រុស្ស៊ីប្រកាសដកទ័ពខ្លួន ចេញពី តំបន់នៅជិតព្រំដែនអ៊ុយក្រែន
ថ្ងៃព្រហស្បតិ៍ រុស្ស៊ីបានប្រកាសថា ចាប់ពីថ្ងៃសុក្រទៅ គឺ ផ្តើមដកចេញ ទ័ពខ្លួនដែលផ្តុំយ៉ាង ច្រើន នៅជិតព្រំដែនអ៊ុយក្រែន និង នៅដែនដីឧបសម្ព័ន្ធគ្រីមេ ដ្បិតចាត់ទុកថា ចប់សព្វគ្រប់ទៅហើយ លំហាត់សឹក ដែលជា វត្តមានយោធាសែនធំធេង នាំជាក្តីព្រួយបារម្ភ ដល់ បស្ចិមលោក និង ក្រុងគៀវ។
ចុះផ្សាយនៅថ្ងៃ៖
ស្តាប់ - ០២:០៣
ក្នុងលំហាត់នោះ កងទ័ពបានបង្ហាញសមត្ថភាពខ្លួន ធានា ការពារប្រទេសយ៉ាងកក់ក្តៅ។ ម៉្លោះ ហើយបានជា ខ្ញុំសម្រេចបញ្ចប់សកម្មភាពផ្ទៀងផ្ទាត់មើល នៅតាមយោធភូមិខាងត្បូង និងខាងលិច ដែល ជាប់នឹងព្រំដែនអ៊ុយក្រែន-សេចក្តីនេះ ប្រកាស ដោយ រដ្ឋមន្ត្រីការពារជាតិរុស្ស៊ី លោក Serguei Choigou តាមរយៈសេចក្តីថ្លែងការណ៍សមស្រប។
ដោយប្រមាណថា គោលដៅទាំងអម្បាល់ម៉ាន នៃលំហាត់ដ៏សំបើមនេះ “ មានសម្រេចបានទាំងស្រុង” លោក Choigou បានបញ្ជាឲ្យ កងទ័ពវិលត្រឡប់ទៅកាន់បន្ទាយ ជាទីតាំងអចិន្ត្រៃយ៍ របស់ខ្លួនវិញ” ចាប់ពី ថ្ងៃ សុក្រ ២៣ មេសា។ ទាំងពួកទាហាន ដែលពង្រាយ នៅទឹកដីគ្រីមេ ក៏វិលត្រឡប់ទៅបន្ទាយវិញដែរ ចាប់ ពីឥឡូវ រហូតដល់ថ្ងៃ ទី ១ ឧសភា - លោក រដ្ឋមន្ត្រីការពារជាតិរុស្ស៊ី បានបន្ថែម។
ប៉ុន្មានម៉ោងមុន លោក Choigou បានអញ្ជើញទៅកាន់ គ្រីមេ-ទៀបកោះដែលត្រូវបានរុស្ស៊ីភ្ជាប់យក ក្នុងឆ្នាំ ២០១៤ ដើម្បីពិនិត្យមើលដោយផ្ទាល់ភ្នែក លំហាត់សឹក ចំពេលដែលភាពតានតឹងនៅត្រង់តំបន់នេះ ឡើង ដល់កម្រិតកំពូល រវាងម្ខាងគឺ រុស្ស៊ី និង ម្ខាងទៀត គឺ ក្រុងគៀវ និង បស្ចិមលោក។
តាមទិន្នន័យក្រសួងការពារជាតិរុស្ស៊ី មានដាក់ឲ្យសកម្មក្នុងលំហាត់សឹកនេះ គឺ យោធា ១០.០០០ នាក់ , យន្ដហោះមួយចំនួន , នាវាចម្បាំងប្រមាណ ៤០ គ្រឿង ប្រព័ន្ធការពារដែនអាកាស និង ទ័ពឆ័ត្រយោង។
រុស្ស៊ី នាប៉ុន្មានថ្ងៃចុងក្រោយ បានបង្កើនចំនួនលំហាត់សឹក ក្នុងសមុទ្រខ្មៅ និងនៅទៀបកោះគ្រីមេ ក្រោយពី បានលាតទ័ពរាប់ម៉ឺននាក់អស់ ៣ សប្តាហ៍ នៅតាមតំបន់ជាប់នឹងព្រំដែនអ៊ុយក្រែន ដែលជាមួយប្រទេសនេះ រុស្ស៊ី ចេញមុខជាសត្រូវដាក់គ្នា តាំងពីឆ្នាំ ២០១៤ មក។
ក្រុងគៀវ ដែលច្បាំងនៅតំបន់ខាងកើតអ៊ុយក្រែន ទល់នឹង ពួកផ្តាច់ទឹកដីរុស្ស៊ីនិយម បានត្អូញថា ខ្លាចរុស្ស៊ីលុកលុយ ចូលទៅ “ កំទេច” ប្រទេសខ្លួន។ ចំណែកម៉ូស្គូ តែងអះអាងថា ខ្លួន” ឥតគំរាមលើនរណា មួយ” ឡើយ ទាំងបរិហារអាក្រាត រាល់តែ” អំពើបង្កហេតុ” ពីខាងក្រុងគៀវ និង សកម្មភាព”ពាំនាំជាគ្រោះថ្នាក់” ដល់ព្រំដែនខ្លួន ពីខាងបក្សសម្ព័ន្ធអួតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ