លោកចូបៃដិនអះអាងថា អាមេរិកមានផែនការទប់ទល់កុំឲ្យរុស្ស៊ីចូលឈ្លានពានអ៊ុយក្រែន
ចុះផ្សាយនៅថ្ងៃ៖
ស្តាប់ - ០៨:២១
ប្រធានាធិបតីអាមេរិក លោកចូ បៃដិន បានបញ្ជាក់កាលពីថ្ងៃសុក្រទី ៣ធ្នូថា អាមេរិកនឹងការពារអ៊ុយក្រែន ក្នុងករណីមានការរំលោភឈ្លានពានពីប្រទេសរុស្ស៊ី។ ការចេញមុខមកបញ្ជាក់របស់ប្រធានាធិបតី អាមេរិកធ្វើឡើងនៅក្រោយ កាសែតអាមេរិក The Washington Post ដែលចុះផ្សាយ ឯកសាររបស់កងទ័ពអាមេរិកដែលបង្ហាញ ចលនាកងទ័ពរុស្ស៊ីជាង ១សែននាក់ នៅព្រំដែនរុស្ស៊ី និងអ៊ុយក្រែន។ នៅចំពោះមុខ ចលនាទ័ពដ៏សម្បើមរបស់រុស្ស៊ី រដ្ឋមន្រ្តីការពារជាតិអ៊ុយក្រែនព្រមានថា រុស្ស៊ីនឹងវាយចូលឈ្លានពានអ៊ុយក្រែន នៅដើមឆ្នាំក្រោយ យ៉ាងយូរនៅចុងខែ មករា។ តើអាមេរិកនឹងចាត់វិធានការអ្វីខ្លះ ដើម្បីការពារអ៊ុយក្រែន ក្នុងករណីវាយចូលឈ្លានពានរបស់រុស្ស៊ី? តើរុស្ស៊ីធ្វើសង្រ្គាមឈ្លានពានអ៊ុយក្រែន ដូចការភ័យខ្លាច និងព្រួយបារម្ភរបស់អ៊ុយក្រែន និងប្រទេសលោកខាងលិចដែរឬទេ?
ប្រធានាធិបតីអាមេរិក លោកចូ បៃដិន បាននិយាយនៅថ្ងៃសុក្រម្សិលមិញថា អាមេរិករៀបចំផែនការ ដើម្បីការពារអ៊ុយក្រែន ក្នុងករណីមានការវាយប្រហារឈ្លានពានរបស់រុស្ស៊ី។ ឯកសារកងទ័ពអាមេរិក ដែលដកស្រង់ចុះផ្សាយរបស់កាសែតអាមេរិក The Washington Post បានបញ្ជាក់ការលើកឡើងរបស់រដ្ឋមន្រ្តីការពារអ៊ុយក្រែន ដែលថា រុស្ស៊ីបានចល័តទ័ពក្នុងចំនួនដ៏ច្រើន នៅព្រំដែន អ៊ុយក្រែន រុស្ស៊ី។
តាមកាសែត The Whasington Postដែលបានដកស្រង់សំដីរបស់មន្រ្តីយោធាអាមេរិក ដែលសុំមិនបញ្ចេញឈ្មោះ នៅព្រំដែន រុស្ស៊ី អ៊ុយក្រែន រុស្ស៊ីកំពុងត្រៀមកងទ័ពជាង ១០០កងពល ដែលមានទ័ពជាង ១សែន ៧ម៉ឺននាក់ រថក្រោះ គ្រាប់ផ្លោង និងសម្ភារៈយោធាជាច្រើនទៀត។ ក្រសួងការពារជាតិអ៊ុយក្រែនអះអាងថា រុស្ស៊ីដែលបានប្រមូលផ្តុំ កងទ័ព ១សែននាក់ រួមជាមួយ រថពាសដែក ជាច្រើនគ្រឿង នឹងអាចបើកការវាយលុកចូលឈ្លានពានអ៊ុយក្រែន នៅដើមឆ្នាំក្រោយ ឬយ៉ាងយូរនៅចុងខែមករា ឆ្នាំ ២០២២។
ម៉ូស្គូវិញបានបដិសេធទាត់ចោលការលើកឡើងរបស់អ៊ុយក្រែន និងប្រទេសលោកខាងលិច។ សម្រាប់អ្នកជំនាញ រុស្ស៊ីបង្កើនវត្តមានទ័ពរហូត បង្កើតឲ្យភាពតានតឹង នៅព្រំដែនអ៊ុយក្រែន គឺគ្មានអ្វីក្រៅតែពីចង់ដាក់សម្ពាធ ទាមទារចំណាប់អារម្មណ៍ និងធ្វើតេស្តសាកល្បង ប្រតិកម្មរបស់ប្រទេសលោកខាងលិច ជាពិសេសអាមេរិក នោះទេ។ គេនៅចាំបានថា រុស្ស៊ីធ្លាប់បានប្រើយុទ្ធសាស្រ្តយោធានេះម្តងហើយ កាលពីខែមេសាឆ្នាំនេះ។ នៅទីបំផុត ប្រធានាធិបតីអាមេរិកលោកចូ បៃដិនក៏បានបើកជំនួបកំពូលជាមួយប្រធានាធិបតីរុស្ស៊ី លោកពូទីននៅខែ មិថុនា។ នៅបន្ទាប់ពីប្រធានាធិបតីអាមេរិកបើកភ្លើងខៀវ មិនរករឿងបំពង់បង្ហូរហ្គាសរុស្ស៊ីទៅកាន់ទឹកដីអឺរ៉ុប រុស្ស៊ីក៏បានសម្រេចដកកងទ័ពចេញពីព្រំដែនអ៊ុយក្រែនវិញ។
លើកនេះ រុស្ស៊ីក៏បានយុទ្ធសាស្រ្តដដែល ដោយបានបញ្ជូនទ័ព ដ៏ច្រើនសម្បើមទៅកាន់ព្រំដែន អ៊ុយក្រែន ព្រោះរុស្ស៊ី ទាមទារចង់ឲ្យអាមេរិក និងអង្គការអូតង់ សន្យាជាផ្លូវការ តាមផ្លូវច្បាប់ថា អូតង់មិនត្រូវពង្រីកដែនឥទ្ធិពលសំដៅភាគខាងកើតអឺរ៉ុប ដែលអាចគំរាមកំហែងប្រទេសរុស្ស៊ី។ អ្វីដែលរុស្ស៊ីទាមទារចង់បានជាក់ស្តែងជាងគេបំផុត គឺ អូតង់ និងអាមេរិក មិនត្រូវអ៊ុយក្រែនចូលជាសមាជិករបស់អង្គការអូតង់ ជាដាច់ខាត។
នៅមុនជួបប្រមុខការបរទេសអាមេរិក នៅក្រៅក្របខ័ណ្ឌកិច្ចប្រជុំអង្គការសន្តិសុខនិងសហប្រតិបត្តិការសេដ្ឋកិច្ចនៅប្រទេសស៊ុយអែត កាលពីថ្ងៃព្រហស្បតិ៍ ទី ២ ធ្នូ រដ្ឋមន្រ្តីការបរទេសរុស្ស៊ី លោកSergei Lavrov និយាយថា វាដល់ពេលហើយដែលត្រូវប្រែក្លាយពាក្យសំដី ឲ្យទៅជា ការធានា ជាលាយលក្ខអក្សរ តាមផ្លូវច្បាប់។ រុស្ស៊ីគ្រោងនឹងដាក់សំណើជាផ្លូវការដើម្បីទាមទារឲ្យអូតង់ឈប់ពង្រីកដែនឥទ្ធិពល បែរឆ្ពោះទៅរកតំបន់ភាគខាងកើត។
រុស្ស៊ី បានដាក់លក្ខខណ្ឌបែបនេះ បន្ទាប់ពីអ៊ុយក្រែន បានបង្ហាញចេតនា ចាក់ដាក់ពាក្យចូលជាសមាជិករបស់អូតង់ ពោលគឺដើម្បីបានទទួលការការពារពីអូតង់ ក្នុងករណីមានការរំលោភឈ្លានពានពីប្រទេសរុស្ស៊ី។
នៅថ្ងៃសុក្រម្សិលមិញ ប្រធានាធិបតីអាមេរិកនិយាយថា លោកនឹងមិនទទួលយកខ្សែបន្ទាត់ក្រហម ខាងលើ ដែលកំណត់ទាមទារដោយប្រទេសរុស្ស៊ីនោះទេ។ ប៉ុន្តែ ជាមួយគ្នានោះ នៅក្នុងជំនួបជាមួយប្រធានាធិបតី អ៊ុយក្រែន កន្លងទៅ លោកបៃដិន ក៏មិនបាននិយាយធានាបញ្ជាក់អ៊ុយក្រែន ពីរឿងដាក់បញ្ចូលអ៊ុយក្រែនជាសមាជិករបស់អូតង់នោះដែរ។
តើលោកចូ បៃដិននឹងអាចបញ្ជូនកងទ័ពទៅជួយការពារអ៊ុយក្រែនដែរឬទេ?
គេមិនជឿថា លោកចូ បៃដិន ដែល បានសម្រេចដកកងទ័ពអាមេរិក យ៉ាងប្រផិតប្រផើយបំផុតរហូតធ្វើឲ្យអាហ្វហ្កានីស្ថានធ្លាក់ក្នុងដៃរបស់ពួកតាលីបង់ មានគំនិតចង់បញ្ជូនទ័ព ទៅជួយការពារអ៊ុយក្រែន ក្នុងករណីមានការវាយឈ្លានពានពីរុស្ស៊ីនោះទេ។ ប្រធានាធិបតីអាមេរិកនឹងប្រើការចរចា ផ្លូវទូត ដើម្បីឈានទៅបញ្ចុះបញ្ចូលរុស្ស៊ី ឲ្យដកកងទ័ពចេញពីព្រំដែនអ៊ុយក្រែន។
នៅថ្ងៃម្សិលមិញ លោកចូបៃដិនបាននិយាយថា លោកបានត្រៀមផែនការពេញលេញបំផុតដើម្បីរារាំងកុំឲ្យរុស្ស៊ីអាចបើកការវាយប្រហារឈ្លានពានលើប្រទេសអ៊ុយក្រែន។ ផែនការរបស់ប្រធានាធិបតីផ្តោតសំខាន់ភាគច្រើនលើការដាក់ទណ្ឌកម្មសេដ្ឋកិច្ចទៅលើរុស្ស៊ី។
នៅក្នុងជំនួបជាមួយរដ្ឋមន្រ្តីការបរទេសរុស្ស៊ី នៅប្រទេសស៊ុយអែត នៅសប្តាហ៍នេះ ប្រមុខការបរទេសអាមេរិកផ្ទាល់ក៏ធ្លាប់បានព្រមានពីទណ្ឌកម្មសេដ្ឋកិច្ចលើរុស្ស៊ី បើសិនរុស្ស៊ីចូលឈ្លានពានអ៊ុយក្រែនមែននោះ។
តើអាចទៅរួចដែរឬទេ ដែលរុស្ស៊ីបញ្ជូនទ័ព ចូលឈ្លានពានអ៊ុយក្រែន?
រុស្ស៊ីអាចវាយចូលឈ្លានពានអ៊ុយក្រែន។ នេះ មិនមែនជារឿងថ្មីទេ។ រុស្ស៊ីបានធ្វើរឿងនេះ ម្តងហើយ កាលពីឆ្នាំ ២០១៤ នៅពេល រុស្ស៊ី កាត់យកទឹកដីគ្រីមេរបស់អ៊ុយក្រែន ដោយគ្មានអ្នកណាបានរន្ទឹងទុកមុននោះទេ សូម្បីតែអ៊ុយក្រែនផ្ទាល់។
ចាប់តាំងពីឆ្នាំ ២០១៤ រុស្ស៊ីក៏ត្រូវអ៊ុយក្រែន និងលោកខាងលិច ចោទប្រកាន់នៅតែចិញ្ចឹមសង្រ្គាមនៅព្រំដែនអ៊ុយក្រែន តាមរយៈការជួយផ្គត់ផ្គង់ថវិកា និងសព្វាវុធ ជួយ ពួកឧទ្ទាម គាំទ្ររុស្ស៊ី ដែលកំពុងប្រយុទ្ធទាមទារគ្រប់គ្រងតំបន់ពីរនៅខាងកើតអ៊ុយក្រែន។
សម្រាប់រដ្ឋមន្រ្តីការពារជាតិអ៊ុយក្រែន រឿងរុស្ស៊ីធ្វើសង្រ្គាមឈ្លានពានចូលទឹកដីអ៊ុយក្រែន ជារឿងដែលអាចទៅរួច ប៉ុន្តែ គេអាចបញ្ជៀសវាកុំឲ្យកើតឡើងបានដែរ។ រដ្ឋមន្រ្តីការពារជាតិអ៊ុយក្រែន បានអំពាវនាវឲ្យអាមេរិក និងអូតង់ចាត់វិធានការបន្ទាន់ដើម្បី ទប់ស្កាត់កុំឲ្យរុស្ស៊ីវាយប្រហារទន្ទ្រានយកទឹកដីអ៊ុយក្រែនបានដូចកាលពីឆ្នាំ ២០១៤។
សម្រាប់អ្នកជំនាញ វិញ រុស្ស៊ី ធ្លាប់បានកាត់យកទឹកដីគ្រីមេ របស់អ៊ុយក្រែន ដោយគ្មានការវាយប្រហារបង្ហូរឈាម ព្រោះដោយសារតែគ្មានអន្តរាគមន៍យោធាពីប្រទេសលោកខាងលិច។ ប៉ុន្តែ ខុសពី៧ឆ្នាំមុន រុស្ស៊ីមិនអាចចេះតែបញ្ជូនទ័ពចូលឈ្លានពានអ៊ុយក្រែននោះទេ។
រុស្ស៊ីមិនអាចធ្វើសង្រ្គាមឈ្លានពានអ៊ុយក្រែនដោយគ្មានហេតុផល ព្រោះបើធ្វើដូច្នេះ រុស្ស៊ីជាអ្នកខាតបង់ច្រើនណាស់ដែរ។ ត្រូវដឹងថា កងទ័ពអ៊ុយក្រែនសព្វថ្ងៃ មានធនធានសមត្ថភាព ខ្លាំងជាងមុន ដោយសារមានការគាំទ្រ ពីអង់គ្លេស អាមេរិក កាណាដា និងប្រទេសអឺរ៉ុបដទៃទៀត ដែលបានថ្កោលទោសរុស្ស៊ី ដោយសាររឿងកាត់យកទឹកដីគ្រីមេ នៅឆ្នាំ ២០១៤។
ការធ្វើសង្រ្គាមឈ្លានពានអ៊ុយក្រែន មិនត្រឹមតែធ្វើឲ្យរុស្ស៊ីខាតបង់អាយុជីវិតកងទ័ពរុស្ស៊ីតែប៉ុណ្ណោះទេ ប៉ុន្តែ នឹងធ្វើឲ្យរុស្ស៊ីត្រូវខាតបង់សេដ្ឋកិច្ច ដោយសារទណ្ឌកម្មសេដ្ឋកិច្ច។ ម្យ៉ាងការគ្រប់គ្រង តំបន់អ៊ុយក្រែន ដែលរុស្ស៊ី អាចវាយចូលគ្រប់គ្រង នោះ នឹងធ្វើឲ្យរុស្ស៊ីត្រូវខាតបង់ចំណាយទាំងកម្លាំងមនុស្ស និងថវិកាជាតិរុស្ស៊ី ដែលនោះមិនមែនជារឿងល្អឡើយសម្រាប់មតិសាធារណៈជនរុស្ស៊ី។
កំពូលរបស់មេដឹកនាំរុស្ស៊ី និងអាមេរិកនឹងអាចទៅកាត់បន្ថយ ភាពតានតឹងយោធា?
អ្នកនាំពាក្យរបស់វិមានក្រេមឡាំងបានបញ្ជាក់ថា ជំនួបកំពូលតាមវីដេអូរវាងប្រធានាធិបតីរុស្ស៊ី និងប្រធានាធិបតីអាមេរិកនឹងអាចរៀបចំឡើងនៅសប្តាហ៍ក្រោយ។ គេដាក់ក្តីសង្ឃឹមស្រុងទៅលើជំនួបកំពូលរវាងប្រធានាធិបតីរុស្ស៊ី និងអាមេរិក នៅសប្តាហ៍ក្រោយនេះ ដើម្បីបន្ធូរបន្ថយភាពតានតឹងនៅព្រំដែនរុស្ស៊ី អ៊ុយក្រែន។ គេសង្ឃឹមថា មេដឹកនាំអាមេរិក និងរុស្ស៊ី នឹងធ្វើសម្បទាន ដើម្បី បន្ធូរបន្ថយភាពតានតឹង ដែលពួកគេជាអ្នកបង្កើតឡើង។
រុស្ស៊ីបានដាក់ខ្សែបន្ទាត់ក្រហម ដោយបានទាមទារអូតង់ ឲ្យឈប់បង្ខិតវត្តមានយោធាសំដៅទិសខាងកើត ចូលទៅក្នុងតំបន់ ដែលស្ថិតក្នុងដែនឥទ្ធិពលរបស់រុស្ស៊ី។ រុស្ស៊ី បានទាមទារយ៉ាងដូច្នេះ នៅបន្ទាប់ពីអូតង់ និងអាមេរិកបានរៀបចំទៅធ្វើសមយុទ្ធ កាន់តែច្រើន ជាមួយប្រទេសដែលជាប់ព្រំដែនរុស្ស៊ី ដែលក្នុងនោះមានប្រទេសអ៊ុយក្រែន។
រុស្ស៊ីវិញ ក៏ត្រូវបន្ធូរជំហររបស់ខ្លួនវិញដែរ។ ក្នុងនាមជាប្រទេសអធិបតេយ្យភាព រុស្ស៊ី ក៏មិនអាចការកំហិតទាមទារមិនឲ្យអ៊ុយក្រែន ចូលជាសមាជិក របស់អូតង់ នោះដែរ។
អ៊ុយក្រែនតាមរយៈ រដ្ឋមន្រ្តីការបរទេស លោក Dmytro Kouleba បាននិយាយទាត់ចោលការទាមទាររបស់រុស្ស៊ី ដែលចង់មានសន្យាការធានាសន្តិសុខ ជាថ្នូរនឹងការបន្ធូរបន្ថយភាពតានតឹងនៅព្រំដែនអ៊ុយក្រែន។ អ៊ុយក្រែនបានទាមទារឲ្យសម្ព័ន្ធមិត្តលោកខាងលិចប្រកាន់ជំហរដូចអ៊ុយក្រែន ព្រោះថា អ៊ុយក្រែន ក្នុងនាមជាប្រទេសមានអធិបតេយ្យភាព មានសិទ្ធិសេរីភាព ចូលជាសមាជិករបស់អង្គការអន្តរជាតិ ដោយគ្មានរងការដាក់កំហិតពីបរទេស។
សម្រាប់ រដ្ឋមន្រ្តីការបរទេសអ៊ុយក្រែន ការចូលជាសមាជិករបស់អូតង់ និងសហភាពអឺរ៉ុប មានចែងក្នុងរដ្ឋធម្មនុញ្ញអ៊ុយក្រែន និងថា អ៊ុយក្រែន នឹងចូលជាសមាជិករបស់អូតង់ នៅថ្ងៃអនាគត បើទោះមានការប្រឆាំងពីប្រទេសរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ