មួយឆ្នាំក្រោយការវាយលុកចូលវិមានកាពីតូល អាមេរិកនៅតែមិនទាន់ជា ពីរបួស
ចុះផ្សាយនៅថ្ងៃ៖
ស្តាប់ - ០៧:៣៥
នៅថ្ងៃទី ៦មករានេះ គឺមានរយៈពេលមួយឆ្នាំគត់ ដែលវិមានកាពីតូលនៅទីក្រុងវ៉ាស៊ីនតោនត្រូវវាយចូលលុកលុយ ដោយក្រុមគាំទ្រលោកដូណាល់ ត្រាំ។ រូបភាពហេតុការណ៍ចូលលុកលុយវិមានកាពីតូលដែលជាស្ថាប័នកំពូល របស់អាមេរិកបានធ្វើឲ្យពិភពលោក និងប្រជាជនអាមេរិកាំងភ្ញាក់ផ្អើល និងតក់ស្លុត។ តក់ស្លុត ព្រោះគេបានឃើញ រូបភាពដ៏អាក្រក់មួយក្នុងប្រវត្តិសាស្រ្ត ដែលស្តែងបញ្ជាក់ថា លទ្ធិប្រជាធិបតេយ្យអាមេរិក កំពុងរងការគំរាមកំហែង ចំណែកការបែកបាក់គ្នាក្នុងចំណោមប្រជាជនអាមេរិកាំង មានកាន់តែខ្លាំងឡើង។
នៅថ្ងៃរំលឹកខួប១ឆ្នាំ នៃការវាយលុកចូលវិមានកាពីតូល ប្រធានាធិបតីអាមេរិក លោកចូ បៃដិន ត្រូវថ្លែងសុន្ទរកថា ទម្លាក់កំហុសលើអតីតប្រធានាធិបតីដូណាល់ ត្រាំ។ នេះបើតាមការគូសបញ្ជាក់របស់អ្នកនាំពាក្យសេតវិមាន លោកស្រី Jen Psaki។
នៅក្នុងអត្ថបទសុន្ទរកថាដែល បានធ្លាក់ដល់ដៃរបស់ក្រុមអ្នកកាសែត នៅព្រឹកថ្ងៃព្រហស្បតិ៍ លោកចូ បៃដិនត្រូវនិយាយថា អាមេរិកនឹងមិនព្រមឲ្យអំពើហិង្សានយោបាយកា្លយជាទម្លាប់ ធម្មតានោះទេ។
ចាប់តាំងពីចូលកាន់តំណែង ជាប្រធានាធិបតីអាមេរិក លោកចូ បៃដិនកម្រនឹងលើកនិយាយពីឈ្មោះរបស់លោកដូណាល់ ត្រាំ ដោយលោកផ្តោតសំខាន់តែ ទៅលើកម្មវិធីនយោបាយ ដើម្បីស្រោចស្រង់អាមេរិក ដែលកំពុងជាប់លង់ក្នុងវិបត្តិកូវីដ និងជាពិសេសសព្វថ្ងៃ គឺវិបត្តិអតិផរណា ដែលកំពុងប៉ះពាល់ខ្លាំងដល់ជីវភាពប្រជាជនអាមេរិក។
ប៉ុន្តែ បើតាមអ្នកនាំពាក្យរបស់សេតវិមាន លោកស្រី Jen Psaki នៅក្នុងសុន្ទរកថា នៅវិមានកាពីតូល ជាទីដែលក្រុមគាំទ្រលោកដូណាល់ ត្រាំ ចូលវាយលុកដោយហិង្សា ដើម្បី រារាំងកុំឲ្យលោកអាចក្លាយជាប្រធានាធិបតី អាមេរិក នោះ លោកចូ បៃដិន នឹងផ្តោតសំខាន់លើការទទួលខុសត្រូវដ៏សំខាន់ របស់លោកដូណាល់ត្រាំ លើហេតុការណ៍វាយលុកចូលដោយហិង្សា ក្នុងវិមានកាពីតូល កាលពី១ឆ្នាំមុន។
ប្រធានាធិបតីអាមេរិកនឹងនិយាយសង្កត់ធ្ងន់ពីការនិយាយភូតកុហក ការនិយាយបន្លំបោកប្រាស់របស់លោកដូណាល់ ត្រាំ ដែលបានជំរុញឲ្យកើតមានហេតុការណ៍វាយសម្រុកចូលឈ្លានពាន ដោយហិង្សា នៅវិមានកាពីតូល ដែលជានិមិត្តរូបតំណាងលទ្ធិប្រជាធិបតេយ្យអាមេរិក។
សម្រាប់លោកបៃដិន ការវាយលុកចូលវិមានកាពីតូល ជាលទ្ធផលនៃការដឹកនាំមិនល្អរយៈពេល៤ឆ្នាំរបស់លោកដូណាល់ ត្រាំ។ ក្នុងកាលៈទេសៈដែលប្រជាជនអាមេរិកកំពុងបែកបាក់គ្នាខ្លាំង និងលោកចូ បៃដិនធ្លាប់បានថ្លែងសារ ជំរុញឲ្យប្រជាជនរួបរួមគ្នាឡើងវិញ ដើម្បីស្តារ ការពារលទ្ធិប្រជាធិបតេយ្យអាមេរិកដែលកំពុងរងការគំរាមកំហែង។
ប៉ុន្តែ សម្រាប់អ្នកតាមដាននយោបាយ លោកចូ បៃដិនបានផ្តល់សារៈសំខាន់លើថ្ងៃខួប១ឆ្នាំ នៃការវាយលុកចូលវិមានកាពីតូល លើកនេះ ក៏ដោយសារតែហេតុផលនយោបាយ។
សមាជិកសំខាន់ៗរបស់បក្សសាធារណរដ្ឋជាច្រើនរូប រាប់ទាំងប្រធានក្រុមបក្សសាធារណរដ្ឋនៅព្រឹទ្ធសភានឹងបង្ហាញមុខ នៅថ្ងៃរំលឹកខួប១ឆ្នាំនៃការវាយលុកចូលដោយហិង្សាក្នុងវិមានកាពីតូល។ យ៉ាងណាក៏ដោយ ប្រធានក្រុមបក្សសាធារណរដ្ឋ Mitch McConnellបានចោទប្រកាន់បក្សប្រជាធិបតេយ្យរបស់លោកចូ បៃដិនថា កំពុងយកថ្ងៃទី៦មករា មកកេងចំណេញនយោបាយ។ បក្សសាធារណរដ្ឋបាននិយាយចោទប្រកាន់ប្រធានាធិបតីអាមេរិកថា ដោយនិយាយសំខាន់ពីការទទួលខុសត្រូវរបស់លោកដូណាល់ ត្រាំ ក្នុងហេតុការណ៍វាយលុកចូលវិមានកាពីតូល កាលពី១ឆ្នាំមុន លោកចូ បៃដិនទំនងចង់បង្វែរចំណាប់ប្រជាជនអាមេរិក ក្នុងកាលៈទេសៈ ដែលរដ្ឋបាលរបស់លោកកំពុងធ្លាក់កូដខ្លាំង រងការរិះគន់ ដោយសារតែរឿងគ្រប់គ្រងវិបត្តិកូវីដ វិបត្តិអតិផរណា។
ដោយចោទទម្លាក់កំហុសទៅលើលោកដូណាល់ ត្រាំដែលមកពីបក្សសាធារណរដ្ឋ លោកចូ បៃដិនសំឡឹងផលប្រយោជន៍នយោបាយ នៅមុនការបោះឆ្នោតសភា មុនពាក់កណ្តាលអាណត្តិ ដែលត្រូវរៀបចំនៅចុងឆ្នាំនេះ។ ម្យ៉ាងលោកក៏ចង់រុញច្រានលោកដូណាល់ ត្រាំ ឲ្យខ្ទាតចេញក្រៅរង្វង់នយោបាយ ឃ្លាតឆ្ងាយពីបក្សសាធារណរដ្ឋ ព្រោះលោកដឹងថា លោកដូណាល់ ត្រាំ នឹងទទួលបានការគាំទ្រនៅក្នុងបក្សសាធារណរដ្ឋ ដើម្បីអាចត្រលប់មកប្រជែងជាមួយលោក នៅក្នុងការបោះឆ្នោត ប្រធានាធិបតី នៅ៤ឆ្នាំខាងមុខ។
ដោយបញ្ជាក់ថា លោកដូណាល់ ត្រាំ ជាអ្នកនយោបាយដ៏គ្រោះថ្នាក់ គំរាមកំហែងលទ្ធិប្រជាធិបេតយ្យ ដោយញុះញង់ឲ្យមានការវាយលុកចូលវិមានកាពីតូល លោកចូ បៃដិន ចង់រំលឹកប្រាប់ប្រជាជនអាមេរិក ថា គេមិនគួរយកខ្លួនបៀត លោកដូណាល់ ត្រាំនោះទេ។ ប៉ូលិសតាមរកចាប់ខ្លួនជនសង្ស័យ ជាង២០០០នាក់ ដែលជាប់ពាក់ព័ន្ធនឹងហេតុការណ៍វាយលុកចូល វិមានកាពីតូល
ថ្ងៃ ទី៦មករា ឆ្នាំមុន ជាថ្ងៃដែលសភាអាមេរិកត្រូវបោះឆ្នោត បញ្ជាក់ជោគជ័យរបស់លោកចូ បៃដិន ថា ជាប្រធានាធិបតីជាប់ឆ្នោត សម្រាប់អាណត្តិថ្មី។ ប៉ុន្តែ នៅថ្ងៃនោះ នៅប៉ុន្មានម៉ោងមុនការបោះឆ្នោតនៅវិមានកាពីតូល លោកដូណាល់ ត្រាំ ដែលកាលណោះ នៅជាប្រធានាធិបតីអាមេរិកនៅឡើយ បានបង្កើតការជួបជុំក្រុមអ្នកគាំទ្ររបស់លោកនៅមុខសេតវិមាន ដែលនៅក្នុងនោះ លោកថ្លែងសាជាថ្មី ថា គេបានលួចសន្លឹកឆ្នោតរបស់លោក ដែលគេត្រូវតែប្រយុទ្ធប្រឆាំង។ លោកដូណាល់ ត្រាំ ដែលមិនព្រមទទួលខ្លួនថា ចាញ់នៅក្នុងការបោះឆ្នោតប្រធានាធិបតី នៅចុងឆ្នាំ ២០២០ បាននិយាយប្រាប់ឲ្យក្រុមគាំទ្ររបស់លោកឲ្យធ្វើដំណើរទៅវិមានកាពីតូល ដើម្បីរារាំងកុំឲ្យសភាបោះឆ្នោតបញ្ជាក់ជ័យជំនះរបស់លោកចូ បៃដិន។ នៅក្រោយការប្រកាសរបស់លោកដូណាល់ ត្រាំ សកម្មជនគាំទ្រលោក រាប់ម៉ឺននាក់ បានបង្វែរក្បួនបាតុកម្ម និងវាយសម្រុកចូលវិមានកាពីតូល ក្នុងខណៈ ដែលសមាជិកសភា ដែលកំពុងបោះឆ្នោតបញ្ជាក់ជ័យជំនះរបស់លោក ចូបៃដិន ជាប្រធានាធិបតីអាមេរិកអាណត្តិថ្មី។
មនុស្ស៥នាក់ បានស្លាប់ នៅក្នុងការប្រឈមមុខ ដាក់គ្នា រវាងប៉ូលិស កាពីតូល និងក្រុមគាំទ្រលោកដូណាល់ ត្រាំ ដែលនៅក្នុងនោះ ៤នាក់ជាសកម្មជនគាំទ្រលោកដូណាល់ ត្រាំ ចំណែក ប៉ូលិសកាពីតូលជាង១០០នាក់រងរបួស នៅក្នុងហេតុការណ៍វាយសម្រុកហិង្សារបស់ក្រុមគាំទ្រលោកដូណាល់ ត្រាំ។
រហូតមកដល់ពេលនេះ ប៉ូលិស សហព័ន្ធអាមេរិកបានចាប់ខ្លួនមនុស្ស ជាង៧០០នាក់ ដែលជាប់ពាក់ព័ន្ធនឹងការវាយសម្រុកចូល ក្នុងវិមានកាពីតូល កាលពីថ្ងៃទី ៦មករា ឆ្នាំមុន។
តាមរដ្ឋមន្រ្តីក្រសួងយុត្តិធម៌អាមេរិក លោកMerrick Garland ប៉ូលិសកំពុងតាមរកចាប់មនុស្សជាង ២ពាន់នាក់ ដែលប៉ូលិសសហព័ន្ធ FBI សង្ស័យថា មានជាប់ពាក់ព័ន្ធ នឹងហេតុការណ៍ វាយលុកចូលវិមានកាពីតូល ដែលនៅក្នុងនោះ មនុស្សជាង ២០០នាក់ រងចោទប្រកាន់ថា បានប្រព្រឹត្តអំពើហិង្សា។
នៅសភាអ្នកតំណាងរាស្រ្ត គណៈកម្មការដែលដឹកនាំដោយគណបក្សប្រជាធិបតេយ្យរបស់លោកចូ បៃដិន កំពុងស៊ើបអង្កេត ដើម្បីចង់ដឹង ថា តើហេតុការណ៍វាយលុកចូលវិមានកាពីតូល អាចជាការរៀបចំទុកជាមុនរបស់ក្រុមលោកដូណាល់ ត្រាំដែរឬទេ។ ការស៊ើបអង្កេតរបស់គណៈកម្មការសភា នៅប៉ុន្មានខែមកនេះ បានបង្ហាញថា មានការសន្មត់មួយចំនួនដែលថា លោកដូណាល់ ត្រាំ និងទីប្រឹក្សាជាច្រើននាក់របស់លោកបានព្យាយាមគ្រប់មធ្យោបាយ ដើម្បី ផ្លាស់ប្តូរលទ្ធផលឆ្នោតប្រធានាធិបតី តាមរយៈ ការញុះញង់ឲ្យក្រុមគាំទ្ររបស់លោក ចូលទៅរំខាន រារាំងកុំឲ្យសភា បោះឆ្នោត បញ្ជាក់ជ័យជំនះរបស់លោកចូ បៃដិន នៅវិមានកាពីតូល នៅថ្ងៃទី ៦មករា ឆ្នាំ ២០២១។
ប៉ុន្តែ រហូតមកដល់ពេលនេះ កុប្បករ ដែលប៉ូលិស FBI បានចាប់ខ្លួន និងកំពុងរកចាប់ខ្លួន សុទ្ធតែរងការចោទប្រកាន់ពីបទប្រើអំពើហិង្សា ឬរំលោភចូលដោយខុសច្បាប់វិមានកាពីតូល ប៉ុន្តែគ្មានបទចោទប្រកាន់ណាមួយ ដែលនិយាយពីការឃុបឃិត វាយលុកចូលវិមានកាពីតូល ដោយមានការរៀបចំទុកជាមុននោះទេ ពោលគឺគ្មានបទចោទប្រកាន់ណាមួយដែលបញ្ជាក់ពីការញុះញង់ រៀបចំដោយក្រុមលោកដូណាល់ត្រាំនោះទេ។
ដូណាល់ ត្រាំ នៅតែមានកូដប្រជាប្រិយភាព និងបានការគាំទ្រក្នុងចំណោមអ្នកនយោបាយបក្សសាធារណរដ្ឋ
ប្រជាជនអាមេរិកប្រមាណ ៥៧%វាយតម្លៃថា លោកដូណាល់ ត្រាំ មានការទទួលខុសត្រូវសំខាន់មួយក្នុងហេតុការណ៍ វាយសម្រុកចូលវិមានកាពីតូល ប៉ុន្តែ ក្នុងចំណោមអ្នកគាំទ្របក្សសាធារណរដ្ឋ មានមនុស្សតែ ២២%ប៉ុណ្ណោះ ដែលជឿថា លោកដូណាល់ ត្រាំ អាចទទួលខុសត្រូវលើរឿងនេះ។ អ្នកគាំទ្របក្សសាធារណរដ្ឋ ដល់ទៅ ៦៨%នៅតែជឿថា លោកដូណាល់ ត្រាំត្រូវគេលួចសន្លឹកឆ្នោត។
នៅមួយឆ្នាំក្រោយ លោកដូណាល់ ត្រាំ នៅតែមិនផ្លាស់ប្តូរជំហររបស់លោកដែរ។ នៅថ្ងៃអង្គារលោកនៅតែនិយាយថា មានការបន្លំលួចសន្លឹកឆ្នោត នោះបើទោះបីជាគ្មានភស្តុតាងណាមួយមកបញ្ជាក់ក្តី។
តាមគម្រោងត្រូវធ្វើសន្និសីទកាសែត នៅថ្ងៃព្រហស្បតិ៍នេះដើម្បី ប្រជែង និយាយផ្ទាន់ជើង លោកប្រធានាធិបតីចូ បៃដិន ប៉ុន្តែ លោកបានសម្រេចលុបចោលទៅវិញ ក្នុងហេតុផលថា ប្រព័ន្ធផ្សព្វផ្សាយលំអៀង ហើយគណៈកម្មការស៊ើបអង្កេតរបស់សភា ថា មិនយុត្តិធម៌ ដែលស្រាវជ្រាវរកចោទប្រកាន់តែក្រុមមនុស្សស្និទ្ធនឹងលោក។
មនុស្សជំនិតលោកដូណាល់ ត្រាំ បានណែនាំឲ្យលោកដូណាល់ ត្រាំ លុបចោល សន្និសីទ នៅថ្ងៃខួប១ឆ្នាំនៃការវាយលុកចូលវិមានកាពីតូល។ គេជឿថា សន្និសីទរបស់លោកដូណាល់ ត្រាំនឹងអាចធ្វើឲ្យលោកខាតបង់សន្លឹកឆ្នោត ព្រោះថា សន្និសីទលើកនេះ នឹងអាចទៅធ្វើឲ្យមានកំហឹងពុះកញ្ច្រោលសាជាថ្មី ក្នុងចំណោមអ្នកគាំទ្ររបស់លោក ហើយដែលនឹង ញុះញង់បង្កឲ្យមានអំពើហិង្សាសាជាថ្មី។ ការដាក់ខ្លួនទាប មិនសូវចេញមុខ ជាការល្អ ព្រោះថា លោកដូណាល់ ត្រាំ នៅតែមានកូដប្រជាប្រិយក្នុងចំណោមអ្នកគាំទ្រ ហើយលោកនៅតែជាបុគ្គលដែលមានឥទ្ធិពលលើអ្នកនយោបាយរបស់បក្សសាធារណរដ្ឋ។ លោកត្រូវនៅស្ងៀម តមសំដី កសាងមុខមាត់ បើសិនលោកចង់ ឈរឈ្មោះសាជាថ្មី សម្រាប់ការបោះឆ្នោតប្រធានាធិបតី នៅ៣ឆ្នាំខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ