកនិងលោកស៊ីជីនពីង តែងនិយាយស្មោះទៅស្មោះមក ដោយឥតមានលាក់លៀមនោះទេ។ លោកប្រធានាធិបតីចិនវិញ បាននិយាយថា លោកសប្បាយចិត្តដែលបានជួបមិត្តចាស់ លោកចូ បៃដិន និងថា ប្រទេសទាំងពីរ ត្រូវការកែលម្អឲ្យប្រសើរឡើង ផ្នែកទំនាក់ទំនងរវាងគ្នា និងត្រូវប្រឈមបញ្ហារួមគ្នា។
ត្រលប់មកនិយាយពីខ្លឹមសារនៃជំនួបកំពូលលើកនេះវិញម្តង។ តាមសេតវិមាន ជំនួបតាមអនឡាញ រវាងលោកប្រធានាធិបតីអាមេរិក និងប្រធានាធិបតីចិនមានរយៈពេលដល់ទៅ៣ម៉ោងកន្លះ គឺវែងជាងការព្រាងទុក។ តាមសេចក្តីថ្លែងការណ៍របស់សេតវិមានដដែល មេដឹកនាំអាមេរិក និងចិន បានពិភាក្សាពីបញ្ហាជាច្រើន ដែលជាចំណុចខ្ទាស់ ខ្វែងគំនិតគ្នា រវាងចិន និងអាមេរិក។ ពីចំណែក លោកប្រធានាធិបតីអាមេរិក ចូ បៃដិន លោកនិយាយប្រាប់លោកប្រធានាធិបតីស៊ី ជីនពីង ពីការព្រួយបារម្ភរបស់អាមេរិក ដែលឃើញ មានការរំលោភសិទ្ធិមនុស្ស នៅទីក្រុងហុងកុង ទីបេ និងទៅលើជនជាតិភាគតិចអ៊ុយហ្គួរ នៅខេត្តស៊ីនជាំង។
នៅក្នុងសំណុំរឿងពាណិជ្ជកម្មវិញ ប្រធានាធិបតីអាមេរិកបានសង្កត់ធ្ងន់ ពីនយោបាយរបស់អាមេរិក ដើម្បីការពារជនជាតិអាមេរិក និងក្រុមហ៊ុនអាមេរិកពីការធ្វើជំនួញ មិនយុត្តិធម៌ របស់រដ្ឋអំណាចចិន។
តាមទីភ្នាក់ងារព័ត៌មានអង់គ្លេស Reuters ប្រធានាធិបតីចិន លោកស៊ី ជីនពីង បាននិយាយប្រាប់លោកចូ បៃដិនទៅវិញថា អាមេរិកត្រូវឈប់យក ហេតុផល ដើម្បីការពារសន្តិសុខជាតិ មកធ្វើជាលេស ធ្វើបាប ដាក់គំនាបក្រុមហ៊ុនចិន។ ជាក់ស្តែង កាលពីសប្តាហ៍មុននេះ លោកចូ បៃដិនទើបតែបានបញ្ជាឲ្យគេរឹតបន្តឹងបន្ថែមលើការធ្វើជំនួញជាមួយក្រុមហ៊ុនទូរគមនាគមន៍ចិន ដូចយ៉ាងក្រុមហ៊ុនHuawei ជាដើម។
ទាក់ទងនឹងការលើកឡើងរបស់លោកចូ បៃដិន ស្តីពីការរំលោភសិទ្ធិមនុស្សនៅហុងកុង ទីបេ និងស៊ីនជាំង ប្រធានាធិបតី ចិនបានចោទប្រកាន់អាមេរិកថា បានលូកដៃចូលកិច្ចការផ្ទៃក្នុងរបស់ចិន។
ប្រធានាធិបតីអាមេរិក និងប្រធានាធិបតីចិន នៅតែខ្វែងគំនិតគ្នា ក្នុងសំណុំរឿងតៃវ៉ាន់
មេដឹកនាំអាមេរិក និងចិន ចង់ប្រើជំនួបកំពូលលើកនេះ ដើម្បីបន្ធូរបន្ថយភាពតានតឹង រវាងប្រទេសទាំងពីរ ប៉ុន្តែ មេដឹកនាំទាំងពីរ មិនអាច មិនប៉ះសំដីគ្នា ដោយសាររឿងកោះតៃវ៉ាន់នោះទេ។ តាមប្រភពមន្រ្តីសេតវិមាន ដែលសុំមិនបញ្ចេញឈ្មោះ សំណុំរឿងតៃវ៉ាន់ ត្រូវបានមេដឹកនាំចិន និងអាមេរិក និយាយគ្នាច្រើន នៅក្នុងជំនួបកំពូល ដែលបានពន្យារពេលដល់ទៅ ៣ម៉ោងកន្លះ។
នៅក្រោយចប់ជំនួបកំពូល កាសែតក្នុងស្រុកចិនបានចុះផ្សាយ ថា លោកប្រធានាធិបតីចិន ស៊ី ជីនពីង បានព្រមានប្រាប់លោកចូ បៃដិន ថា ការលើកទឹកចិត្តឲ្យតៃវ៉ាន់ទាមទារឯករាជ្យ គឺប្រៀបដូចជាការលេងជាមួយភ្លើង។ ដកស្រង់សំដីដោយទីភ្នាក់ងារព័ត៌មានស៊ីនហួរ លោកប្រធានាធិបតីចិន បាននិយាយថា ជនជាតិអាមេរិកមួយចំនួនប៉ុនប៉ងចង់យកតៃវ៉ាន់ ដើម្បីទប់ទល់ គ្រប់គ្រងចិន។ នេះជារឿងដ៏គ្រោះថ្នាក់ណាស់ព្រោះថា អ្នកដែលលែងភ្លើង រមែងត្រូវរលាកភ្លើង។
តាមសេតវិមាន លោកប្រធានាធិបតី ចូ បៃដិន បាននិយាយប្រាប់ប្រធានាធិបតីចិនថា អាមេរិកប្រឆាំងដាច់ខាតរាល់ការប្រឹងប្រែងជាឯកតោភាគី ដើម្បី ផ្លាស់ប្តូរ Statut quo ឬការប៉ុនប៉ងទាំងឡាយណាដើម្បី បំផ្លាញសន្តិភាព និងស្ថិរភាពនៅច្រកសមុទ្រតៃវ៉ាន់។
នៅត្រង់ចំណុចនេះ ប្រធានាធិបតីអាមេរិកបានអំពាវនាវឲ្យគេគោរពStatut quo ពោលគឺបច្ចុប្បន្នយ៉ាងម៉េច ទុកឲ្យវានៅដូច្នេះដដែល។ សាររបស់អាមេរិកមានន័យសម្រាប់ទាំងចិន និងតៃវ៉ាន់ ព្រោះថា ទៅតាមStatut quo អាមេរិកគោរពគោលការណ៍ ចិនតែមួយ ហើយ ក៏មិនគាំទ្រឲ្យតៃវ៉ាន់ប្រកាសឯករាជ្យភាព។ ប៉ុន្តែ បើសិនតៃវ៉ាន់រងការវាយប្រហារឈ្លានពាន នោះ អាមេរិកនឹងចេញមុខការពារ តៃវ៉ាន់ ទៅតាមច្បាប់ Taiwan relation act។ ច្បាប់ ដែលអាមេរិកបានបង្កើតឡើង នៅឆ្នាំ ១៩៧៩ នៅក្រោយអាមេរិក ត្រលប់ទៅទទួលស្គាល់ រដ្ឋាភិបាលសាធារណរដ្ឋប្រជាមានិតចិន (ចិនដីគោក) ហើយទទួលស្គាល់ថា តៃវ៉ាន់គឺជាផ្នែកមួយនៃប្រទេសចិន មិនមែនជារដ្ឋឯករាជ្យ(នយោបាយចិនមួយ)។
ដល់វេលាដែលអាមេរិក និងចិន ត្រូវត្រលប់មកចុះសម្រុង ធ្វើការជាមួយគ្នា
សេតវិមានបានចេញសេចក្តីថ្លែងការណ៍ បញ្ជាក់ថា គ្មានលទ្ធផលអ្វីធំដុំនៅក្រោយជំនួបកំពូលនៅថ្ងៃនៅថ្ងៃអង្គារ។ ទោះជាជំនួបកំពូល គ្មានបានផ្តល់លទ្ធផលធំដុំអ្វីមែន ហើយមេដឹកនាំទាំងពីរនៅតែ និយាយបន្ទោសគ្នាទៅវិញ ទៅមក ដូចមុន ប៉ុន្តែ ជំនួបកំពូលលើកនេះសំខាន់ណាស់ សម្រាប់ឲ្យភាគីទាំងពីរអាចនិយាយបញ្ជាក់គ្នាឲ្យបានច្បាស់ពីជំហររៀងៗខ្លួន។
ឧទាហរណ៍ ក្នុងសំណុំរឿងតៃវ៉ាន់ ចិន ចង់ដឹងច្បាស់ពីជំហររបស់អាមេរិក ថា តើអាមេរិកគាំទ្រឲ្យតៃវ៉ាន់ឲ្យប្រកាសឯករាជ្យដែរឬទេ។ ការដឹងជំហរគ្នាទៅវិញ ទៅមកយ៉ាងដូច្នេះ នឹងជួយឲ្យភាគីទាំងពីរអាចជៀសផុតពីការយល់ច្រលំគ្នា ការបង្កហេតុនានា ដែលឈានទៅដល់ការប្រឈមមុខ ផ្នែកអាវុធណាមួយនៅ ក្នុងតំបន់។
អាមេរិកនិងចិនបានតានតឹង ដំឡើងសំឡេងដាក់គ្នាកាន់តែខ្លាំងដោយសារសំណុំរឿងតៃវ៉ាន់។ ចិនដែលបានសន្យារួបរួមជាមួយតៃវ៉ាន់ ទោះត្រូវប្រើកម្លាំងយោធា បានបង្ហាញសាច់ដុំ ដោយបានបញ្ជូនយន្តហោះ ចម្បាំងដ៏ច្រើនមិនធ្លាប់មានឲ្យទៅហោះរំលោភចូលតំបន់ការពារដែនអាកាសរបស់តៃវ៉ាន់។ ដោយចោទចិនថា បានបង្កើតភាពតានតឹង គំរាមកំហែងកោះតៃវ៉ាន់ អាមេរិក ក៏បានលក់សព្វាវុធ កាន់តែច្រើនណាស់ដែរ ដើម្បីឲ្យតៃវ៉ាន់ការពារខ្លួនពីការឈ្លានពានណាមួយរបស់ចិន។
គេជឿថា ដោយសម្រេចបើកជំនួបកំពូលជាមួយគ្នាលើកនេះ ប្រធានាធិបតីអាមេរិក និងប្រធានាធិបតីចិន ប្រហែលជាយល់ថា ប្រទេសមហាអំណាចសេដ្ឋកិច្ចពិភពលោក ទាំងពីរមិនអាចចេះតែឈ្លោះគ្នា ទៀតនោះទេ។ ប្រទេសនីមួយៗសុទ្ធតែមានបញ្ហាផ្ទៃក្នុង។ ដូចជាចិន កំពុងជួបបញ្ហាខ្វះថាមពល និងវិបត្តិហិរញ្ញវត្ថុបង្កដោយក្រុមហ៊ុន អចលនទ្រព្យ។ ចំណែកអាមេរិកកំពុង មានសេដ្ឋកិច្ចមិនសូវរឹងមាំ ដោយសារវិបត្តិកូវីដ។
ដូច្នេះ ជាជាងចំណាយថាមពលកម្លាំង ឈ្លោះគ្នា មេដឹកនាំចិន និងអាមេរិក គិតថា គេគួរធ្វើការសហការគ្នា ដើម្បី ដោះស្រាយបញ្ហាដែលគេប្រឈមរួមគ្នា ដូចជាបញ្ហាអាកាសធាតុ និងកង្វះថាមពលជាដើម។
ប្រធានាធិបតីអាមេរិកបានប្រាប់លោកស៊ី ជីនពីងហើយថា ត្រូវតែមានការប្រកួតប្រជែង ប៉ុន្តែ ការប្រកួតប្រជែងរវាងប្រទេសទាំងពីរមិនត្រូវប្រែក្លាយទៅជាជម្លោះ ដោយចេតនា ឬមិនដោយមិនចេតនា។ ប្រធានាធិបតីចិនបញ្ជាក់ថា ចិន និងអាមេរិក ត្រូវប្រឹងធ្វើឲ្យប្រសើរឡើង ផ្នែកទំនាក់ទំនង និងសហប្រតិបត្តិការរវាងប្រទេសទាំងពីរ
ជារួម ក្រៅតែពីចំណុចខ្វែងគំនិតគ្នាខាងលើ ប្រធានាធិបតី អាមេរិក និងប្រធានាធិបតីចិនបានពិភាក្សា និងសន្យាធ្វើការជាមួយគ្នាក្នុងសំណុំរឿងថាមពល និងការប្រែប្រួលអាកាសធាតុ។ ការយល់ព្រមព្រៀងចុះសម្រុងគ្នារវាងមហាអំនាចសេដ្ឋកិច្ចទាំងពីរជារឿងគួរឲ្យលើកទឹកចិត្ត សម្រាប់ពិភពលោក ព្រោះថា នៅពេល មហាអំណាចទាំងពីរឈ្លោះគ្នា ប្រទេសទាំងអស់ក្នុងពិភពលោក រួមទាំងអាមេរិកនិងចិនផងដែរ ដែលត្រូវខាតបង់ប្រយោជន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ